މައުލޫމާތު ލިބިފައިވާ ގޮތުގައި ހާމިދު ނިޔާވީ މިއަދު ހެނދުނުގެ ވަގުތެއްގައި އިންޑިއާގަ އެވެ. ނިޔާވި ސަބަބެއް އަދި ނޭނގެ އެވެ.
ހާމިދަކީ ކުރީގެ ފިޝަރީޒް މިނިސްޓަރު އަހްމަދު ޝަފީއު އާއި އޭސީސީގެ ކުރީގެ ރައީސް މުހައްމަދު ޝަފީއުގެ ކޮއްކޮ އެވެ.
އޭނާ ރައީސް އޮފީހުގެ ޗީފް ޓެކްނޮލޮޖީ އޮފިސަރުގެ މަގާމަށް އައްޔަން ކުރެއްވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 2019ގަ އެވެ. އެ މަނިކުފާނުގެ ވެރިކަން ނިމެންދެން އޭނާ ހުންނެވީ އެ މަގާމުގަ އެވެ.
އިނގިރޭސިވިލާތުން ކޮމްޕިއުޓާ ސައިންސްގެ ރޮނގުން ބެޗެލާ އޮފް ސައިންސް ޑިގްރީއެއް ހާސިލް ކުރައްވާފައިވާ ހާމިދަކީ ނުޓަނިކްސް ސަޕޯޓް ސްޕެޝަލިސްޓެއްގެ އިތުރުން ސިސްކޯ މެރާކީ ސަޕޯޓް ސްޕެޝަލިސްޓެކެވެ.
ހާމިދު ކުރިން ވަނީ 1998 އިން ފެށިގެން 2007 އާ ހަމައަށް ރައީސް އޮފީހުގެ އިންފޮމޭޝަން ޓެކްނޮލޮޖީ ޑިޕާޓްމެންޓުގައި ވެސް މަސައްކަތް ކުރައްވައިފަ އެވެ.
