އީރާނަށް ހަމަލާދިނުމަށް އެމެރިކާ ތައްޔާރުވާން ފެށުމާއެކުވެސް، އީރާނާ ދެކޮޅަށް ދިގުލައިގެންދާ ހަނގުރާމައެއް ކުރަން ޖެހިދާނޭ ކަމަށާއި، އެމެރިކާގެ އަސްކަރިއްޔާގެ ސްޓޮކްގައި އެވަރަށް ހަތިޔާރު ނުހުންނާނޭ ކަމަށް، އެމެރިކާގެ އަސްކަރިއްޔާގެ ކުރީގެ އެތައް ޖެނެރަލުންނެއް ބުނެ އިންޒާރު ކުރަމުން ގޮސްފައި ވެއެވެ.
އަދި އީރާނާ ދެކޮޅަށް މި ދަނޑިވަޅުގައި ހަނގުރާމަ ކުރުމަށް ނުވަތަ އީރާނަށް އަސްކަރީ ހަމަލާދޭން ނުފެންނަ ކަމަށް، އެމެރިކާގެ އަސްކަރިއްޔާގެ މިހާރުގެ އެތައް ވެރީންނެއްވެސް، ރައީސް ޑޮނަލްޑް ޓްރަމްޕަށް މަޝްވަރާ ދިން ކަމަށް، އެމެރިކާގެ މީޑިއާއިންވެސް ރިޕޯޓް ކުރިއެވެ.
އެމީހުން އެވާހަކަ ދެއްކީ، އީރާނުގެ އަސްކަރިއްޔާގެ ގާބިލްކަން އިހްސާސް ކުރެވޭތީއާއި، އީރާނުން ހަތިޔާރުގެ ސްޓޮކް އިތުރުކޮށް، އެމެރިކާއާއެކު ދިގުލައިގެންދާ ކުރިމަތިލުމަކަށް ތައްޔާރުވެފައި ތިބިކަން އީރާނުންވެސް ހާމަކުރަމުން ދިއުމާ އެކުގައެވެ.
2025 ވަނަ އަހަރު އީރާނާއި އިސްރާއީލާ ދެމެދު ކުރި 12 ދުވަހުގެ ހަނގުރާމައާއި، އަދި އެ ހަނގުރާމައިގެ ތެރޭގައި އެމެރިކާއިން އީރާނަށް ދިން ވަރުގަދަ ވައިގެ ހަމަލާތަކަށްފަހު އީރާނުން ޗައިނާ، ރަޝިޔާ އަދި އުތުރު ކޮރެއާއިން އެންމެ ޒަމާނީ އެތައް މިސައިލާއި، ބޮމާއި، މިސައިލުން ދިފާއުވާ އެތައް އައްޑަނައަކާއި، އެނޫންވެސް ހަތިޔާރާއި، ހަނގުރާމައިގެ އެތައް ޓެކްނޯލޮޖީއެއް ހޯދިއެވެ. އީރާނުން އުފައްދާ ބެލިސްޓިކް މިސައިލާއި، ހައިޕަރސޮނިކް ބެލިސްޓިކް މިސައިލާއި، ހަމަލާދޭ ޑްރޯން އުފެއްދުން އެތައްގުނަ އިތުރުކޮށް ސްޓޮކް ބޮޑުކުރިއެވެ.
އަދި އަސްކަރީ ތަމްރީނުތައް ހަދައި، އީރާނުގެ އެއްގަމާއި، ކަނޑާއި އަދި ވައިގެ ސިފައިންގެ ލަޝްކަރުތައްވެސް އޮތީ ތައްޔާރުގައެވެ.
އެމެރިކާއާއި އިސްރާއީލުން އީރާނަށް ބޮންއަޅަން ފެށުމުން، އީރާނުންވެސް ދަނީ ތަންފުކެއްވެސް ދޫނުދީ، އިސްރާއީލަށާއި، އަދި ސަރަހައްދުގައި ގާއިމްކޮށްފައިވާ އެމެރިކާގެ އަސްކަރީ ބޭސްތަކަށާއި، އެއަރބޭސްތަކަށާއި، އަދި ކަނޑުގެ ސިފައިންގެ ބޭސްތަކަށްވެސް ވަރުގަދަ ވައިގެ ހަމަލާތަކެއް ދެމުންނެވެ.
