ހއ.ބާރަށު ސޯސަން ޝަހީދު އަލްމަރްހޫމް އިބްރާޙިމް ހުސެއިން (މއ.އަންނާރުގެ) އަކީ 1988 ނޮވެމްބަރު 3 ވަނަ ދުވަހު މަސްޖިދުލް ސުލްތާން މުހައްމަދު ތަކުރުފާނުލް އައުޒަމް (އިސްލާމީ މަރުކަޒު) އަށް ފަތިހު ފަތިސް ނަމާދަށް ދުރުވި ބޭކަލެކެވެ.
ދުޝްމިނުން ސިފައިންގެ މައި މަރުކަޒަށް ހަމަލާދެމުންދިޔަ ވަގުތު އިސްލާމީ މަރުކަޒުގެ ސަރަހައްދުގައި ދުޝްމިނުން ހަރަކާތްތެރިވަމުންދާތީ މިސްކިތުން ނުފޭބި އިސްލާމީ މަރުކަޒު ތެރޭގައި ގިނައިރުތަކެއް ވަންދެން އިންނަވަން ޖެހިވަޑައިގަތެވެ.
އެގޮތަށް އިންނެވުމަށްފަހު އެދުވަހު ހަވީރު އިސްލާމީ މަރުކަޒުން ނިކުންނެވި ވަގުތު ދުޝްމިނުން ބަޑިން ބިރުދައްކާ ރަހީނުކޮށް ދުޝްމިނުން މާލެ ދޫކޮށް ފިލަން މަސައްކަތްކުރިއިރު ހައިޖެކްކުރި އެމްވީ ޕްރޮގްރެސް ލައިޓްގައި ގެންދިޔަ އެވެ.
ޝަހީދު އިބްރާހިމް ހުސެއިން ޝަހީދުވީ ޕްރޮގްރެސް ލައިޓްގައި ދުޝްމިނުން ރަހީނުކޮށްގެން ގެންދިޔަ މީހުންނާއެކު ޓެރަރިސްޓުން ފިލަން ދަތުރުކުރަމުން ދަނިކޮށް، ރަހީނުން ސަލާމަތްކުރުމަށްޓަކައި ޕްރޮގްރެސް ލައިޓް ހުއްޓުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ރަހީނުންނާއި އެކު ފިލަން ދުވާތީ އެބޯޓު ހުއްޓުވުމަށްޓަކައި އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސް ލައިޓްއަށްދިން ހަމަލާ ތެރޭގައި ޕްރޮގްރެސް ލައިޓްގައި އެވެ.
ޝަހީދު އިބްރާޙިމް ހުސެއިން ޝަހީދުވީ 1988 ނޮވެމްބަރު 6 ވަނަ ދުވަހު އެވެ.
ޝަހީދު އަލްމަރްހޫމް އިބްރާހިމް ހުސެއިން ޝަހީދުވިއިރު އުމުރަކީ 52 އަހަރެވެ. ޝަހީދުވިއިރު ހުންނެވީ ހެޑްކުއާޓާޒްގެ 1 ނަންބަރު ކައްކާގެ މަގާމުގައި އެވެ. ޝަހީދުވިއިރު 5 ކުދިން ދުނިޔޭގައި އެބަތިއްބެވެ.
މައުލޫމާތު: އެމްއެންޑީއެފްއިން ނެރުނު 3 ނޮވެމްބަރު ފޮތުން
