ދިވެހިރާއްޖޭގެ ކޮންމެ އަތޮޅެއްގައި ތެޔޮ ރައްކާކުރެވޭނެ ނިޒާމެއް ޤާއިމްކުރުމުގެ މަޝްރޫޢު މިއަދު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އިފްތިތާޙްކުރައްވައިފި އެވެ.
މި މަޝްރޫޢުގެ މައިގަނޑު އަމާޒަކީ 2026 ވަނަ އަހަރުގެ ފެބްރުއަރީ މަހުގެ ކުރިން ރާއްޖޭގެ ހުރިހާ އަތޮޅެއްގައި ފިއުލް ސެޓަޕް ޤާއިމްކޮށް، މަސްވެރިންނާއި ޢާންމު ރައްޔިތުންނަށް ތެޔޮ ލިބޭނެ ނިޒާމެއް ޤާއިމްކުރުމެވެ.
ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ)ގެ މެނޭޖިންގ ޑިރެކްޓަރ ޝިމާދު އިބްރާހިމް ވިދާޅުވި ގޮތުގައި، މިހާރުވެސް ހުޅުމާލެ، ޅ. ފެލިވަރު އަދި ގއ. ކޫއްޑޫގައި މި ނިޒާމު ޤާއިމްކުރެވި، ހެޔޮ އަގުގައި ތެޔޮ ފޯރުކޮށްދެމުންދެ އެވެ. އަދި 2025 ވަނަ އަހަރުގެ ފެބްރުއަރީ މަހާ ހަމައަށް އައްޑޫ ސިޓީ ހުޅުމީދޫގައި މި ނިޒާމު ޤާއިމްކުރުމަށް ވަނީ ރޭވިފަ އެވެ.
މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވި ގޮތުގައި، މި މަޝްރޫޢަކީ ރައީސުލްޖުމްހޫރިއްޔާގެ ރިޔާސީ ވަޢުދެއް ފުއްދުމުގެ ގޮތުން ކުރިއަށްގެންދާ މަޝްރޫޢެކެވެ. އަދި މަސްވެރި ސިނާޢަތުގައި ހުރި ގޮންޖެހުންތަކަށް ދާއިމީ ޙައްލެއް ހޯދުމަކީ ސަރުކާރުގެ އަމާޒެއްކަމުގައި އެމަނިކުފާނު ފާހަގަކުރެއްވި އެވެ.
މި މަޝްރޫޢުގެ ދަށުން، 2025 ވަނަ އަހަރުގެ އޮކްޓޯބަރު މަހުގެ ނިޔަލަށް ހއ. އިހަވަންދޫ، ހދ. ހަނިމާދޫ، ފ. ނިލަންދޫ، ގދ. ފަރެސްމާތޮޑާ އަދި ފުވައްމުލައް ސިޓީގައި މި ނިޒާމު ޤާއިމްކުރުމަށް ވަނީ ރޭވިފަ އެވެ. އަދި 2026 ވަނަ އަހަރުގެ ފެބްރުއަރީ މަހުގެ ނިޔަލަށް އިތުރު 10 ރަށެއްގައި މި ނިޒާމު ޤާއިމްކުރެވޭނެ އެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފާއި ސަރުކާރުގެ ބައެއް ވަޒީރުންނާއި އިސްވެރިން ބައިވެރިވެވަޑައިގެންނެވި އެވެ.
