ސާއްބަ އަހަރީ ކަޕް 2020 ފުޓް ބޯޅަ މުބާރަތުގައި ބުދަ ދުވަހު ކުޅުނު މެޗްގައި ޝީލްޑް އަތުން މޮޅުވެ ޔޫތު ފުރެންޑްސް ތާވަލުގެ އެއްވަނަ މަޤާމު ދަމަހައްޓައިފިއެވެ. މި މިމެޗުން ޔޫތް ފުރެންޑްސް މޮޅުވީ 3-1 ގެ ނަތީޖާ އަކުންނެވެ.
މި މެޗްގެ ފުރަތަމަ ހާފުގައި ދެ ޓީމުވެސް ރަނގަޅު ކުޅުމެއް ދެއްކިއެވެ. މެޗުގެ ފުރަތަމަ ހާފުގެ 13 ވަނަ މިނެޓް ތެރޭގައި ޔޫތު ފުރެންޑްސް ވަނީ ލަނޑެއް ޖަހައިފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ޖާރޒީ ނަންބަރު 33 ﷲޖާދު އަލީއެވެ. އަދި ހަމަ އެހާފުގެ 25 ވަނަ މިނެޓުގައި ޔޫތު ފުރެންޑްސް ވަނީ ޝީލްޑް ކޮޅަށް އިތުރު ލަނޑެއް ޖަހާ 2-0 އެއްގެ ލީޑެއް ނަގައިފައެވެ. މި ލަނޑު ކާމިޔާބު ކޮއްދިނީ އެޓީމުގެ ޖާރޒީ ނަންބަރު 04 ހަސަން ޝާހިދެވެ. ފުރަތަމަ ހާފު ނިމިގެން ދިޔައީ އެ ސްކޯގައި އޮވެގެންނެވެ.
މެޗްގެ 51 ވަނަ މިނެޓުގައި ޔޫތު ފުރެންޑްސް ވަނީ އިތުރު ލަނޑެއް ޖަހާ 3-0 ކަށް ނަތީޖާ ބަދަލުކޮށްލާފައެވެ. މި ލަނޑު ކާމިޔާބު ކޮއްދިނީ ޖާރޒީ ނަންބަރު 11 މުުޙައްމަދު މަފާޒެވެ. ދެވަނަ ހާފުގައި ޝީލްޑުން ވަނީ ކުޅުން ވަރުގަދަކޮށް ޔޫތު ފުރެންޑްސް ކޮޅައް ގިނަ ހަމަލާތަކެއް ފޮނުވާފައެވެ. ނަތީޖާއެއްގެ ގޮތުން ދެވަނަ ހާފުގެ އިތުރު ވަގުތުގައި ޝީލްޑުން ލަނޑެއް ޖަހައި މެޗުގެ ނަތީޖާގެ ފަރަގު ކުޑަކުރިއެވެ. މިލަނޑު ޖަހާފައިވަނީ ޝީލްޑްގެ ޖާރޒީ ނަންބަރު 14 އަޙްމަދު މުޖުތަބާއެވެ.
މިމެޗަށް ފަހު ޝީލްޑް އޮތީ 3 ޕޮއިންޓާއެކު ތާވަލުގެ 5 ވަނާގައެވެ. އަދި ޔޫތު ފުރެންޑްސް ވަނީ 6 ޕޮއިންޓާއެކު ތާވަލްގެ އެއް ވަނާގައެވެ. ތާވަލުގެ 5 ވަނާގައި ޝީލްޑް އޮތްކަމުގައި ވިއަސް އެޓީމަށް ސެމީއަށް ދިއުމުގެ ފުރުސަތު އަދި އެބައޮތެވެ.
މި މުބާރާތުގެ މެޗެއް މާދަމާ 15:40 ގައިވެސް އޮންނާނެއެވެ. މާދަމާގެ މެޗްގައި ބައްދަލު ކުރާނީ ޔުނީފޯމް އާއި އަހުލީއެވެ. މިމެޗު ކުޅުމަށް ހަމަޖެހިފައި ވަނީ ހަނިމާދޫ ރަސްމީ ފުޓް ބޯޅަ ދަނޑުގައެވެ.
