ހަތިޔާރު އެޅި ހަނގުރާމަވެރި ގްރޫޕްތައް އިރާގު ތެރެއިންލާފައި އީރާނުގެ ސަރަހައްދަށް ވަންނަން ފުރުސަތު ދީފިނަމަ އެ އެ ސަރަހައްދު ސުންނާފަތި ކޮށްލާނޭ ކަމަށް އީރާނުން އިންޒާރު ކޮށްފިއެވެ.
އީރާނު އަސްކަރިއްޔާގެ ތަރުޖަމާނު ވިދާޅުވީ، އިރާގުގެ އުތުރުގެ ވެރިން ހަތިޔާރު އެޅި ގްރޫޕްތަކަށް ފުރުސަތު ދީފިނަމަ އެ ސަރަހައްދުގެ މުޅި އިންފްރާސްތްރަކްޗަރ އަދި ލިބިފައިވާ ހުރިހާ ގާބިލްކަމެއް އީރާނުން ސުންނާފަތިކޮށް ބިމާހަމަ ކޮށްލާނޭ ކަމަށެވެ.
އީރާނުން މިފަދައިން އިންޒާރު މިކުރީ، އިރާގުގައި ޒާތީ ވެރިކަމެއް ކުރާ ކުރުދިސްތާނު ތެރެއިންލާފާއި ހަތިޔާރު އެޅި ގްރޫޕްތައް އީރާނުގެ ތެރެއަށް ވައްދައި، އީރާނު ސިފައިންނާ ދެކޮޅަށް ހަނގުރާމަކޮށް އީރާނުގެ ސަރުކާރު ވައްޓާލަން އެމެރިކާއާއި އިސްރާއީލުން މަސައްކަތް ކުރަމުންދާތީއެވެ.
އިރާގުގެ ކުރުދިސްތާނުގައި އީރާނަށް ނިސްބަތްވާ ކުރުދީ ގްރޫޕްތައްވެސް ހަރަކާތްތެރި ވެއެވެ.
ހަތިޔާރު އެޅި ޓެރަރިސްޓް ގްރޫޕްތައް އީރާނުގެ ތެރެއަށް ފޮނުވުމަށްޓަކައި އެމެރިކާގެ ރައީސް ޑޮނަލްޑް ޓްރަމްޕްވަނީ ކުރުދިސްތާނުގެ ވެރިންނަށާއި، ކުރުދީ ހަނގުރާމަވެރި ލީޑަރުންނަށްވެސް ގުޅައި ވާހަކަދައްކައި ހުށަހެޅުންތައް ހުށަހަޅާފައެވެ.
އެމެރިކާގެ ރައީސަށް އޮންނަ ޕްރޮޓޮކޯލް ފުނޑާލައި، ޓްރަމްޕްވަނީ ވަރަށް ދަށު ދަރަޖައަކަށް ވެއްޓިފައެވެ.
ޓްރަމްޕް އެ ދަރަޖައަށް ވެއްޓުނީ، ތަކުރާރުކޮށް އާދޭސް ކުރުމުންވެސް އީރާނުގެ ރައްޔިތުން އޭނާއަށް އިޖާބަ ނުދިނުމުން އެހެން ގޮތަކުން އީރާނުގެ ސަރުކާރު ވައްޓާލުމަށެވެ.
މަގުތަކަށް ނުކުމެ އީރާނު ސަރުކާރު ވައްޓާލަން ޓްރަމްޕާއި ނަތަންޔާހޫ ތަކުރާރުކޮށް އެދުމުންވެސް އީރާނު ރައްޔިތުން ގެންދަނީ އެކަމާ ދެކޮޅު ހަދަމުންނެވެ. އީރާނުގެ މަގުތަކަށް މިހާރުވެސް ނުކުމެފައިވާ މީހުން ގޮވަމުންދަނީ “އެމެރިކާއަށް މަރު، ޒަޔަނިސްޓުންނަށް މަރު” މިހެންނެވެ.
