ހަނިމާދޫ ސާއްބަ އެކުވެރި ކުލަބުގެ ފަރާތުން ކުރިއަށް ގެންދިޔަ ސާއްބަ އެނިވަރސަރީ ކަޕް 2020 ފުޓްބޯޅަ މުބާރާތުގެ ތަށި ފުރަތަމަ ފަހަރަށް ޝިލްޑް އުފުލާލައިފިއެވެ.
މި މިބާރާތުގެ ފައިނަލް މެޗުގައި މިއަދު ހަވީރު ބައްދަލު ކޮށްފައިވަނީ ރޫހު އަދި ޝީލްޑް އެވެ. ރޫހު ފައިނަލަށް ދަތުރު ކޮށްފައި ވަނީ 12 ޕޮއިންޓު އަދި ފައިދާ 1 އާއިއެކު ތާވަލުގެ އެއްވަނައިގެ ގޮތުގައެވެ. ޝީލްޑް ފައިނަލަށް ދިޔައީ ސެމީ ފައިނަލުގައި ޔޫތު ފުރެންޑްސް ބަލި ކުރުމަށް ފަހުއެވެ.
މިއަދު ޝީލްޑު މެޗު ކާމިޔާބު ކުރީ 2-1 ގެ ނަތީޖާއަކުނެވެ. މިއަދު މެޗު ފަށައިގެން ޝީލްޑް ޓީމުން ވަރުގަދަ ކުޅުމެއް ދެއްކިއިރު އެ ޓީމުގެ ފުރަތަމަ ލަނޑު ކާމިޔާބު ކުރެވުނީ 31 ވަނަ މިނެޓުގައެވެ. އެ ލަނޑު ކާމިޔާބުކޮށްދިނީ ޖާރޒީ ނަންބަރު 11، އާސިފު ޝަލީމު އެވެ. މެޗުގެ ކުރީ ކޮޅު ރޫހު ޓީމަށް ލަނޑު ޖަހާނެ ރަނގަޅު ދެ ފުރުސަތު ލިބިފައިވެއެވެ. ނަމަވެސް އެއިން އެއްވެސް ފުރުސަތެއް ބޭނުން ހިފިފައެއް ނުވެއެވެ. އެގޮތުން ފުރަތަމަ ހާފު ނިންމާލަށް ޖެހުނީ 1-0 ގެ ނަތިޖާނެވެ.
ދެވަނަ ހާފު ފަށާ ރޫހު ޓީމުން ކުޅުން ރަނގަޅުކޮށް ޝީލްޑް ގޯލަށް އެތައް ހަމަލާއެއް ފޮނުވާލިއެވެ. އެހެނަސް އެ ޓީމުގެ ހަމަލާތަކުގެ ހުރަހަކަށް ވީ ޝީލްޑް ގޯލް ބެލެހެއްޓި ކީޕަރު، މަސްއޫދު އާދަމް އެވެ. ޝީލްޑް މަޑު މަޑުން ކުޅުން ރަނގަޅުކޮށް ވަނީ ދެވަނަ ލަނޑެއް ކާމިޔާބު ކޮށްފައެވެ. 24 ވަނަ މިނެޓުގައި މި ލަނޑު ކާމިޔާބު ކޮށްދިނީ ޝީލްޑް ޖާރޒީ ނަންބަރު 14، އަހުމަދު މުޖުތަބާ އެވެ. މި ލަނޑު ޖަހާ ޝީލްޑް ރަނގަޅަށް ހަމަޖެހިނުލެވި އުޅެނިކޮށް 29 ވަނަ މިނެޓުގައި ރޫހު ވަނީ ލަނޑެއް ކާމިޔާބު ކޮށްފައެވެ. މި ލަނޑު ކާމިޔާބު ކޮށްދިނީ އެ ޓީމުގެ ޖާރޒީ ނަންބަރު 30، އަހުމަދު އަލީއެވެ. މި ލަނޑަށް ފަހު ރޫހު ކުޅުން ވަރުގަދަ ކުރިނަމަވެސް މެޗު ނިމާލަން ޖެހުނީ 2-1 ގެ ނަތިޖާއިން ޝީލްޑް ކުރީގައި އޮވެގެނެވެ.
ފައިނަލް މެޗުގެ މޮޅު ކުޅުންތެރިޔާއަށް ހޮވިފައިވަނީ ޝީލްޑް ޖާރޒީ ނަންބަރު 14، އަހުމަދު މުޖުތަބާ އެވެ.
މި މެޗަށް ފަހު މި މިބާރާތުގެ ވަނަވަނައަށް ހޮވުނު ފަރާތްތަކަށް އިނާމު ހަވާކުރުމުގެ އިތުރުން މުބާރާތަށް އެކި ގޮތްތަކުން އެހީތެރިވި ފަރާތްތަކަށް އެކަމުގެ އަގު ވަޒަންކޮށްފައި ވެއެވެ. މީގެ އިތުރުން ޗެންޕިއަން ޓީމަށް 10000 ރުފިޔާ އަދި ރަނަރއަޕަށް 3000 ރުފިޔާ އަދި ފެޔާރ ޕުލޭ ޓީމަށް 1500 ރުފިޔާ ވަނީ ދީފައެވެ.
މި މުބާރާތުގައި ހޮވާފައިވާ ވަނަތައް ތިރީގައި އެވަނީ އެވެ.
- އެންމެ މޮޅު ޑިފެންޑަރު : މުހައްމަދު އަބުދުލް ގަފޫރު، ޝީލްޑް ޖާރޒީ ނަންބަރު 13
- އެންމެ މޮޅު މިޑް ފީލްޑަރު : އަހުމަދު އަލީ، ރޫހު ޖާރޒީ ނަންބަރު 30
- އެންމެ މޮޅު ފޯވާޑު : ހުސެން ޝަރީފު ، ޝީލްޑް ޖާރޒީ ނަންބަރު 7
- އެންމެ ގިނަ ލަނޑު ޖެހި ކުޅުންތެރިޔާ : އަހުމަދު މުޖުތަބާ، ޝީލްޑް ޖާރޒީ ނަންބަރު 14
- އެންމެ މޮޅު ގޯލް ކީޕަރު : ﷲއަބުދު މުހައްމަދު، ރޫހު ޖާރޒީ ނަންބަރު 20
- 21 އަހަރުން ދަށުގެ އެންމެ މޮޅު ކުޅުންތެރިޔާ : އަހުމަދު މުޖުތަބާ، ޝީލްޑް ޖާރޒީ ނަންބަރު 14
- އެންމެ މޮޅު ކުޅުންތެރިޔާ : އަހުމަދު އަލީ، ރޫހު ޖާރޒީ ނަންބަރު 30
- ފެޔާރ ޕުލޭ ޓީމު : ރޫހް
- ރަނަރއަޕް ޓީމު : ރޫހް
- ޗެންޕިއަން ޓީމް: ޝީލްޑް
ސާއްބަ އެނިވާސަރީ ކަޕް 2020 ގެ މީޑިޔާ ޕާރޓްނަރަކީ ގޮށްކޮޅެވެ.
މި މުބާރާތުގެ މެއިން ސްޕޮންސަރަކީ ހަނިމާދޫ ދާއިރާގެ މެންބަރު ޢަބްދުލް ޣަފޫރު މުސާއެވެ. ކޯ ސްޕޮންސަރުންނަކީ ހަނިމާދޫ ކައުންސިލް، ބްރޭކް ޓައިމް، ސެރީލިޔަން، ސީ ކިންގް އަދި ހެޕީ މާކެޓެވެ.
