އިއްޔެ ރޭ މާލޭގައި ހިނގި ނުރައްކާތެރި އެކްސިޑެންޓެއްގައި އަނިޔާވެގެން، ފަރުވާ ދެމުން ގެންދަނިކޮށް މިއަދު ނިޔާވީ މަޝްހޫރު ޓިކްޓޮކް ތަރި އައިޝަތު ނަޒްރާއެވެ.
ނަޒްރާ ނިޔާވީ ބާރު ސްޕީޑްގައި މާލޭގެ އަމީނީމަގުން ދަރުމަވަންތަ ހޮސްޕިޓަލާއި ދިމާ ބޮޑުތަކުރުފާނު މަގަށް ނިކުތް ސައިކަލެއް ކޮންޓްރޯލްނުވެ ގޮސް ދުވާ ޓްރެކް މައްޗަށް އަރައި ހިނގި އެކްސިޑެންޓެއްގައި ލިބުނު އަނިޔާއަށް ފަރުވާ ދެމުން ދަނިކޮށެވެ.
ނަޒްރާ އިނީ ބާރު ސްޕީޑްގައި ދުއްވާފައި ދިޔަ ސައިކަލްގެ ފަހަތުގައެވެ.
އެ ހާދިސާއާއި ބެހޭގޮތުން މީޑިއާތަކަށް މައުލޫމާތު ދެމުން ފުލުހުން ބުނީ، ކޮންޓްރޯލުން ނުވެގެން ގޮސް ދުވާ ޓްރެކް މައްޗަށް އެރި ސައިކަލް ދުއްވީ ލައިސަންސް ނެތް މީހެއް ކަމަށާއި އެއީ 24 އަހަރުގެ ދިވެހި ފިރިހެނެއް ކަމަށެވެ. ފުލުހުން ދަނީ މިހާރު އެ މައްސަލަ އިތުރަށް ތަހްގީގް ކުރަމުންނެވެ.
ނަޒްރާގެ މައްޗަށް ކުރެވޭ ކަށުނަމާދު އޮންނާނީ މިއަދު ޢަޞްރު ނަމާދަށް ފަހު މަސްޖިދުލް ތަޢާވުން (އާސަހަރާ މިސްކިތް) ގައެވެ.
ނަޒްރާއަކީ ދިވެހި ޓިކްޓޮކްގައި ގިނަ ބަޔަކު ދަންނަ މޫނެކެވެ. އެގޮތުން ޓިކްޓޮކްއިން ނަޒްރާގެ އެކައުންޓަށް ފްލޯ ކުރާ މީހުންގެ އަދަދު 17000 އަރައެވެ.
