ފުނަދޫ ކައުންސިލްގެ ފަރާތުން 2012 ވަނަ އަހަރުން ފެށިގެން ބާވަމުން އަންނަ އިންޓަރ އޮފީސް ފުޓްސަލް މުބާރާތުގެ އަންހެން ޑިވިޒަންގެ ތަށި ފުނަދޫ އެއާޕޯޓްގެ ޓީމް އުފުލާލައިފިއެވެ.
ފުނަދޫގައި އަންހެން ފުޓްސަލްގެ ފޯރި ހިފާފައި ވުމާއެކު މިއަހަރު މުޅިންއަލަށްވަނީ އަންހެން ޑިވިޒަން ތައާރަފު ކޮށްފައެވެ.
މުޅި ޖުމުލަ 5 ޓީމް ބައިވެރި މި މުބާރަތުގެ ތަށި ފުނަދޫ އެއާޕޯޓް ޓީމް އުފުލާލީ މިރޭ ފުނަދޫ ފުޓްސަލް ދަނޑުގައި ކުޅެވުނު ފައިނަލް މެޗުގައި 2-5 ން ކާމިޔާބު ކޮށްގެންނެވެ. ފައިނަލް މެޗުގައި ވާދަކުރީ އެއާޕޯޓް އާއި ޕޮލިސް ލޭޑީޒްއެވެ.
ފޯރިގަދަ ކުޅުމެއް ފެނިގެން ދިޔަ މި މެޗުގައި ފުރަތަމަ ލަނޑުޖަހާ ކުރިހޯދީ ޕޮލިސް ލޭޑީޒްއިންނެވެ. އެއަށްފަހު ޖެހިޖެހިގެން ދެލަނޑުޖަހާ އެއާޕޯޓް ޓީމްވަނީ ނަތީޖާ އަނބުރާލާފައެވެ. ފުރަތަމަހާފުނިމުނީ 1-2ން އެއާޕޯޓް ކުރީގައި އޮވެގެންނެވެ. ދެވަނަހާފް ފަށައިގެން ޕޮލިސް ލޭޑީޒްއިން ކުޅުންވަރުގަދަކޮށް ގޯލެއްޖަހާ ނަތީޖާވަނީ ހަމަހަމަކޮށްފައެވެ. އޭގެ ކުޑައިރުކޮޅެއްފަހުން އެއާޕޯޓް ޓީމުންވަނީ ރީތި ޕާސްތަކަކާއިއެކު ގޯލެއްޖަހާ ނަތީޖާ3-2ށް ބަދަލުކޮށްލާފައެވެ. ދެންފެނިގެންދިޔައީ ޕޮލިސް ލޭޑީޒްއަށް ހަމަޖެހިނުލެވިގެން އުޅެނިކޮށް މެޗްގައި މޮޅުކުޅުމެއް ދައްކަމުންދިޔަ ޝަރުމީލާ ގޯލެއްޖަހާ 4-2ށް ބަދަލުކޮށްލިތަނެވެ. އެއާޕޯޓް ޓީމުން ފުލުފުލުގައި އުފައްދަމުންދިޔަ ހަމަލާދަކުގެ ނަތީޖާއަކަށްވީ މެޗުނިމެން ކުޑަވަޤުތުކޮޅަކަށް ވެފައިވަނިކޮށް އިތުރު ގޯލެއްކާމިޔާބުކޮށް ނަތީޖާ 5-2ށް ބަދަލުކޮށްލެވުމެވެ.
ފައިނަލް މެޗަށްފަހު ވަނަވަނައަށްދިޔަ ޓީމުތަކަށް ވަނީ ވާދައިގެ ތައްޓާއި ފައިސާގެ އިނާމު ހަވާލުކޮށްފައެވެ. އިނާމްތައް ބައްސަވާދެއްވާފައިވަނީ ފުނަދޫ ސްކޫލްގެ ލީޑިންސ ޓީޗަރ އަލްފާޟިލާ މަރްޔަމް އަބްދުﷲ އާއި ބޭންކް އޮފް މޯލްޑިވްސްގެ ނޯރތު ކްލަސްޓަރ މެނޭޖަރ އަލްފާޟިލް ޙަސަން އަޤްލީމެވެ.
މުބާރާތުގައި ހޮވާފައިވާ ވަނަތައް:
• އެންމެ މޮޅު ކޯޗް: ފުނަދޫ އެއާޕޯޓް ޓީމުގެ ކޯޗް ހުސައިން ޝާފިއު
• އެންމެ މޮޅު ކީޕަރ: ފުނަދޫ އެއާޕޯޓް ޓީމުގެ ކީޕަރ އައިޝަތ ޝިފްލާ
• ޓޮޕް ސްކޯރަރ: ޕޮލިސް ލޭޑީޒްގެ ފާތިމަތު ފައިހާ
• އުންމީދީކުޅުންތެރިޔާ: ފުނަފަތި (އެސްއާރުސީ) ގެ ހައްވާ ނައުރާ
• ގޯލްޑެން ސްޓާރ ޕްލޭޔަރ: ފުނަދޫ އެއާޕޯޓް ޓީމުގެ އާމިނަތު އާދަމް
• މުޅި މުބާރާތުގެ އެންމެމޮޅު ކުޅުންތެރިޔާ: ފުނަދޫ އެއާޕޯޓް ޓީމުގެ ފާތިމަތު ޝަރުމީލާ
• ޗެމްޕިއަން ޓީމް: ފުނަދޫ އެއާޕޯޓް ޓީމު
• ރަނަރއަޕް ޓީމް: ޕޮލިސް ލޭޑީޒް
• ފެއަރޕްލޭ ޓީމް: މަގޭސާފު ފުނަދޫ (ށ. ފުނަދޫ ކައުންސިލް)
ފޮޓޯ: ފުނަދޫ ސްޕޯރޓްސް އަދި އިންޓައޮފީސް ފުޓްސަލް ޓޯނަމެންޓް