އަދި އެމެރިކާއިން އީރާނު ކައިރިއަށް ޖަމާކޮށްފައިވާ ކަނޑުގެ ބިޔަ ލަޝްކަރުތަކަށްވެސް އީރާނުން ގެންދަނީ ހަމަލާތައް އަމާޒުކުރަމުންނެވެ.
އެއްފަހަރާ އީރާނުން ސަރަހައްދުގެ އެތައް ގައުމެއްގައި ހުރި އެމެރިކާ އަދި އިސްރާއީލުގެ ތަންތަނަށް ވައިގެ ހަމަލާތައް ދޭން ފެށުމާއި، އެ ތަންތަނަށް ލިބެމުންދާ ގެއްލުންތައް ބޮޑުކަމުން އީރާނު އަސްކަރިއްޔާގެ ގާބިލްކަން ފެނި ދުޝްމަނުންވެސް ވަނީ ހައިރާންވެފައެވެ.
އީރާނުގެ ކަނޑުގެ ސިފައިންގެ މަނަވަރުތައް ގޮއްވާލުމަށްފަހު އެމެރިކާގެ ރައީސް ޓްރަމްޕް އުފާކޮށްފައި އެ ވާހަކަ ދެއްކިއިރު، އީރާނު ކަނޑުގެ ސިފައިން ދުޝްމަނުންނަށް ހަމަލާދިނުމަށް ބޭނުންކުރަނީ މަނަވަރުތައް ނޫންކަމާއި، މިސައިލް ހަރުކޮށްފައިވާ އަދި މީހަކާ ނުލާ ދަތުރުކުރާ ކުދި ގަންބޯޓުތައްކަން އެނގުމުން އެމެރިކާގެ ޖެނެރަލުންނަށް ލިބުނީ އިތުރު މާޔޫސްކަމެކެވެ.
އީރާނުން ދުޝްމަނުންނަށް ދެމުންގެންދާ ހަމަލާތައް ދުވަހެއް ދުވަހަކަށް ވަރުގަދަ ކުރަމުން ދިއުމާއި، ކޮންމެ ދުވަހަކުވެސް މުޅިން އައު ބާވަތެއްގެ މިސައިލުން ހަމަލާދެމުން ގެންދިއުމާއި، ކުރިއަށް ހުރި ދުވަސްތަކުގައި ދުޝްމަނުން ދުވަހަކުވެސް ނުދެކޭ ޒާތުގެ ހަތިޔާރުން ހަމަލާތައް ދޭނޭ ކަމަށް އީރާނު އަސްކަރިއްޔާއިން ބުނަމުން ގެންދިއުމާއެކު، އެމެރިކާއާއި އިސްރާއީލަށް ލިބޭ ސިހުންތައް ހައްތަހާ ބޮޑުވެގެން ދެއެވެ.
އީރާނުގެ ނުރައްކާ ފެނި، އެމެރިކާއިން އަރަބި ކަނޑަށް ޖަމާކުރި ގިޔަ މަނަވަރުތަކާއި، ހަތިޔާރާއި ސިފައިންވެސް މިހާރު ވަނީ ސައިޕްރަސް ކައިރިއަށް ގެންގޮސްފައެވެ.
އެމެރިކާއާއި އިސްރާއީލުން ރެއާއި ދުވާލު ކެނޑިނޭޅި އީރާނުގެ އެތަންމިތަނަށް ވަރުގަދައަށް ބޮންއަޅަމުން ދިއުމާއެކުވެސް އީރާނު ހުއްޓުވަން ވަނީ ނުކުޅެދިފައެވެ. އެމެރިކާއާއި އިސްރާއީލުން މިދިޔަ ހޮނިހިރު ދުވަހުން ފެށިގެން މިހާތަނަށް އީރާނަށް ދެހާހަށްވުރެ ގިނަ ވައިގެ ހަމަލާތައް ދީފައި ވެއެވެ. ބޮންއަޅަމުން ގެންދަނީ ވަކިތަނެއް ބަލައިގެނެއް ނޫނެވެ.
