ށ. ފުނަދޫ ކައުންސިލްގެ އަންހެން މެންބަރުގެ ގޮނޑި އިންތިހާބާ ނުލާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކެންޑިޑޭޓް ކާމިޔާބު ކޮށްފިއެވެ.
އިލެކްޝަންސް ކޮމިޝަނުން ބުނެފައިވަނީ ޖޫން 08 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ށ. ފުނަދޫ ކައުންސިލްގެ އަންހެން މެންބަރު އިންތިޚާބު ކުރުމަށް ބާއްވާ ބައި-އިލެކްޝަނަށް ކެންޑިޑޭޓުންގެ ގޮތުގައި ކުރިމަތިލުމަށް ދީފައިވާ މުއްދަތު ހަމަވިއިރު، ކުރިމަތިލާފައިވަނީ އެންމެ ކެންޑިޑޭޓެއް ކަމަށެވެ.
ފުނަދޫ ކައުންސިލްގެ އަންހެން މެންބަރުގެ ގޮނޑިއަށް ވާދަކޮށްފައިވަނީ ޕީއެންސީގެ ޓިކެޓުގައި އާމިނަތު ޔުމްނާ މާބަގީޗާގެ / ށ. ފުނަދޫ އެވެ.
އެހެންކަމުން އިލެކްޝަންސް ކޮމިޝަނުން ވަނީ ޕީއެންސީގެ ކެންޑިޑޭޓް އިންތިހާބުވެފައިވާކަން އިއުލާނު ކޮށްފައެވެ.
މި ބައި އިލެކްޝަންގައި އެމްޑީޕީން ވާދަކޮށްފައިނުވާއިރު އެންމެ ފަހުން ބޭއްވި ކައުންސިލްތަކުގެ ބައިއިލެކްޝަންތަކުގެ ގިނަ ގޮނޑިވެސް ކާމިޔާބު ކޮށްފައިވަނީ ޕީއެންސީންނެވެ.
