އެއްގަމުމަގުން އަރައިގަނެ އީރާނަށް ހަމަލާދިނުމަށް އެމެރިކާއާއި އިސްރާއީލުން ތައްޔާރުވަމުންދާ ކަމުގެ ރިޕޯޓްތަކެއް ފެތުރޭން ފަށައިފިއެވެ.
އެމެރިކާއާއި އިސްރާއީލުން އެއްގަމުމަގުން އީރާނަށް ވަދެގަންނަން އުޅެނީ އިރާގުގެ ކުރުދީ ސަރަހައްދުގެ ތެރެއިން ލާފައި ކަމަށްވެސް ޚަބަރުތައް ބުނެއެވެ.
އިރާގުގައި ކުރުދީންގެ އަޣުލަބިއްޔަތު އޮންނަ ކުރުދިސްތާނަކީ، ޒާތީ ވެރިކަމެއް ކުރާ އިރާގުގެ ސަރަހައްދެކެވެ. އެއީ، ސައްދާން ހުސައިންގެ ވެރިކަން ވައްޓާލުމަށްފަހު އެމެރިކާގެ ބާރުގައި ކުރުދީންނަށް ގާއިމްކޮށްދިން ވަކި ވެރިކަމެކެވެ.
ކުރުދިސްތާނުގެ ތެރެއިން ލާފައި ވަދެގަނެ އީރާނަށް ހަމަލާ ދިނުމަށް އެމެރިކާއާއި އިސްރާއީލުން ރާވަމުންދާ ކަމުގެ ރިޕޯޓްތައް މި ފެތުރުނީ، ކުރުދިސްތާނުގެ ލީޑަރުންނާއި އެމެރިކާގެ ހަނގުރާމައިގެ ރައީސް ޓްރަމްޕާ ދެމެދު މުއާމަލާތްތަކެއް ހިނގާފައިވާ ކަމުގެ ރިޕޯޓާ އެކުގައެވެ.
ކުރުދީންގެ ލީޑަރުން ކަމަށްވާ މަސްއޫދު ބަރްޒާނީއާއި، ބަފެލް ތަލަބާނީއާ ފޯނުން ގުޅައި ޓްރަމްޕް ވާހަކަތަކެއް ދައްކާފައިވާކަން މީޑިއާށް ލީކްވެފައި ވެއެވެ.
އެމެރިކާގެ ރައީސް ޑޮނަލްޑް ޓްރަމްޕަކީ، ޒާތީ ވެރިކަމެއް ކުރާ ކުރުދިސްތާނުގެ ވެރިންނަށް އެއްވެސް ހައިސިއްޔަތަކުން ގުޅައި އަދި އެއްވެސް މުއާމަލާތެއްވެސް ކުރަންޖެހޭ މީހެއް ނޫންކަމަށް އެމެރިކާގެ ރިޔާސީ ޕްރޮޓޮކޯލްގައި ބުނެއެވެ.
ބައެއް ރިޕޯޓްތައް ބުނަނީ، އެމެރިކާގެ ރައީސް ކުރުދީ ލީޑަރުންނާ ގުޅީ އެމެރިކާއިން އީރާނަށް ދެމުންގެންދާ ހަމަލާތަކުގައި ކުރުދިސްތާނުން ތާއީދުދީގެން އޮތީ ކޮން ބަޔަކަށްތޯ ސާފުކުރުމަށް ކަމަށެވެ.
އަނެއްބައި ރިޕޯޓްތައް ބުނަނީ، އެމެރިކާއިން ބޭނުންވަނީ އީރާނަށް ހަމަލާދިނުމުގައި ކުރުދިސްތާނުގެ ތާއީދު އެމެރިކާ ސިފައިންނަށް ލިބުމަށް ކަމަށެވެ.