އީރާނުގެ އެކި ކަންކޮޅުތަކަށް އެމެރިކާއާއި އިސްރާއީލުން ރެއާއި ދުވާލު ވަރުގަދައަށް ބޮންއަޅައި އަދި މިސައިލް ހަމަލާތައް ދެމުން ގެންދާއިރު، އާންމުން ދިރިއުޅޭ ސަރަހައްދެއް، ސްކޫލެއް، ހޮސްޕިޓަލެއް އެނޫންތަނެއް ނުބަލައެވެ.
މި ހަމަލާތަކުގައި މިހާތަނަށް އީރާނުން އެތައްސަތޭކަ އާންމުން މަރުވެފައިވާކަން އީރާނުން ހާމަކޮށްފައި ވެއެވެ.
ކުރުދީ ހަނގުރާމަވެރި ގްރޫޕްތައް އީރާނުގެ ތެރެއަށް ވަދެގަތުމަށް މަގުފަހި ކުރުމުގެގޮތުން އެމެރިކާއާއި، އިސްތިއުމާރީ އިސްރާއީލުން ގެންދަނީ އީރާނުގެ އިމުގެ އެތެރެއަށް ވަރުގަދައަށް ބޮންއަޅައި މުޅި ސަރަހައްދު ސުންނާފަތި ކުރަމުންނެވެ. އެމެރިކާއާއި އިސްރާއީލު މަސައްކަތް ކުރަނީ ހަތިޔާރު އެޅި ގްރޫޕްތަށް އެއްވެސް ހުރަހެއް، ދެކޮޅުވެރިކަމެއްނެތި އީރާނުގެ ތެރެއަށް ވަދެވޭގޮތް ހެދުމަށެވެ.
އީރާނުން ހުކުރު ދުވަހު ބުނެފައިވަނީ، އިމުގެ ފުރިހަމަ ކޮންޓްރޯލް އޮތީ އީރާނަށް ކަމަށާއި، އީރާނުގެ ޖާސޫސީ މަސައްކަތްތައްވެސް އެ ސަރަހައްދުގައި ފުރިހަމައަށް ހިނގަމުންދާ ކަމަށެވެ.
އިރާގުގެ ކުރުދީ ލީޑަރުން ބުނަމުންދަނީ، ކުރުދިސްތާން ސަރަހައްދުގެ ތެރެއިން އީރާނަށް އަދި އެއްވެސް ބަޔަކު ނުވަންނަ ކަމަށާއި، އެ ފުރުސަތުވެސް ނުދޭނޭ ކަމަށެވެ.
ކުރުދިސްތާނުގައި އޮންނަ އެމެރިކާގެ އަސްކަރީ ބޭހަށާއި، އެމެރިކާގެ ކޮންސިއުލޭޓަށް އީރާނުން ކުރިން ވަރުގަދަ ހަމަލާތަކެއް ދީ ބޮޑެތި ގެއްލުންތައް ދީފައިވެއެވެ.
މީގެއިތުރުން، އިރާގުގެ ވެރިރަށް ބަޣުދާދުގެ އަސްކަރީ އެއަރޕޯޓަށާއި، ކައިރީގައި ހުރި އެމެރިކާ އެމްބަސީގެ ލޮޖިސްޓިކް ސަޕޯޓް ސެންޓަރަށް މިރޭވަނީ ވަރުގަދަ ހަމަލާތަކެއް އަމާޒުވެފައެވެ. މި ހަމަލާ އައީ އިރާގުގެ ތެރެއިން ކަމަށް އިރާގުން ބުނެއެވެ.
މީގެއިތުރުން، އިރާގުގެ ބަސަރާގައި ހުންނަ އެމެރިކާގެ ތެލުގެ ކުންފުންޏަކަށްވެސް އިރާގު ތެރެއިން ވަރުގަދަ ހަމަލާތަކެއް ދީފައި ވެއެވެ.
އެމެރިކާއާއި އިސްރާއީލުން އީރާނަށް ހަމަލާ ދޭން ފެށުމާއެކު، އިރާގުގެ ހަތިޔާރު އެޅި ގްރޫޕްތަކުން ވަނީ، އެމެރިކާގެ ބޭސްތަކާއި، އެމެރިކާގެ މަސްލަހަތުތަކަށް ވަރުގަދަ ހަމަލާތަކެއް ދީ ބޮޑެތި ގެއްލުންތައް ދީފައެވެ.
