އެ ރަށު ސިއްޙީ މަރުކަޒުގައި ޤާއިމުކޮށްފައިވާ މި ކްލިނިކް މިއަދު ރަސްމީކޮށް ހުޅުއްވައި ދެއްވީ ފަސްޓް ލޭޑީ ސާޖިދާ މުހައްމަދެވެ.
ދިއްގަރު ޞިއްޙީ މަރުކަޒުން ބުނީ މިފަދަ ކްލިނިކެއް ހުޅުވުމުގެ އެންމެ ބޮޑު ބޭނުމަކީ ގައިންގަޔަށް ނާރާ ބަލިތައް އިތުރުވާތީ ދުރާލައި އެކަން ދެނެގަނެ ރައްޔިތުންނަށް ފަރުވާ ދިނުން ކަމަށެވެ. އެގޮތުން ދިއްގަރުގައި ހަކުރު ބައްޔާއި ލޭ މައްޗަށް ދިޔުން ފަދަ ބަލިތައް އިތުރުވަމުންދާ އިރު، އެ އަތޮޅުގެ ރަށްތަކުގެ ތެރެއިން ދެވަނަ އަށް އެފަދަ އެންމެ ގިނައިން ތަހައްމަލު ކުރާ މީހުން ދިރިއުޅެނީ ވެސް ދިއްގަރުގައި ކަމަށް ސިއްހީ މަރުކަޒުން ބުންޏެވެ.
އެގޮތުން އަލަށް ހުޅުވި ކްލިނިކްގައި ބަލީގެ މީހުންގެ ހާލަތު ދެނެގަތުމާއި އެފަދަ ބަލިތަކަށް ޓެސްޓްތައް ހަދައި ހޭލުންތެރިކުރުމުގެ މަޢުލޫމާތުތައް ފޯރުކޮށް ދިނުން ފަދަ މަސައްކަތްތައް ކުރިއަށް ގެންދާނެ އެވެ.
ދިއްގަރު ސިއްޙީ މަރުކަޒު ހުޅުވީ 2004 ގަ އެވެ. އެތަނުގައި މި ވަގުތު ދެ ޑޮކްޓަރުން މަސައްކަތް ކުރަމުން އަންނަ އިރު، 24 ގަޑިއިރު ޚިދުމަތް ދެ އެވެ. ދިއްގަރު ސިއްޙީ މަރުކަޒުން ދުވާލެއްގެ މައްޗަށް 15-20 މީހުން ފަރުވާ ހޯދަ އެވެ.
