އިއްޔެ ހަވީރު ތިލަދެކުނު ފުޓްބޯޅަ މުބާރާތުގައި ސާއްބަ ކުޅުނު ދެވަނަ މެޗުގައި، އިންފިނިޓީ އެކަޑަމީގެ ޖާޒީ ނަންބަރު 17 ރައިޝާން ވަނީ ފުރަތަމަ ލަނޑު ޖަހައި، އެ ޓީމަށް ކުރި ހޯދައިދީފައެވެ. މެޗުގެ 30 ވަނަ މިނެޓުގައި ރައިޝާން އިތުރު ލަނޑެއް ޖަހައި، އިންފިނިޓީގެ ލީޑު ފުޅާކޮށް، ސާއްބަ ޕްރެޝަރަށް ވައްޓާލިއެވެ.
އެހެންނަމަވެސް، ފުރަތަމަ ހާފު ނިމުމުގެ ކުރިން ސާއްބައިން ވަނީ ލަނޑެއް ޖަހައި ފަރަގު ކުޑަކޮށް، އުއްމީދު އައުކޮށްފައެވެ. މި ލަނޑު ސާއްބައަށް ކާމިޔާބު ކޮށްދިނީ އެ ޓީމުގެ ފޯވަޑް އަލީ ޙުސައިން (ދަގަނޑޭ) އެވެ. މިއީ އިންފިނިޓީން ކުރި ފައުލަކާއި ގުޅިގެން ލިބުނު ޕެނަލްޓީއަކުން ދަގަނޑޭ ކާމިޔާބުކުރި ލަނޑެކެވެ.
ފުރަތަމަ ހާފު ނިމުނުއިރު 2-1 އިން ކުރީގައި އޮތީ އިންފިނިޓީ އެވެ. ދެވަނަ ހާފުގައި ހަނިމާދޫގެ ސާއްބައިން ކުޅުން ރަނގަޅުކޮށް، މެޗުގެ 87 ވަނަ މިނެޓުގައި ޖާޒީ ނަންބަރު 21 މުޙައްމަދު ނާފިޒު ވަނީ މެޗުގެ ނަތީޖާ ހަމަހަމަކޮށްފައެވެ. މި މެޗުގެ އެންމެ މޮޅު ކުޅުންތެރިޔާގެ މަޤާމަށް ހޮވުނީ މޫސާ ކައުޔާޝް ކައިލްއެވެ.
ސާއްބަގެ ކުރިއަށް އޮތް މެޗު ކުޅޭނީ މި މަހުގެ 16 ވަނަ ދުވަހު ކުޅުދުއްފުށީ ހިރަފުސް ސްޕޯޓްސް ކްލަބާ ދެކޮޅަށެވެ. މިއީ ގުރޫޕް ސްޓޭޖްގައި ސާއްބަ ކުޅޭނެ ފަހު މެޗެވެ.
