ތިލަދުންމަތީ އުތުރުބުރީ ބާރަށާއި މިލަދުންމަޑުލު އުތުރުބުރީ ފުނަދޫގައި ޓޫރިސްޓް ހޮޓާ ތަރައްޤީކޮށް ހިންގާނެ ފަރާތެއް ހޯދުމަށް ފަތުރުވެރިކަމާއި ތިމާވެއްޓާއި ބެހޭ ވުޒާރާއިން ބީލަމަށް ހުޅުވާލައިފިއެވެ. މި ދެ ރަށުގައިވެސް ހޮޓާ ތަރައްޤީކުރުމަށް ހަމަޖެހިފައިވަނީ ސަރުކާރުން ކަނޑައަޅާފައިވާ ވަކި ބިންތަކެއްގައެވެ.
ފަތުރުވެރިކަމާ ބެހޭ ވުޒާރާއިން ވިދާޅުވީ، ހއ. ބާރަށުގައި ޓޫރިސްޓް ހޮޓަލެއް ތަރައްޤީކުރުމަށް ދޫކުރުމަށް ހަމަޖެހިފައިވަނީ 71,832 އަކަމީޓަރުގެ ބިމެއް ކަމަށެވެ. އަދި މި ބިމުގައި މަދުވެގެން 50 ކޮޓަރީގެ ހޮޓަލެއް ތަރައްޤީކޮށް، ހިންގައި ބެލެހެއްޓުމަށް ބީލަން ހުށަހެޅުމުގެ ފުރުޞަތު ރާއްޖެއާއި ރާއްޖެއިން ބޭރުގެ އިންވެސްޓަރުންނަށް މިހާރު ހުޅުވާލާފައިވާނެ ކަމަށް އެ ވުޒާރާއިން ވިދާޅުވެއެވެ.
މީގެ އިތުރުން، ށ. ފުނަދޫގެ 3 ހެކްޓަރުގެ ބިމެއްގައި ޓޫރިސްޓް ހޮޓަލެއް ތަރައްޤީކުރުމަށްވެސް އެ ވުޒާރާއިން މިހާރު ވަނީ ހުޅުވާލާފައެވެ. އަދި ބާރަށެކޭ އެއްފަދައިން ފުނަދޫގައިވެސް ތަރައްޤީކުރާ ހޮޓަލަކީ މަދުވެގެން 50 ކޮޓަރީގެ ހޮޓަލަކަށް ވާންޖެހޭނެ ކަމަށްވެސް އެ ވުޒާރާއިން ވިދާޅުވެއެވެ.
މި ދެ ރަށުންވެސް ބިން ކުއްޔަށް ދޫކުރުމަށް ހަމަޖެހިފައިވަނީ 50 އަހަރު ދުވަހުގެ މުއްދަތަކަށް ކަމަށް ފަތުރުވެރިކަމާ ބެހޭ ވުޒާރާއިން ވިދާޅުވެއެވެ. އަދި އެއްބަސްވުމުގައި ސޮއިކުރާ ތާރީޚުން ފެށިގެން ހޮޓާ އިމާރާތްކޮށް ނިންމުމަށް ގިނަވެގެން 24 މަސްދުވަހުގެ މުއްދަތެއް ލިބޭނެ ކަމަށެވެ.
ބީލަމާ ގުޅޭ ލިޔެކިޔުންތައް އަންނަ މަހުގެ 1ވަނަ ދުވަހުން ފެށިގެން މާރިޗު މަހުގެ 30ވަނަ ދުވަހާއި ހަމައަށް އެ ވުޒާރާއިން ލިބެން ހުންނާނެއެވެ. އަދި ބީލަމުގައި ބައިވެރިވާން އެދޭ ފަރާތްތަކުން އެ ވުޒާރާގެ ވެބްސައިޓް މެދުވެރިކޮށް ނުވަތަ ސީދާ ވުޒާރާއަށް ހާޒިރުވެގެން ފޯމު ހުށަހެޅުމުގެ ފުރުސަތު ވަނީ ހުޅުވާލާފައެވެ. މި ދެ ރަށުގައި ޓޫރިސްޓް ހޮޓަލެއް ތަރައްޤީކޮށް ހިންގުމަށް ބީލަން ހުށަހެޅުމުގެ ސުންގަޑިއަކީ އަންނަ މާރިޗު މަހުގެ 31 ވާ އަންގާރަ ދުވަހެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަތޮޅުތަކުގެ ރަށްރަށަށް ކުރެއްވި ދަތުރުފުޅުގެ ތެރެއިން މިދިޔަ އަހަރު ހއ. ބާރަށަށް ވަޑައިގެން ތިމާވެއްޓާއި ރަށްޓެހި ނުވަތަ އީކޯ ޓޫއަރިޒަމްގެ ބިޔަ މަޝްރޫޢެއް ސަރުކާރުން ބާރަށުގައި ކުރިއަށް ގެންދެއްވާނެކަން ވަނީ ހާމަކުރައްވާފައެވެ.
ރައީސުލްޖުމްހޫރިއްޔާ ވިދާޅުވީ، ބައިނަލްއަޤްވާމީ ބިޑިންއަކަށް ހުޅުވާލައިގެން އިކޯ ޓުއަރިޒަމް މަޝްރޫޢު ކުރިއަށް ގެންދަވާނީ، އަމިއްލަ ފަރާތްތަކަށް ފުރުޞަތު އިތުރު ކުރުމަށް ކަމަށެވެ. އަދި މި މަޝްރޫޢުގެ ސަބަބުން ރަށުގައި ވަޒީފާގެ ފުރުޞަތުތަކާއި އާމްދަނީ އިތުރުވެ، ރަށުގެ އާއްމު ހާލަތުވެސް ރަނގަޅުވެގެންދާނެ ކަމަށް އެމަނިކުފާނު ވިދާޅުވިއެވެ.