އެކަމަކު، އެމެރިކާ އަސްކަރިއްޔާގެ ކުރީގެ ޖެނެރަލުންނާއި އަދި މިހާރުގެ ޖެނެރަލުން އިންޒާރު ކުރި ކަންތައް މިހާރުވަނީ ލައިގެންފައެވެ. މިސައިލާއި ބޮމުގެ ސްޓޮކް މަދުވަމުން ދިއުމާއި، ބޭނުންވާ ވަރަށް އެތަކެތި ނުއުފެއްދޭތީ އެކަމުގެ ކަންބޮޑުވުން ޖެނެރަލުންވަނީ ފާޅުކޮށްފައެވެ.
އެމެރިކާ ސިފައިން އީރާނަށް ވައިގެ ހަމަލާތައް ދެމުންގެންދާއިރު، ހަމަ އެ ވަރަށް އިސްރާއީލަށްވެސް ހަތިޔާރު ފޯރުކޮށްދޭން ޖެހެއެވެ. އަދި މެދުއިރުމަތީގައި ހުރި އެމެރިކާގެ ބޭސްތައް ހުރި ގައުމުތަކަށްވެސް ހަތިޔާރު ދޭންޖެހެއެވެ.
އީރާނު އަސްކަރިއްޔާގެ އިސް ވެރިން ވިދާޅުވަނީ، ދުޝްމަނުންގެ އަތުގައި ހަތިޔާރާއި، ގޮވާތަކެތީގެ ސްޓޮކް ހުރި މިންވަރު އީރާނަށް ވަރަށް ރަނގަޅަށް އެނގޭ ކަމަށެވެ. އީރާނުން ރައްދު ހަމަލާތައް ދެމުންގެންދަނީ އެކަން އެނގިތިބެ ކަމަށްވެސް ވިދާޅުވެއެވެ.
އެމެރިކާއިން އީރާނަށް ހަމަލާތައް ދެމުންގެންދާ އަދަދުތަކަށް ބަލާއިރު، އެމެރިކާގެ ހަތިޔާރުގެ ސްޓޮކް ހުސްވެ ނުވަތަ މަދުވެ، ސަރަހައްދުގައި ހުރި އެމެރިކާގެ އަސްކަރީ ބޭސްތައް ދިފާއުކުރަން ކުރަމުންދާ މަސައްކަތް ހުއްޓި، އަދި އިސްތިއުމާރީ ބާރުން ހިފާފައިވާ ބިންތައް ދިފާއުކުރަން ކުރާ މަސައްކަތްވެސް އިސާހިތަކު ހުއްޓިގެން ދާނޭ ކަމަށް އީރާނު އަސްކަރިއްޔާގެ ވެރިން ވިދާޅުވެއެވެ. އެކަމަށް ދެން ނަގާނީ މަދު ދުވަސްކޮޅެއް ކަމަށްވެސް ވިދާޅުވެއެވެ.
އީރާނަށް ހަމަލާތައް ދޭން ފެށުމަށްފަހު އެމެރިކާގެ ހަނގުރާމައިގެ ރައީސް ޑޮނަލްޑް ޓްރަމްޕް ބުނީ، ހަމަލާތައް ކުރިއަށްދާނީ އެންމެ ހަފްތާއަކަށް ކަމަށެވެ. ފުރަތަމަ ދުވަހު އީރާނުގެ ރައްދުފެނި ފަހުން ބުނީ ހަމަލާތައް ކުރިއަށްދާނީ ހަތަރު ހަފްތާއަށް ކަމަށެވެ.
ޓްރަމްޕް މިގޮތަށް ވަގުތު ކަނޑައަޅަމުން ދިޔަ ނަމަވެސް، އެމެރިކާގެ އަސްކަރިއްޔާ ތެރޭގައި ބޮޑެތި ކަންބޮޑުވުންތައް އުފެދިފައި ވެއެވެ. އީރާނުގެ މައްޗަށް އެމެރިކާއާއި އިސްރާއީލަށް ކުރި ހޯދިދާނެ ކަމާމެދު ޝައްކުތައް އުފެދި “އެހެން ގޮތްގޮތް” ހޯދުމުގެ މަސައްކަތް ކުރަމުންދަނީ އެހެންވެގެންނެވެ.
