ފުލުހުން ބުނީ ނުރައްކާތެރިކޮށް ލޯންޗުތަކެއް ދުއްވި މައްސަލަ ސޯޝަލް މީޑިއާ އިން ފުލުހުންގެ ސަމާލުކަމަށް އައިސްފައިވާ ކަމަށެވެ.
އެ މައްސަލައާ ގުޅިގެން އަދި މިހާތަނަށް މީހަކު ހައްޔަރެއް ނުކުރާ ކަމަށާއި މައްސަލަ ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
ފުލުހުން ބުނީ، އެ ވީޑިއޯ އިން ފެންނަނީ 13 އޮގަސްޓުގައި އއ. އަތޮޅަށް ދަތުރުކުރި ލޯންޗުތަކެއް ކަމަށް، މިހާތަނަށް ބެލި ބެލުމުން އެނގިފައިވާ ކަމަށެވެ.
ސޯޝަލް މީޑިއާގައި ދައުރުވާ ވީޑިއޯއިން ފެންނަނީ، ދެ ލޯންޗެއް ރޭސް ޖަހާ ގޮތަށް ބާރު ސްޕީޑްގައި ދުއްވާފައި އައިސް ބަނދަރަށް ވަންނަ މަންޒަރެވެ.
ވީޑިއޯއިން ފެންނަ ގޮތުން، އޭގެ ތެރެއިން “ނަސްރު” ނަމަކަށް ކިޔާ ލޯންޗު ވަކި ހިސާބަކުން ދުވެލި ބާރުކޮށް، “ރިލެކްސް ގޯލްޑް” ނަމަކަށް ކިޔާ ލޯންޗަށް ވުރެ ކުރި އަރައިގެން ގޮސް ބަނދަރަށް ވަދެ އެވެ. ލޯންޗުގެ ސްޕީޑް މަޑުކުރީ ވެސް ނެރު ކައިރިންނެވެ.
އެ ލޯންޗުތަކުގެ ފަހަތުން “ރަމްޒު ކުއީން” ލޯންޗް ވެސް ވަންނަތަން ވީޑިއޯއިން ފެނެ އެވެ.
އެ ތިން ލޯންޗު ރޭސް ޖަހާ އިތުރު ވީޑިއޯ ވެސް ޓިކްޓޮކްގައި އެބަހުއްޓެވެ.
