ތުރުކީގެ ރައީސް ރަޖަބް ތައްޔިބް އުރުދުޣާންއާ ދެކޮޅަށް އިންޓަރނޭޝަނަލް ކްރިމިނަލް ކޯޓަށް މައްސަލަ ހުށަހަޅަން، އިސްތިއުމާރީ ދައުލަތުގެ ބޮޑު މުޖުރިމު ނަތަންޔާހޫ ތައްޔާރުވާން ފަށައިފިއެވެ.
ނަތަންޔާހޫ މިހާރުވަނީ އިންޓަރ މިނިސްޓީރިއަލް ޓީމަކާއި ލީގަލް ޓީމެއް އެކުލަވާލައި، ތުރުކީގެ ރައީސާ ދެކޮޅަށް އައިސީސީއަށް ހުށަހަޅާ މައްސަލައިގެ ލިޔެކިއުންތައް ތައްޔާރުކުރުމަށް އަމުރު ކޮށްފައެވެ.
މިކަން އިސްރާއީލުގެ ނޫސްތަކުންވެސްވަނީ ރިޕޯޓް ކޮށްފައެވެ.
ތުރުކީގެ ރައީސާ ދެކޮޅަށް ގާނޫނީ މައްސަލައެއް ތައްޔާރު ކުރަން ނަތަންޔާހޫ އެންގީ މައިގަނޑު ދެކަމެއްގެ މައްޗަށް ބިނާކޮށެވެ. އެއީ، ތުރުކީގެ ބައިމަދު ކުރުދީ ނަސްލުގެ މީހުންނާ ދެކޮޅަށް ތުރުކީގެ ރައީސް “ގަތުލުއާންމު” ހިންގުމާއި އަދި ފަލަސްތީނުގެ ހަމާސް ޖަމާއަތަށް އުރުދުޣާން ފަންޑުކުރާ ކަމަށް ބުނެއެވެ.
މީގެއިތުރުންވެސް، ތުރުކީގެ ރައީސާ ދެކޮޅަށް އިންޓަރނޭޝަނަލް ކްރިމިނަލް ކޯޓަށް މައްސަލަ ހުށަހަޅަން ނަތަންޔާހޫ އަމުރުކުރުމުގެ ފަހަތުގައި ވަރަށް ގިނަ ކަންކަން ހިމެނޭ ކަމަށް، މަސްރަހް ދިރާސާކުރާ ފަރާތްތަކުން ބުނެއެވެ.
ތުރުކީގެ ރައީސް ރަޖަބް ތައްޔިބް އުރުދުޣާންއާ ދެކޮޅަށް އައިސީސީއަށް މައްސަލަ ހުށަހަޅަން ނަތަންޔާހޫ ނިންމީ، ނަތަންޔާހޫ ހައްޔަރު ކުރުމަށް ރެޑް ނޯޓިސް ނެރުމަށް އޭނާ އިންޓަރޕޯލްގައި އެދިވަޑައިގެންފައިވާ ކަމަށް ތުރުކީގެ ރައީސް ވިދާޅުވުމުން އެކަމާ ރުޅިއައިސްގެންނެވެ.
މުޖުރިމު ނަތަންޔާހޫ ހައްޔަރު ކުރުމަށް އިންޓަރނޭޝަނަލް ކްރިމިނަލް ކޯޓުން 2024 ވަނަ އަހަރުގެ ނޮވެމްބަރުމަހު ވަނީ އަމުރު ނެރެފައެވެ. އެއީ، ޣައްޒާގެ ނަސްލުނައްތާލުމުގެ ޖަރީމާތައް ހިންގުމާއި، ޣައްޒާގެ އާންމުން ބަނޑަށްމެރުމުގެ ޕްލޭންތައް ހަދައި ހިންގުމާއި، އިންސާނީ އެހީ އެތެރެކުރިޔަނުދީ ހުއްޓުވުމާއި އަދި ހަނގުރާމައިގެ ޖަރީމާތަކާއި، އިންސާނިއްޔަތާ ޚިލާފް ޖަރީމާތައް ހިންގާ މައްސަލައިގެ ޝަރީއަތަށެވެ.
