ދިވެހި ފުލުހުންގެ ޚިދުމަތާއި ނެޝަނަލް ސެންޓަރ ފޯރ އިންފޯމޭޝަން ޓެކްނޮލޮޖީ (އެންސީއައިޓީ) ގުޅިގެން ކުރިއަށް ގެންދިއުމަށް ހަމަޖެހިފައިވާ ”ސައިބަރ އެކްސްޕޯ 2024” ގެ ވެބްސައިޓް ލޯންޗުކޮށްފިއެވެ.
އިސްކަންދަރު ބިލްޑިންގގައި ރޭ ބޭއްވި ރަސްމިއްޔާތުގައި މި ވެބްސައިޓް ލޯންޗުކޮށްދެއްވީ ދާޚިލީ ސަލާމަތާއި ފަންނިއްޔަތާ ބެހޭ ވަޒީރު ޢަލީ އިޙްސާންއެވެ.
މި ރަސްމިއްޔާތުގައި، ކޮމިޝަނަރ އޮފް ޕޮލިސް ޢަލީ ޝުޖާއު، ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހީމް ހިލްމީ، ފުލުހުންގެ އެގްޒެކެޓިވް ބައެއް އޮފިސަރުން އަދި އެހެނިހެން ބައެއް މުއައްސަސާތަކާއި ކުންފުނިތަކުގެ އިސްވެރިންނާއި ދައުވަތުއެރުވިގެން ވަޑައިގެންނެވި އެހެނިހެން ބޭފުޅުންނާއި ފުލުހުން ބައިވެރިވެލެއްވިއެވެ.
މި ރަސްމިއްޔާތު ޝަރަފުވެރިކޮށްދެއްވައި ދާޚިލި ސަލާމަތާއި ފަންނިއްޔަތާ ބެހޭ ވަޒީރު ދެއްކެވި ވާހަކަފުޅުގައި، ރާއްޖޭގެ ސައިބަރ ސްޕޭސްގެ ހާލަތު މިހާރު އޮތްގޮތް ވަޒަންކުރަންޖެހޭ ކަމަށް ވިދާޅުވިއެވެ. އެގޮތުން، މި ސަރުކާރާ ހަވާލުވެގެން އައި އިރު ސަރުކާރުގެ އެކި އިދާރާތަކަށް ސައިބަރ ތްރެޓްސް އައި މިންވަރާއި އަމިއްލަ ވިޔަފާރިތަކަށް ދޭތެރެ ދޭތެރެއިން ތްރެޓްސް އަންނަވަރު މިހާރުވެސް ވަޒަން ކުރަންޖެހޭ ކަމަށާއި ނެޝަނަލް ލެވެލްގައި މުޅި ސައިބަރ ސްޕޭސް މެނޭޖުކުރަން ޖެހޭކަމަށް ވެސް ވިދާޅުވިއެވެ.
މި ރަސްމިއްޔާތުގައި ކޮމިޝަނަރ އޮފް ޕޮލިސް ޢަލީ ޝުޖާއު ދެއްކެވި ވާހަކަފުޅުގައި، ”ސައިބަރ އެކްސްޕޯ 2024” އަކީ ޓެކްނޮލޮޖީގެ ގޮތުން ކުރިއަރަމުން އަންނަ ދުނިޔޭގައި، މި އިންޑަސްޓްރީގައި މަސައްކަތްކުރާ ފަރާތްތަކާއި، ކަމުވޮށިގެންވާ ފަރާތްތައް އެއްތަނަކުން ބައްދަލުވެ، ގުޅުން ބަދަހިކުރުމަށް ލިބުނު އައު ހިތްވަރަކަށް ވެގެންދާނެ ކަމަށް ޔަގީންކުރައްވާ ކަމަށް ވިދާޅުވިއެވެ. އަދި މިއަދު މި ދިވެހި މުޖުތަމައުގެ ހާލަތަށް ބަލާއިރު ސައިބަރ ކްރައިމްގެ ކުށްތައް ފުޅާވަމުންދާ ދިއުން ހުއްޓުމަކަށް ގެންނަންޖެހޭ ކަމަށް ވިދާޅުވިއެވެ.
