ހދ. ހަނިމާދޫގައި އަންނަ އަހަރު މުޅިން އައު އިންޓަނޭޝަނަލް އެއާޕޯޓެއް ތަރައްޤީކުރުމުގެ މަސައްކަތް ފައްޓަވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞޯލިޙް ވިދާޅުވެއްޖެއެވެ.
ރައީސް ޞޯލިޙް މިހެން ވިދާޅުވީ، ހއ. ހޯރަފުށީ ޑޮމެސްޓިކް އެއާޕޯޓް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، ހަނިމާދޫގައި އަންނަ އަހަރު “މުޅިން އަލަށް” ބައިނަލްއަޤްވާމީ ވައިގެ ބަނދަރެއް ތަރައްޤީކުރައްވާނެ ކަމަށާއި، ހަމަ އެއާއެކު މ.މުއްޔާއި، ށ.ބިލެއްފަހީގައިވެސް ޑޮމެސްޓިކް އެއާޕޯޓްތަކެއް ތަރައްޤީކުރައްވާނެ ކަމަށެވެ. މީގެއިތުރުން ކުރިއަށް އޮތް ދެ އަހަރުގެ ތެރޭގައި ބ.ތުޅާދޫގައި އިތުރު ވައިގެ ބަނދަރެއް ތަރައްޤީކުރައްވާނެކަމަށް ރައީސް ޞޯލިޙް ވިދާޅުވިއެވެ.
ހަނިމާދޫގައި މުޅިން އާ ބައިނަލްއަގްވާމީ ވައިގެ ބަނދަރެއް ތަރައްޤީ ކުރައްވާނެކަމަށް ރައީސް ޞޯލިޙް ވިދާޅުވިއިރު، މިއަހަރުގެ އޮގަސްޓް މަހުގެ ތެރޭގައި އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެފައިވަނީ، ހަނިމާދޫ އިންޓަނޭޝަނަލް އެއާޕޯޓް “އަސްލު އިންޓަނޭޝަނަލް އެއާޕޯޓަކަށް” ހައްދަވާނެ ކަމަށެވެ.
ހަނިމާދޫ އެއާޕޯޓް ބައިނަލްއަޤްވާމީ ދަތުރުފަތުރު ކުރެވޭނެ ޒަމާނީ ފެންވަރަށް ތަރައްޤީކުރައްވާނެކަމަށް މިއަދު ރައީސް ޞޯލިޙް ތަކުރާރުކޮށް ވައުދުވެވަޑައިގެންނެވިއެވެ.
