އއ. ބޮޑުފުޅަދޫ ކައުންސިލުންގެ ފަރާތުން ” ޝައިން ޗުއްޓީ މާ މަޖާ ” ގެ ނަމުގައި 13 އަހަރުން ދަށުގެ ކުދިންނަށް އަމާޒުކޮށް ކުރިޔަށް ގެންދިޔަ ފުޓްސަލް މުބާރާތުގެ ތަށި “ދިވެހި ކުދިން” އުފުލާލައިފިއެވެ.
09 ޖަނަވަރީ 2021 ވަނަ ދުވަހުގެ ހަވީރު ބޮޑުފުޅަދޫ ފުޓްސަލް ދަނޑުގައި ކުޅުނު ފައިނަލް މެޗު ދިވެހި ކުދިން ކާމިޔާބުކޮށްފައިވަނީ ރެއިންޖާސް ޓީމުގެ މައްޗަށް 4-1 ގެ ނަތީޖާއިން ކުރި ހޯދައިގެންނެވެ.
ހިތްގައިމު ނަލަ ކުޅުމެއް ދިވެހި ކުދިން ޓީމުގެ ފަރާތުން ފެނިގެން ދިޔަ މިމެޗުގެ މޮޅު ކުޅުންތެރިޔަކަށް ހޮވިފައިވަނީ އެ ޓީމުގެ ޖާރޒީ ނަންބަރ 7 ޔޫނުސް ރައްޔާނެވެ. މޮޅު ކުޅުންތެރިޔާއަށް އިނާމު ހަވާލުކޮށްދެއްވީ ރަށު ފެންވަރުގައި ކުޅިވަރުގެ ދާއިރާއަށް އެތަށް ހިދުމަތެއް ކޮށްދެއްވަމުން އަންނަ ހަސަން ޒިލާހުއެވެ.
ފައިނަލް މެޗަށްފަހު ވަނަ ވަނައަށްދިޔަ ޓީމުތަކަށް ވަނީ ތަށްޓާއި މެޑެލް ހަވާލުކޮށްފައެވެ. ޗެންޕިއަން ޓީމަށް ތައްޓާއި މެޑެލް ހަވާލުކޮށްދެއްވީ ބޮޑުފުޅަދޫ ކައުންސިލުގެ ރައީސް ޝުޖާއު އާދަމެވެ. ރަނަ އަޕް ޓީމަށް ތަށި ހަވާލުކޮށްދެއްވީ ކައުންސިލުގެ ނައިބު ރަައީސް މުހައްމަދު ނަޝީދެވެ. މުބާރާތުގެ މޮޅު 5 ކުޅުތެރިނަށް އިނާމު ހަވާލުކޮށްދެއްވީ ރަށު ފެންވަރުގައި ކުޅިވަރަށް ހިދުމަތް ކޮށްދެއްވަމުން ގެންދަވާ ހަސަން ޒަރީރެވެ. މި މުބާރާތުގެ އެންމެ މޮޅު ކުޅުންތެރިޔަކަށް ހޮވުނު ކުޅުންތެރިންނަށް އިނާމު ހަވާލުކޮށްދެއްވީ ބޮޑުފޮޅުދޫގައި ފުޓްސަލް ތަރިއެއްކަމަށްވާ އިބުރާހިމް ރަފްހާނެ ވެ.
މުބާރާތުގައި ހޮވާފައިވާ ވަނަތައް:
- ޗެންޕިއަން ޓީމް : ދިވެހި ކުދިން
- ރަނަ އަޕް ޓީމް : ރޭންޖާސް
- ޓޮޕް ސްކޯރަރ : ޔޫނުސް ރައްޔާން، ޖާރޒީ ނަންބަރ 7 ދިވެހި ކުދިން .
- މުބާރާތުގެ އެންމެ މޮޅު ކުޅުންތެރިޔާ : ޔޫނުސް ރައްޔާން، ޖާރޒީ ނަންބަރ 7 ދިވެހި ކުދިން .
މުބާރާތުގެ އެންމެ މޮޅު 5 ކުޅުންތެރިން :
- އިބްރާހިމް އަޒުލީން، ޖާރޒީ ނަންބަރ 1 ، ބެންޒާއީ ސިޓީ
- ޔޫނުސް ރައްޔާން، ޖާރޒީ ނަންބަރ 7 ، ދިވެހި ކުދިން
- އިބްރާހިމް ނައުފަލް، ޖާރޒީ ނަންބަރ 5 ، ރޭންޖާސް
- ޝައިހާން ނަސީމް، ޖާރޒީ ނަންބަރ 9 ، އެފް.ޓީ ލީތަލް
- ޝައިހަމް ޝަހީމް، ޖާރޒީ ނަންބަރ 11 ، ދިވެހި ކުދިން
މި މުބާރާތަކީ 2019 އިން ފެށިގެން ކޮންމެ އަހަރެއްގެ ބޮޑު ޗުއްޓީއާ ދިމާކޮށް އެރަށުގެ 13 އަހަރުން ދަށުގެ ކުދިންނަށް ހާއްސަކޮށްގެން ބޮޑުފުޅަދޫ ކައުންސިލުން ރާވައިގެން ކުރިއަށްގެންދާ މުބާރާތެކެވެ.
ފޮޓޯ : ބޮޑުފޮޅުދޫ ކައުންސިލް
