ހުޅުމާލޭގައި ކާރެއް ތެރޭގައި ދިވެހި ފިރިހެނަކު ރަހީނު ކުރި މައްސަލައިގައި އިތުރު ހަތަރު މީހުން ހައްޔަރު ކޮށްފައިވާ ކަމަށް ފުލުހުން ވިދާޅުވެއްޖެއެވެ.
ރޭ ހުޅުމާލެ އޯކިޑްމާ ހިނގުމުގައި ކާރެއް ތެރޭ ދިވެހި ފިރިހެނަކު ރަހީނުކޮށް ހިފަހައްޓައި، އަނިޔާކޮށް ބިރުދައްކައި، އެ މީހާގެ އާއިލާ މީހުންނަށް ގުޅައި ފައިސާއަށް ޑިމާންޑް ކުރި މައްސަލައާއި ގުޅިގެން އެންމެ ފުރަތަމަ ހައްޔަރު ކޮށްފައިވާ ކަމަށް ފުލުހުން ބުނެފައިވަނީ އެންމެ މީހެކެވެ. އެއީ މާލެ، ދަފްތަރު ނަންބަރު ރސ 9022، ޠަލާލް މުސާ (37އ)އެވެ.
އޭގެ ފަހުން އަނެއްކާ ވެސް ފުލުހުން މީޑިއާތަކަށް ފޮނުވި މެސެޖެއްގައި ވިދާޅުވީ، ޠަލާލް މޫސާއާއި އެކީ ސީނުން އިތުރު ހަތަރު މީހުން ހައްޔަރު ކޮށްފައިވާ ކަމަށެވެ. އެއީ ހދ. ކުމުންދޫ، ރަތްބަގީޗާގެ، ހުސާމް އިބްރާހިމް (34އ)، މާލެ، ގ. ކަޅަގާރިމާނގެ، ހުސެއިން ހައިކަލް ނިޔާޒް (23އ)، ހދ. ކުމުންދޫ، ރަތްބަގީޗާގެ، އާދަމް ޝަރީފް (36އ) ގެ އިތުރުން ހުޅުމާލޭ ފްލެޓް ނަންބަރު. 04-1-71، އަހުމަދު ރިޝްފާން (26އ) ކަމަށް ފުލުހުން ވިދާޅުވިއެވެ.
ފުލުހުން ވިދާޅުވީ، މި މައްސަލައާއި ގުޅިގެން ހައްޔަރު ކުރި 5 މީހުންގެ ބަންދާމެދު ގޮތެއް ނިންމުމަށް ހުޅުމާލޭ މެޖިސްޓްރޭޓް ކޯޓަށް ހާޒިރު ކުރުމުން އެންމެން ވެސް 7 ދުވަހަށް ބަންދު ކުރުމަށް އަމުރު ކޮށްފައިވާ ކަމަށެވެ. އަދި މިމައްސަލަ މިހާރު ތަހުގީގު ކުރަމުން އަންނަ ކަމަށް ވެސް ވިދާޅުވިއެވެ.
