ހަނިމާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީންވަނީ ހަނިމާދޫ ސްކޫލްއަށް އިއްޔެ ފެންކޫލަރެއް ހަދިޔާކޮއްދެއްވާފައެވެ.
ކޫލަރު ހަވާލު ކޮށްފައި ވަނީ ހަނިމާދޫ ސްކޫލްގެ ގޯތިތެރޭގައެވެ. ކޫލަރު ހަވާލު ކޮށްދެއްވާފައި ވަނީ ހަނިމާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސާ އާއިޝަތު ޝިއުނީ އެވެ. ކޫލަރާއި ހަވާލުވެފައި ވަނީ ހަނިމާދޫ ސްކޫލްގެ ފަރާތުން ޕްރިންސިޕަލް އަބްދު ﷲ ނާހިދެވެ.
ހަނިމާދޫ ސްކޫލަށް މީގެ އަހަރެއް ކުރިންވެސް ވަނީ ހަނިމާދޫ ކައުންސިލްގެ ފަރާތުން ފެން ކޫލަރެއް ހަވާލު ކޮށްފައެވެ. އެހެންކަމުން މިއަކީ ހަނިމާދޫ ސްކޫލަށް ހަދިޔާކުރެވުނު ދެވަނަ ފެން ކޫލަރެ އެވެ. މީގެ ސަބަބުން ދަރިވަރުންނާއި މުދައްރިސުންނަށް ރައްކާތެރި ބޯފެން ފޯރުކޮށްދިނުމުގެ ޔަގީންކަން ލިބިގެންދާނެއެވެ.
މީގެ ކުރިންވެސް ހަނިމާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ އެކި ގޮތްގޮތުން ހަނިމާދޫ ސްކޫލްއަށް އެހީތެރިކަން ފޯރުކޮށްދިީފައެވެ.
