ހަންގޭރީގައި ކުރިއަށްދިޔަ ހާޖޮސް އަލްފްރެޑް ކުޕާ 3 ގައި ދިވެހި ފެތުންތެރިޔާ ޙަމްނާ އަޙްމަދު ވަނީ އަންހެނުންގެ ޝޯޓްކޯސް 100 މީޓަރު އަދި 50 މީޓަރު ބްރެސްޓް ސްޓްރޯކްގެ ޤައުމީ ރެކޯޑު އާކޮށްފައެވެ.
ޙަމްނާ 100 މީޓަރު ބްރެސްޓް ސްޓްރޯކް ރޭސް ނިންމީ 1 މިނެޓާއި 23.76 ސިކުންތުންނެވެ. މިއީ 2019 ވަނަ އަހަރު ބޭއްވުނު 13 ވަނަ ސައުތު އޭޝިއަން ގޭމްސްގައި އައިޝަތު ސާޖިނާ ކަނޑައެޅި 1 މިނެޓާއި 23.81 ސިކުންތުގެ ރެކޯޑަށްވުރެ 0.05 ސިކުންތު އަވަސް ރެކޯޑެކެވެ.
މީގެ އިތުރުން، ޙަމްނާ ވަނީ 50 މީޓަރު ބްރެސްޓް ސްޓްްޓް ސްޓްރޯކްގެ ރެކޯޑުވެސް އާކޮށްފައެވެ. އޭނާ މި ރޭސް ނިންމީ 37.13 ސިކުންތުންނެވެ. މިއީ މިދިޔަ އަހަރު ހަންގޭރީގައި ބޭއްވުނު އެ ޤައުމުގެ ޝޯޓްކޯސް ޤައުމީ މުބާރާތުގައި ޙަމްނާ އަމިއްލައަށް ކަނޑައެޅި 37.88 ސިކުންތުގެ ރެކޯޑަށްވުރެ 0.75 ސިކުންތު އަވަސް ރެކޯޑެކެވެ.
މި ދެ ރެކޯޑު އާކުރުމާއެކު، ޙަމްނާ ވަނީ ދިވެހި ފެތުމުގެ ތާރީޚުގައި އަނެއްކާވެސް އައު ސަފުހާއެއް ލިޔެފައެވެ. މި ކާމިޔާބީއަކީ ޙަމްނާގެ މިހާރުގެ ފޯމާއި، އޭނާ ކުރަމުންދާ މަސައްކަތުގެ ހެއްކެއް ކަމުގައި ފެތުމުގެ ދާއިރާގެ ތަޖުރިބާކާރުން ފާހަގަކުރެއެވެ.
