ބިޒްނަސް ސެންޓަރ ކޯޕަރޭޝަން (ބީސީސީ) އާއި ވިލާ ކޮލެޖާ ގުޅިގެން ކުރިއަށްގެންދާ ގްލޯބަލް އެންޓަޕްރެނަރޝިޕް ވީކް (ޖީއީޑަބްލިއު) ރަސްމީކޮށް އިފްތިތާހުކޮށްފިއެވެ.
މިއީ ދިވެހިރާއްޖޭގައި ގްލޯބަލް އެންޓަޕްރެނަރޝިޕް ވީކް ފާހަގަކުރާ ފުރަތަމަ ފަހަރެވެ. މިއަށްފަހު،ކޮންމެ އަހަރެއްގައިވެސް މި ޙަރަކާތް ރާއްޖޭގައި ކުރިއަށް ގެންދިއުމަށް ވަނީ ނިންމާފައެވެ.
މި ޙަރަކާތް ފައްޓަވައި ދެއްވައި ޖީ.އީ.ޑަބްލިއު މޯލްޑިވްސްގެ ލޯގޯ އިފްތިތާޙްކޮށްދެއްވީ ބީ.ސީ.ސީގެ މެނޭޖިންގ ޑިރެކްޓަރ އިބްރާހީމް ޟިޔާޢު މުޙައްމަދާއި ވިލާކޮލެޖުގެ ރެކްޓަރ ޑރ. އަޙްމަދު އަންވަރެވެ.
ގްލޯބަލް އެންޓަޕްރެނަރޝިޕް ވީކް އިފްތިތާޙް ކުރުމަށް ބޭއްވި ހަފްލާގައި، ބީސީސީއިން ވަނީ ވިލާ ކޮލެޖާ ގުޅިގެން “އިނޮވޭޓިވް އިކޮނޮމިކް ޕޮލިސީސް މެދުވެރިކޮށް ވިޔަފާރިކުރިއެރުވުމަށް މަގުފަހިކުރުން” މި މައުޟޫއަށް ޕެނަލް ޑިސްކަޝަނެއް ބާއްވާފައެވެ.
މި ޕެނަލް ޑިސްކަޝަންގައި މައިގަނޑު ގޮތެއްގައި އަލިއަޅުވާލާފައިވަނީ އިޤްތިޞާދު ސިންދަފާތު ކުރުމުގައި މައިގަނޑު އަސާސެއްގެ ގޮތުގައި ވިޔަފާރިވެރިތައް ކުރިއެރުވުމުގެ މައްޗަށެވެ. އަދި ވިޔަފާރިވެރިން ބާރުވެރިކުރުވައި ދެމެހެއްޓެނިވި ގޮތެއްގައި ވިޔަފާރިތައް ކުރިއެރުވޭނެ އިޖާދީ ގޮތްތައް ހޯދުމުގައި ފަންނުވެރި އިޤްތިޞާދެއްގެ ދައުރާއި ގުޅޭގޮތުން ވެސް ވަނީ މަޝްވަރާ ކޮށްފައެވެ.
ގްލޯބަލް އެންޓަޕްރެނަރޝިޕް ވީކުގެ ދަށުން އިއްޔެ ބޭއްވި ޕެނަލް ޑިސްކަޝަންގެ އިތުރުން ސިލްސިލާ 4 ހަރަކާތެއް ބޭއްވުމަށްވެސް ވަނީ ނިންމާފައެވެ. މި ޙަރަކާތްތައް ބާއްވަން ނިންމާފައިވަނީ 21 ނޮވެމްބަރު 2024 އިން ފެށިގެން 24 ނޮވެމްބަރ 2024އާއި ހަމައަށެވެ. މީގެ ތެރޭގައި ހިމެނެނީ، ޓްރެއިން ދަ ޓްރެއިނަރ ޕްރޮގްރާމް، ކިކްސްޓާޓް ވީކެންޑް، ބިޒްނަސް ޕިޗް މުބާރާތް ހިމެނެއެވެ. މި ޙަރަކާތްތަކުގެ ނިންމުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ 24 ނޮވެމްބަރ 2024ގައެވެ.
ގްލޯބަލް އެންޓަޕްރެނަރޝިޕް ވީކް އިފްތިތާޙް ކުރުމަށް މާލޭގެ އިތުރުން ހދ.ކުޅުދުއްފުށި، އައްޑޫ ސިޓީ، ފުވައްމުލަކު ސިޓީ އަދި ލ.ގަމުގައި ވެސް މިކަމާ ގުޅޭ ހަރަކާތްތައް ބޭއްވުމަށް ވަނީ ހަމަޖެހިފައެވެ. އެއް ހަފްތާގެ މުއްދަތަށް ކުރިއަށްގެންދާ މި ހަރަކާތްތަކުގެ މަޤްޞަދަކީ ރާއްޖޭގައި އީޖާދީ ވިސްނުމާއި، އިޤްތިޞާދު ކުރިއެރުވުމުގެ ސަޤާފަތެއް ކުރިއަރުވައި، ވިޔަފާރިވެރިންނަށް ހިތްވަރުދީ، ހޭލުންތެރިކުރުވުމެވެ.