“މިއަދު ހުރިހާ މަސައްކަތްތަކެއް ވެސް ޑިޖިޓަލްކޮށް ކުރެވެމުންދާއިރު، މުޖުތަމައުގައި ދިރިއުޅޭ ފަރުދުން ސައިބަރ ކްރައިމްގެ ޝިކާރައަކަށް ވާހިނދު، ފޫނުބެއްދޭ ވަރުގެ އަގު ބޮޑެތި ގެއްލުން ލިބި ޑާޓާތައް ގެއްލިގެންދޭ. މިކަމުގެ ސަބަބުން ދިރިއުޅުމުގައި ތަކުލީފުތައް އުފަލަންޖެހޭ ފަހަރު ވެސް އާދޭ. އެހެންކަމުން މިކަން ހުއްޓުވުމަށް، އެންމެން އެކުގައި މަސައްކަތްކުރުމާއި، ގުޅިގެން މަސައްކަތްކުރުމަށް އިހަށްވުރެ އަދު މިވަނީ މުހިންމުވެފައި. އެގޮތުން އަމިއްލަ ކުންފުނިތަކާއި، ސަރުކާރުގެ އިދާރާތަކާއި، ތައުލީމާއި ތަރުބިއްޔަތުދޭ ތަންތަނުގެ މެދުގައި ގުޅުން ބަދަހިކުރުން ވަރަށް މުހިންމު.” ކޮމިޝަނަރ ވިދާޅުވިއެވެ.
އޭގެ އިތުރުން، މައުލޫމާތު ހިއްސާކުރުމަށް ނިޒާމުތައް ކަނޑައެޅުމާއި، ސައިބަރ ކްރައިމްގެ ނުރައްކާތަކާއި، ޑިޖިޓަލް ސެކިއުރިޓީގެ ވަލްނަރަބިލިޓީސްތައް ދެނެގަތުމާއި، މިކަންކަން ހައްލުކުރުމަށް ރައްޔިތުންނާ ގުޅިގެން މަސައްކަތްކުރުމަށް ކޮމިޝަނަރ އެދިލެއްވިއެވެ. އެގޮތުން ރައްކާތެރި ސައިބަރ ވެއްޓެއް ގާއިމުކުރުމަށް ޕަބްލިކް އަދި ޕްރައިވެޓް ސެކްޓާގައި މަސައްކަތްކުރާ ފަރާތްތައް އެކުގައި މަސައްކަތްކޮށް، ބެސްޓް ޕްރެކްޓިކްސްތަކާ ޕޮލިސީސްތައް ތައްޔާރުކޮށް ރައްކާތެރި ޑިޖިޓަލް މާހައުލެއް ގާއިމުކުރުމަށް ލަނޑުދަނޑި ކަނޑައެޅުން މިއަދު ވަރަށް މުހިންމުކަމަށް ވެސް ކޮމިޝަނަރ ވިދާޅުވިއެވެ. އަދި މިއަދު ދިވެހި ރައްޔިތުންގެ އަމާޒަކަށްވާންވީ، ސައިބަރ ސެކިއުރިޓީގެ ފަންނުވެރިން މަދުއިރު، މިދާއިރާއަށް އައު ފަންނުވެރިން ތައާރަފުކޮށް ހިތްޖެއްސުން ކަމަށާއި ސައިބަރ ސެކިއުރިޓިއަށާއި، ސައިބަރ ކްރައިމްގެ އެންމެހައި ކަންތައްތަކަށް މީހުން އަހުލުވެރިކުރުން ކަމަށްވެސް ކޮމިޝަނަރ ވިދާޅުވިއެވެ.
“އަޅުގަނޑުމެންގެ ތުއްތު ތުއްތު ޅަދަރީންނާއި އިސްރަށްވެހީން ސައިބަރ ކްރައިމް އިން ރައްކާތެރިކުރުން. އެގޮތުން ސައިބަރ ކްރައިމްގެ ގާނޫނުތަކާއި ގަވާއިދުތަކަށް ރައްޔިތުން އަހުލުވެރިކުރުވުން. މިކަމުގެ ސަބަބުން އިންޓަނޭނަޝަލް ބެސްޓް ޕްރެކްޓިކްސްތަކާއި ގާނޫނުތަކަށް ލޯ ހުޅުވި، ދިވެހިރާއްޖޭގެ ގާނޫނުތަކަށް އެކަށޭނަ ބަދަލުތައް ގެންނަން ފަސޭހަވެގެންދާނެ.” ކޮމިޝަނަރ ވިދާޅުވިއެވެ.
ސައިބަރ އެކްސްޕޯ 2024 ބޭއްވުމަށް ހަމަޖެހިފައިވަނީ އަންނަ ޑިސެމްބަރ މަހުގެ 10 އިން 13 އަށެވެ. މި އެކްސްޕޯ ވެގެންދާނީ ސައިބަރ ސެކިއުރިޓީއަށް ބޭނުންކުރެވޭ ގެޖެޓްސްތަކާއި ސަރވިސްތައް އެއްތަނަކުން ބަލާލެވޭނެ އަދި އާއްމުކޮށް ކުރިމަތިވާ ސައިބަރ އެޓޭކްސްތަކާއި މިފަދަ އެޓޭކްސްތައް ހުއްޓުވަން ކުރެވިދާނެ ކަންކަމާމެދު މި ދާއިރާގެ ފަންނީ މާހިރުންނާ މަޝްވަރާކޮށްލަން ލިބޭނެ ރަނގަޅު ފުރުސަތަކަށެވެ.
