އިދިކޮޅު ޕާޓީއެއްގެ ގޮތުގައި ސަރުކާރު ޒިންމާދާރު ކުރުވުމުގައި އެމްޑީޕީ ދެމި އޮންނާނެ އެ ޕާޓީގެ ޗެއާޕާސަން ފައްޔާޒް އިސްމައިލް ވިދާޅުވެއްޖެ އެވެ.
ފައްޔާޒް މިހެން ވިދާޅުވީ، އިއްޔެ ބޭއްވުނު ރިޔާސީ އިންތިހާބުން އެމްޑީޕީއަށް ނާކާމިޔާބީ ލިބިވަޑައިގަތުމާއި ގުޅިގެން، އިންތިހާބު ކާމިޔާބުކުރެއްވި އިދިކޮޅު ޕީއެންސީ ކެންޑިޑޭޓަށް މަރުހަބާ ދެންނެވުމަށް ކުރެއްވި ޓްވީޓެއްގައެވެ.
އިންތިހާބީ ރައީސް ޑރ. މުއިއްޒާއި އެމަނިކުފާނުގެ ރަނިންމޭޓް ހުސައިން މުހައްމަދު ލަތީފަށް މަރުހަބާ ދަންނަވާ ފައްޔާޒް ވިދާޅުވީ އިދިކޮޅު ޕާޓީއެއްގެ ގޮތުގައި ސަރުކާރު ޒިންމާދާރުކޮށް ޑިމޮކްރެސީގެ ހަމަ ހިފަހައްޓާތޯ ބެލުމުގައި އެމްޑީޕީ ދެމި އޮންނާނެ ކަަމަށެވެ.
އިއްޔެ ބޭއްވުނު ރިޔާސީ އިންތިހާބު ޑރ. މުއިއްޒު ކާމިޔާބުކުރެއްވީ 128،775ވޯޓު ހޯއްދަވައިގެންނެވެ. އެއީ 54 ޕަސެންޓް ވޯޓެވެ. މިއިންތިހާބުގައި މުއިއްޒުއާ ވާދަކޮށް ރައީސް ސޯލިހު އަށް ލިބިވަޑައިގެންނެވީ 109،547 ވޯޓެވެ. އެއީ 46 ޕަސެންޓް ވޯޓެވެ.
