ސ.ހިތަދޫ އޯކިޑްމާގޭ ޝަހީދު އަލްމަރްހޫމް އަހުމަދު ލަބީބްއަކީ ޗާންދަނީމަގުގެ 18 ނަންބަރު ފިހާރައިގެ ސޭޓެވެ.
1988 ނޮވެމްބަރު 3 ވަނަ ދުވަހު ދުޝްމިނުން މާލެއަށް އަރައި ހަމަލާދެމުންދިޔައިރު އެދުވަހުގެ މެންދުރުފަހުގެ ވަގުތެއްގައި ޗާންދަނީމަގު 18 ނަންބަރު ފިހާރައަށް ދުޝްމިނުންގެ ބަޔަކު ގޮސް އެފިހާރައިގެ ކޮމިއުނިކޭޝަން ސެޓެއް ދިނުމަށް އެދުމުން އެކަމަށް އިންކާރުކުރުމުން ދުޝްމިނުން އޭނާ ފިހާރައިން ނެރެގެން ރަހީނުކުރި އެވެ.
ޝަހީދު އަލްމަރްހޫމް އަހުމަދު ލަބީބު ޝަހީދުވީ ޕްރޮގްރެސް ލައިޓްގައި ދުޝްމިނުން ރަހީނުކޮށްގެން ގެންދިޔަ މީހުންނާއެކު ޓެރޮރިސްޓުން ފިލަން ދަތުރުކުރަމުން ދަނިކޮށް، ރަހީނުން ސަލާމަތްކުރުމަށްޓަކައި ޕްރޮގްރެސް ލައިޓް ހުއްޓުމަށް ތަކުރާރުކޮށް އިންޒާރުދިނުމުން ވެސް މަޑުނުކޮށް ރަހީނުންނާއި އެކު ފިލަން ދުވާތީ އެބޯޓު ހުއްޓުވުމަށްޓަކައި އިންޑިއާގެ މަނަވަރު އައިއެންއެސް ގޯދާވަރީން ޕްރޮގްރެސް ލައިޓްއަށްދިން ހަމަލާ ތެރޭގައި ޕްރޮގްރެސް ލައިޓްގައި އެވެ.
ޝަހީދު އަލްމަރްހޫމް އަހުމަދު ލަބީބް ޝަހީދުކޮށްލެއްވީ 1988 ނޮވެމްބަރު 6 ވަނަ ދުވަހު އެވެ. ޝަހީދު އަލްމަރްހޫމް އަހުމަދު ލަބީބު ޝަހީދުވިއިރު އުމުރުފުޅަކީ 52 އަހަރެވެ.
ޝަހީދުވިއިރު 5 ކުދިންނާއި އަންބަކު ދުނިޔޭޔގައި އިންނެވި އެވެ. މޭގެތެރެއިން ގިނަ ކުދިން މިހާރު ގެންދަވަނީ ގައުމަށް އަގުހުރި ހިދުމަތްތަކެއް ކޮށްދެއްވަމުންނެވެ.
މައުލޫމާތު: އެމްއެންޑީއެފްއިން ނެރުނު 3 ނޮވެމްބަރު ފޮތުން
