އއ. ބޮޑުފޮޅަދޫ ކައުންސިލްގެ ރައީސް، ޝުޖާއު އާދަމް، ރައީސް ސޯލިހަށް ތާއިދުކޮށް އެމްޑީޕީއަށް ސޮއި ކުރައްވައިފިއެވެ.
ރައީސް ސޯލިހް ކެމްޕޭން ދަތުރުފުޅުގައި އއ.ގެ އަތޮޅުތަކަށް ކުރައްވާ ދަތުރުފުޅުގެ ތެރެއިން ބޮޑުފޮޅަދޫއަށް މިއަދު ވަޑަިއގަތުމުން ޝުޖާއު ވަނީ އެމްޑީޕީއަށް ސޮއި ކުރައްވައި ފޯމު ހަވާލު ކުރައްވާފައެވެ.
ޝުޖާއުގެ އިތުރުން ވެސް ޕީޕީއެމްގެ ފަރާތުން ކައުންސިލް ގޮނޑިއަށް ހޮވިވަޑައިގަތް މުހައްމަދު ނާޝިދު ވެސް މިއަދު ވަނީ އެމްޑީޕީއަށް ސޮއި ކުރައްވައި ފޯމު ރައީސް އާއި ހަވާލު ކުރައްވާފައެވެ.
ޝުޖާއު ކައުންސިލްގެ ރައީސް ކަމަށް ހޮވިވަޑައިގަތީ މިނިވަން ކެނޑިޑޭޓެއްގެ ގޮތުގައެވެ.
މީގެ އިތުރުން އެރަށުން އަލަށް އެމްޑީޕީއަށް ސޮއި ކުރެއްވި 63 މެމްބަރުންގެ ފޯމު ވެސް ވަނީ އެމަނިކުފާނަށް އަރުވާފައެވެ.
ބޮޑުފޮޅަދޫ ކައުންސިލްގެ ރައީސް އާއި އިތުރު މެމްބަރަކު އެމްޑީޕީއަށް ސޮއި ކުރެއްވުމުން މިހާރު އެރަށު ކައުންސިލްގެ މެޖޯރިޓީ އޮތީ އެމްޑީޕީގައެވެ. އެއީ އެމްޑީޕީގެ ތިން މެމްބަރުންނެވެ. ދެން ކައުންސިލްގައި ތިއްބަވާ ދެ މެމްބަރުންނަކީ މިނިވަން ދެ ކައުންސިލަރުންނެވެ.
