އެޑިޓޯރިއަލްގެ ބަސް: މި ލިޔުން ތައްޔާރުކުރީ އީނާން ޢަބްދުالله އަދި އަޒްހާ އަހުމަދު ޙަސަން އެވެ. _____________________________
މި ދިއަ އޮގަސްޓް މަހު 26 ން 30 ށް ކުޅުދުއްފުށި ސިޓިގައި ކުރިއަށް ދިޔަ ތިލަދުންމަތީ ދެވަނަ ފެތުމުގެ މުބާރާތް ކާމިޔާބު ކަމާއިއެކު ނިންމާލުމަށްފަހު ހަނިމާދޫ ސްކޫލުގެ ސްވިމިންގ ޓީމް އެނބުރި ރަށަށް އައުމުން، މިދަރިވަރުންނަށް ހަނިމާދޫ ސްކޫލްގެ ފަރާތުން ވަނީ ވަރަށް ހޫނު މަރުޙަބާއެއް ކިޔާފައެވެ.
މިއީ ސްވިމިންގ މުބާރާތެއްގައި ހަނިމާދޫ ސްކޫލުން ބައިވެރިވި ފުރަތަމަ ފަހަރެވެ. ހަނިމާދޫ ސްކޫލްގެ ދަރިވަރުން މިމުބާރާތުގެ އެކި އުމުރުފުރާތަކުން އެކިއެކި އިވެންޓް ތަކުގައި ބައިވެރިވެ އެކަށީގެންވާ ކާމިޔާބުތަކެއް ވަނީ ހޯދާފައެވެ.
ތިލަދުންމަތީ ސްކޫލް ކުދިންގެ ފެތުމުގެ 2ވަނަ މުބާރާތުގެ 14 އަހަރުން ދަށުގެ ބައިން 50 މީޓަރ ފްރީސްޓައިލް އިން 3 ވަނަ ހަނިމާދޫ ސްކޫލްގެ ﷲޢަބުދު އަޒީން މުޙައްމަދު ވަނީ ހޯދައިފައެވެ. ޢަޒީން ރޭސް ނިންމީ 35.18 ސިކުންތުންނެވެ. މި ބައިން ލޯ މެޑަލް ހޯދީ ޢަޒީނެވެ.
12 އަހަރުން ދަށުގެ ޓީމްވަނީ 100 މީޓަރ ރިލޭ ފައިނަލަށް ދަތުރުކޮށް 3 ވަނަ ޙާޞިލް ކޮށްފައެވެ. 1 މިނެޓް 30 ސިކުންތުން ރޭސް ނިންމައި ލޯ މެޑަލް ޙާޞިލް ކޮށްފައިވަނީ އަލްޔާން ރަޝީދު، މުޙައްމަދު އަދްޔާން އާދަމް، އިބްރާހީމް ނަޝްރީ މުޙައްމަދު، ބިލާލް ބިން މަސްޢޫދު، މުޢާޒް ބިން ޢަބްދުއްރަޙީމް އަދި ޔޫނުސް ބިން ޔޫސުފްއެވެ.
ކުޅުދުއްފުށި ސްވިމިންގ ޓްރެކްގައި ކުރިއަށް ދިއަ މި މިމުބާރާތުގެ ބޮޑުތިލަދުންމަތީގެ 3 އަތޮޅުގެ 16 ސްކޫލަކުން 420 ދަރިވަރުން ވަނީ ބައިވެރި ވެފައެވެ. ހަނިމާދޫ ސްކޫލް ޖުމުލަ 20 ބައިވެރިން ބައިވެރިވެފައިވެއެވެ.
16 އަހަރުން ދަށުގެ 50 މީޓަރ ފްރީ ސްޓައިލްގެ ބައިން ހަނިމާދޫ ސްކޫލްގެ 2 ދަރިވަރުން ވާދަކުރިއެވެ. އެއީ އިސްމާޢީލް ސަމީޙް އިބްރާހީމް ޝަހުދީ އާއި، ޝައިމަން އިބްރާހީމް އެވެ.
މި ދެކުދިންގެ ތެރެއިން 34.16 ސިކުންތުން ރޭސް ނިންމާ އިސްމާޢީލް ސަމީހް ވަނީ 5 ވަނަ ހޯދާފައެވެ. އަދި 34.23 ސިކުންތުން ރޭސް ނިންމާ ޝައިމަން އިބްރާހީމް ވަނީ 6 ވަނަ ހޯދާފައެވެ.
16 އަހަރުން ދަށުގެ ބައިން 200 މީޓަރ ފްރީ ސްޓައިލް އިން ހަނިމާދޫ ސްކޫލް ރިލޭ ޓީމް ފައިނަލުން ޖާގަ ހޯދައި 2 މިނިޓް 41 ސިކުންތުން ނިންމައި 7 ވަނަ ވަނީ ހޯދާފައެވެ.
14 އަހަރުން ދަށުގެ 100 މީޓަރ ފްރީ ސްޓައިލް ރިލޭގެ ފައިނަލުން ޖާގަހޯދައި ހަނިމާދޫ ސްކޫލްގެ ޓީމް ވަނީ 1 މިނެޓް 14 ސިކުންތުން ނިންމާ 5 ވަނަ ހޯދފައެވެ. 12 އަހަރުން ދަށުގެ ޓީމް ވަނީ 100 މީޓަރ މެޑްލޭ ރިލޭ ފައިނަލަށް ދަތުރު ކޮށްފައެވެ. ދެވަނައަށް ނިމުނުކަމުގައި ވީނަމަވެސް ވަނީ ޑިސްކޮލިފައި ވެފައެވެ.
14 އަހަރުން ދަށުގެ ބައިން އިޔާދު ޙަސަންއިބާދު ވަނީ 50 މީޓަރ ބްރެސްޓް ސްޓްރޯކް ފަިނަލަށް ދަތުރުކޮށް 1 މިނެޓް 7 ސިކުންތުން 6 ވަނަ ހޯދާފައެވެ. 12 އަހަރުން ދަށުގެ ބައިން މުޢާޒް ބިން ޢަބްދުއްރަޙީމް ވަނީ 50 މީޓަރ ބްރެސްޓް ސްޓްރޯކްގެ ފައިނަލަށް ދަތުރުކޮށް 1 މިނެޓް 7 ސިކުންތުން 6 ވަނަ ހޯދާފައެވެ.
25 މީޓަރ ބްރެސްޓް ސްޓްރޯކް ފައިނަލްގައި ﷲޢަބްދު އަޒީން މުޙައްމަދުވަނީ 22.31 ސިކުންތުން 5ވަނަ ހޯދާފައެވެ. އަދި މީގެ އިތުރުން 25 މީޓަރ ބަޓަރފްލައި ފައިނަލްގައި ﷲޢަބްދު އަޒީން މުޙަންމަދު ވަނީ 20.6 ސިކުންތުން 4 ވަނަ ޙާޞިލް ކޮށްފައެވެ.
