ހަނިމާދޫ ސާއްބަ އެކުވެރި ކުލަބުގެ ފަރާތުން ކުރިއަށް ގެންދާ ސާއްބަ އެނިވާސަރީ ކަޕް 2020 ފުޓްބޯޅަ މުބާރާތުގެ ތިންވަނަ މެޗު، ފޯރިގަދަ ކުޅުމަކަށް ފަހު “ޝީލްޑް” ކާމިޔާބުކޮށްފިއެވެ.
މިއަދު ހަވީރު ހަނިމާދޫ ރަސްމީ ފުޓްބޯޅަ ދަނޑުގައި ކުޅުނު މެޗުން ޝީލްޑް މޮޅުވީ “ރޫހް” އާ ބައްދަލުކޮށް 3-2 ގެ ނަތީޖާ އަކުންނެވެ.
މި މެޗުގައި ފުރަތަމަ ލަނޑު، މެޗުގެ 10 ވަނަ މިނެޓުގައި ޖަހާފައި ވަނީ ރޫހުންނެވެ. މިގޮތުން މެޗުގެ ފުރަތަމަ ލަނޑު ކާމިޔާބު ކޮށްދީފައިވަނީ އެ ޓީމުގެ ޖޯޒީ ނަންބަރު 42 ޢަބްދު ﷲ ޝާކިރެވެ. މެޗުގެ ފުރަތަމަ ހާފު 1-0 ކުން ނިމެން ދަނިކޮށް ޝީލްޑުން ވަނީ ކައިރި ކައިރީ ދެ ލަޑު ޖަހާ ނަތީޖާ އަނބުރާލާފައެވެ. ޝީލްޑުގެ ފުރަތަމަ ލަޑު މެޗުގެ 44 ވަނަ މިނެޓުގައި ކާމިޔާބު ކޮށްދިނީ ޖޯޒީ ނަންބަރު 7 ޙުސެއިން ޝަރީފެވެ. ދެވަނަ ލަޑު 45 ވަނަ މިނެޓުގައި ކާމިޔާބު ކޮށްދިނީ ޖޯޒީ ނަންބަރު 11 އާސިފް ސަލީމެވެ.
މެޗުގެ ދެވަނަ ހާފުގައިވެސްް ފެނިގެން ގޮސްފައިވަނީ ފޯރިގަދަ ވާދަވެރި ކުޅުމެކެވެ. މެޗުގެ ދެވަނަ ހާފުގައި ރޫހުން ނަތީޖާ ހަމަހަމަ ކުރި ލަނޑު ޖަހާދީފައިވަނީ 54ވަނަ މިނެޓުގައި ޖޯޒީ ނަންބަރު 05 އަލީ ރަމީޒެވެ. ނަތީޗާ ހަމަހަމަ ކުރިތާ ގިނަ ވަގުތުތަކެއްނުވަނީސް ޝީލްޑުންވަނީ ލަނޑުޖަހާ ދެވަނަ ފަހަރައް މެޗުގެ ލީޑްނަގާފައެވެ. މިލަނޑު އެޓީމައް ކާމިޔާބުކޮއްދިނީ، މެޗުގެ 60ވަނަ މިނެޓުގައި ޖޯޒީ ނަންބަރު 14 އަހުމަދު މުޖުޠަބާއެވެ. މިލަނޑާއެކު މެޗު ނިމިގެން ދިޔައީ 2-3 ކުން ޝީލްޑް ކުރީގައި އޮވެގެންނެވެ.
މެޗުގެ މޮޅު ކުޅުންތެރިއަކަށް ހޮވިފައިވަނީ ޝީލްޑަށް ފުރަތަމަ ލަނޑު ކާމިޔާބު ކޮށްދިން އެޓީމުގެ ޖޯޒީ ނަންބަރު 7 ހުސެއިން ޝަރީފެވެ.
މި މުބާރާތުގެ މެޗެއް މާދަމާވެެސް އޮންނާނެއެވެ. ބައްދަލު ކުރާނީ ޔޫތު ފުރެންޑްސް އާއި އަހުލީއެވެ. މެޗު ކުޅުމަށް ހަމަޖެހިފައިވަނީ ހަނިމާދޫ ރަސްމީ ބޯޅަދަނޑުގައި މާދަމާ 15:50 ގައެވެ.
