މާލޭގެ ފިހާރައެއްގައި ރޭ ފަތިހު ރޯވެ އެއްކޮށް އަނދައި ހުލިވެއްޖެއެވެ. ފަތިހު 4:30 ހާއިރު ހިނގި އަލިފާނުގެ ހާދިސާގައި ރޯވީ ގަލޮޅު އޮޓޯ ގަރާޖު ސަރަހައްދުން ރަތްވިލާ ގޯޅީގައި ހުންނަ ވެގާ ޕޮއިންޓްގައެވެ.
ފުޅާ ދާއިރާއެއްގައި ރީޓެއިލް ވިޔަފާރި ހިންގާ ވެގާ ޕޮއިންޓް ވަނީ މި އަލިފާނުގެ ހާދިސާގައި އެއްކޮށް އަނދައި އަޅިއަށް ވެފައެވެ.
އެމްއެންޑީއެފް އިން ވިދާޅުވީ، ރަތްވިލާގޯޅީގައި ހުންނަ “ވެގަ ޕޮއިންޓް” ފިހާރައިގައި އަލިފާނުގެ ހާދިސާއިން ހިނގައިގެން އެމްއެންޑިއެފް އަށް ލިބުނު ރިޕޯޓަކާއި ގުޅިގެން ރޭ ހަރަކާތްތެރިވެފައިވާ ކަމަށެވެ.
އެ މައުލޫމާތު އެމްއެންޑިއެފް އަށް ލިބުނީ 4:37 ހާއިރު ކަމަށްވެސް ވިދާޅުވިއެވެ. އަދި އަލިފާންގަނޑު ކޮންޓްރޯލް ވެފައި ވަނީ އެއް ގަޑިއިރު ފަހުން 5:45 ހާއިރުއެވެ.
އަލިފާންގަނޑު އެއްކޮށް ނިއްވާލެވިގެން އެމްއެންޑީއެފް އިން ރިޕޯޓް ކޮށްފައި ވަނީ މިއަދު ހެނދުނު 6:41 ހާއިރުއެވެ. އަދި ފިހާރައިގައި ހުރި ހުރިހާ މުދަލެއް އަނދަފައިވާ ކަމަށްވެސް ވިދާޅުވިއެވެ. އަދި ފިހާރަ ކުރިމަތީގައި ހުރި 15 ވަރަކަށް ސައިކަލުވެސް އަނދާފައިވާ ކަމަށްވެސް އެމްއެންޑީއެފް އިން ވިދާޅުވިއެވެ.
އެމްއެންޑީއެފް އިން ހިިއްސާ ކުރި މައުލޫމާތަށް ބަލާއިރު، މި ހާދިސާގައި އެއްވެސް މީހަަކަށް އަނިޔާ ވެފައެއް ނުވެއެވެ.
