ތ. ގުރައިދޫ އެއާޕޯޓް ތަރައްގީކުރުމަށް ބޭނުންވާ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު އެމްޓީސީސީއާ ހަވާލުކޮށްފިއެވެ.
ކޮންސްޓަކްޝަން މިނިސްޓްރީގައި ރޭ ބެއްވި ހަފުލާއެއްގައި މިނިސްޓްރީގެ ފަރާތުން މި މަޝްރޫގެ ލިޔުމުގައި، ސޮއިކުރެއްވީ މިނިސްޓާ އޮފް ސްޓޭޓް އިބްރާހީމް ތައާމް މުހައްމަދު އެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ އަދި އެމްޑީ ޑީސީޕީ (ރިޓަޔަޑް) އަހުމަދު ސައުދީ އެވެ.
އެ ރަސްމިއްޔާތުގައި މިނިސްޓްރީ އާއި އެމްޓީސީސީގެ އިސްވެރީންނާއެކު ރައްޔިތުންގެ މަޖިލީހުގެ ގުރައިދޫ ދާއިރާގެ މެންބަރު ހަނާން މުހައްމަދު ރަޝީދު ވެސް ބައިވެރިވެވަޑައިގެންނެވިއެވެ.
ގުރައިދޫ އެއާޕޯޓު މަޝްރޫއު މި އަހަރުގެ ތެރޭގައި ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ މިދިޔަ އަހަރުގެ ރިޔާސީ އިންތިހާބުގެ ކާމިޔާބީ އަށް ފަހު، ރާއްޖޭގެ ރަށަކަށް ކުރެއްވި ފުރަތަމަ ދަތުރުފުޅުގައި މި އަހަރުގެ ފެބްރުއަރީ 6 ވަނަ ދުވަހުގައެވެ.