އެކަމަކު، އެމެރިކާގެ ރައީސް ކުރުދިސްތާނުގެ ވެރިންނަށް ގުޅައި ވާހަކަ ދެއްކިކަން ލީކުވުމާއެކު ކުރުދިސްތާނަށް އެކަމުގެ ނުރައްކާވަނީ ފޯރަން ފަށާފައެވެ. އީރާނުގެ ލޯ އެ ސަރަހައްދަށް އަމާޒުވެއްޖެއެވެ. އީރާނުގެ ހަމަލާތައް ކުރުދިސްތާނަށް މިވަނީ އަމާޒުވާން ފަށާފައެވެ.
އީރާނުން ވަނީ، ކުރުދިސްތާނުގައި ހުންނަ އެމެރިކާގެ ކޮންސިއުލޭޓަށް އަމާޒުކޮށް ޑްރޯން އަދި މިސައިލް ހަމަލާތަކެއްވެސް ފޮނުވާލާފައެވެ.
އީރާނުން ފޮނުވާލި ހަމަލާތައް އެމެރިކާ ކޮންސިއުލޭޓަށް ސީދާ އަމާޒު ނުވިނަމަވެސް، އިރާގު ސިފައިންގެ އެއަރޑިފެންސް ސިސްޓަމް ތަކުން އީރާނުގެ މިސައިލްތައް ވައިގެ ތެރޭގައި ގޮއްވާލުމުން އޭގެން ފޭބި ބައިތަކުން އެމެރިކާ ކޮންސިއުލޭޓުގައި ރޯވެ އަނދައި އަދި ބޮޑެތި އެހެން ގެއްލުންތައް ލިބިފައިވާ ކަމަށް ހާމަކޮށްފައި ވެއެވެ.
ކުރުދިސްތާނުގެ ސުލައިމާނިއްޔާގައި ގާއިމްކޮށްފައިވާ އެމެރިކާ ސިފައިންގެ ބޭހަށް އީރާނުން މިރޭދިން ވަރުގަދަ ވައިގެ ހަމަލާތަކަށްފަހު އެ ސަރަހައްދަށް އެތައް އެމްބިއުލެންސް ގޮސް އުޅޭތީ، އީރާނުގެ ހަމަލާތަކުގައި އެމެރިކާ ސިފައިންނަށް ބޮޑެތި ގެއްލުންތައް ލިބުނުކަމަށް ގަބޫލުކުރެވޭ ކަމަށް މީޑިއާ ރިޕޯޓްތައް ބުނެއެވެ.
ސުލައިމާނިއްޔާގެ އިތުރުން، ކުރުދިސްތާނުގެ އެކި ހިސާބުތަކަށް އީރާނުން ވަރުގަދަ ހަމަލާތަކެއް ދީފައި ވެއެވެ.
އީރާނުން މެދުއިރުމަތީގެ ބައެއް ގައުމުތަކުގައި ހުރި އެމެރިކާގެ އަސްކަރީ ބޭސްތަކާއި، އެމެރިކާގެ ތަންތަނަށް ޑްރޯންއާއި، މިސައިލް ބޭނުންކޮށްގެން ދެމުންގެންދާ ހަމަލާތަކުގައި އިރާގުގައި ހުރި އެމެރިކާގެ ތަންތަންވެސް ސަލާމަތެއް ނުވެއެވެ.
އީރާނުން ގެންދަނީ އިރާގުގައި ހުރި އެމެރިކާގެ ބޭސްތަކަށާއި، އެމެރިކާގެ ތަންތަނަށް ވަރުގަދަ ހަމަލާތަކެއް ދެމުންނެވެ. އީރާނުން ފޮނުވާލާ ބައެއް މިސައިލްތަކާއި ޑްރޯންތައް އިރާގު ސިފައިން ވައްޓަމުންވެސް ގެންދެއެވެ.
އިސްތިއުމާރީ އިސްރާއީލެކޭ އެއްގޮތަށް އެމެރިކާއިން މިހާރު ގެންދަނީ، އީރާނުން ދެމުންގެންދާ ހަމަލާތަކުގައި ލިބޭ ގެއްލުންތައް ސިއްރުކުރަމުންނެވެ. އެމެރިކާގެ އާންމުން ރުޅިއައިސްދާނެތީ މަރުވާ ކަމަށް ހާމަކުރަނީ މަދު އަދެދެކެވެ.
