ހަނިމާދޫ ސާއްބަ އެކުވެރި ކުލަބުގެ ފަރާތުން ކުރިއަށް ގެންދާ ސާއްބަ އެނިވަރސަރީ ކަޕް 2020 ފުޓްބޯޅަ މުބާރާތުގެ އެގާރަ ވަނަ މެޗު ޝީލްޑު ކާމިޔާބުކޮށްފިއެވެ.
އިއްޔެ ހަވީރު ހަނިމާދޫ ރަސްމީ ފުޓްބޯޅަ ދަނޑުގައި ކުޅުނު މެޗުން އެ ޓީމު މޮޅުވީ ރިއަލް ސްޓާރސް އާ ބައްދަލުކޮށް 3-1 ގެ ނަތީޖާ އަކުންނެވެ.
ފޯރިގަނދަ ކުޅުމެއް ފެނިގެންދިޔަ މިމެޗުގެ ފުރަތަމަ ހާފުގެ 9 ވަނަ މިނެޓުގައި ޝީލްޑުން ވަނީ ލަނޑެއް ޖަހައިފައެވެ. މިލަނޑު ކާމިޔާބުކޮަަށްދިނީ އެ ޓީމުގެ ޖޯޒީ ނަންބަރު 07 ހުސެޢިން ޝަރީފެވެ. މެޗުގެ 34 ވަނަ މިނެޓުގައި ރިއަލް ސްޓާރސްއިން ވަނީ ނަތިޖާ ހަމަހަމަ ކޮށްފައެވެ. މި ލަނޑު ޖެހީ އެ ޓީމުގެ ޖޯޒީ ނަންބަރު 37 ނައުޝާދެވެ. މި ނަތިޖާން ފުރަތަމަ ހާފު ނިމެން ދަނިކޮށް 45 ވަނަ މިނެޓުގައި ޝީލްޑުން ވަނީ ލަނޑެއް ޖަހައިފައެވެ. މިލަނޑު ޖެހީ އެ ޓީމުގެ މުޖުޠަބާއެވެ. ފުރަތަމަ ހާފު ނިމުނީ 2-1 އަކުން ޝީލްޑު ކުރީގައި އެވެގެންނެވެ.
ދެވަނަ ހާފުގައިވެސް ފެނިގެން ދިޔައީ ފޯރިގަދަ ކުޅުމެކެވެ. އެގޮތުން 65 ވަނަ މިނެޓުގައި ޝީލްޑުން ވަނީ ލަނޑެއް ޖަހާ 3-1 ކަށް ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބު ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް އެ ޓީމުގެ ޖޯޒީ ނަންބަރު 10 ނައުފަލް ޢަބްދުއް ރައޫފެވެ.
މި މެޗުގެ މޮޅު ކުޅުންތެރިއަކަށް ހޮވިފައިވަނީ ޝީލްޑްގެ ޖޯޒީ ނަންބަރު 13 މުހައްމަދު ޢަބްދުއް ޢަފޫރެވެ. މޮޅު ކުޅުންތެރިޔާއަށް އިނާމު ހަވާލުކޮށްދެއްވީ މެޗުގެ ޝަރަފުވެރި މެހެމާނު ހަނިމާދޫ ކައުންސިލުގެ ރައީސް ޢަބްދުއް ސަލާމް އަލީއެވެ.
މި މުބާރާތުގެ މެޗެއް މިއަދުވެެސް އޮންނާނެއެވެ. ބައްދަލު ކުރާނީ ޔޫތު ފުރެންޑްސް އާއި ރޫހު އެވެ. މެޗު ކުޅުމަށް ހަމަޖެހިފައިވަނީ ހަނިމާދޫ ރަސްމީ ބޯޅަދަނޑުގައި މިއަދު 15:50 ގައެވެ.