ނަތަންޔާހޫ ހައްޔަރުކުރަން އައިސީސީން އަމުރު ނެރުމުގެ މާނައަކީ، އެ ކޯޓުގައި ބައިވެރިވާ ކޮންމެ ގައުމަކަށް އޭނާ ދިޔަޔަސް ހައްޔަރުކޮށްގެން ކޯޓާ ހަވާލުކުރަން ލާޒިމްވުމެވެ. ކޯޓު މުއާހަދާގައި ބައިވެރި ނުވިނަމަވެސް، އެއީ ދުނިޔޭގެ ޖިނާއީ ކޯޓަށް ވުމުން ކޮންމެ ގައުމެއްގެ ކޮންމެ މީހެއްގެ މައްސަލަތައް ބެލުމުގެ އިހްތިސާސް އައިސީސީއަށް ލިބިގެން ވެއެވެ.
އެހެން ނަމަވެސް، އެމެރިކާއިން ތަކުރާރުކޮށް ގެންދަނީ ކޯޓުގެ އަމުރާ ދެކޮޅު ހަދައި ނަތަންޔާހޫއަށް ހިމާޔަތް ދެމުންނެވެ. އައިސީސީން އަމުރު ނެރުނު ފަހުން އެކަނިވެސް މިހާތަނަށް ނަތަންޔާހޫ 5 ފަހަރެއްގެމަތިން އެމެރިކާއަށް ގޮސްފައި ވެއެވެ. ކޮންމެ ފަހަރަކު ރަތްދޫލައިގެ މަރްހަބާ ކިޔައެވެ. ހަންގޭރީންވެސް އެފަދައިން ކަންކޮށްފައެވެ.
ނަތަންޔާހޫ ދަތުރުކުރާ މަތިންދާ ބޯޓު، ޔޫރަޕްގެ ގައުމުތައް ކަމަށްވާ ފްރާންސް، އިޓަލީ އަދި ގްރީސް މަތިން އުދުހުމުގެ ހުއްދަ އެގައުމުތަކުން ދެމުން ގެންދެއެވެ. މަތިންދާ ބޯޓަށް ހުރަސް އަޅާފާނެހެން ހީވާ ގައުމުތަކުގެ މަތިން ނުއުދުހެއެވެ. އަދި އެފަދަ ގައުމަކަށްވެސް ނަތަންޔާހޫ ނުދެއެވެ. އޭނާ އުޅެނީ އިންޓަރނޭޝަނަލް ކްރިމިނަލް ކޯޓަށް ފިލައިގެންނެވެ.
ނުވިތާކަށް، ނަތަންޔާހޫ ހައްޔަރު ކުރުމުގެ އަމުރު ނެރުނު ކަމަށްޓަކައި، އެމެރިކާގެ ބައިވެރިންނާ ދެކޮޅަށް މަސައްކަތްކުރާ ކޯޓެއް ކަމަށްބުނެ އިންޓަރނޭޝަނަލް ކްރިމިނަލް ކޯޓު ރޫޅާލުމުގެ މަސައްކަތް އެމެރިކާގެ ރައީސްގެ އަމުރަށް އެމެރިކާ ސަރުކާރުންވަނީ ފަށާފައެވެ. އެ މަސައްކަތުގެ ދަށުން، އައިސީސީގެ އިސް ފަނޑިޔާރުގެ ބޮލުގައި ދޮގު އިލްޒާމުތަކެއް އަޅުވައި އޭނާ މަގާމުން ދުރުކޮށްފައި ވާއިރު، އައިސީސީގެ ރައީސާއާ ދެކޮޅަށްވެސް ދަތިކުރުމުގެ ފިޔަވަޅު އަޅާފައިވެއެވެ. އަދި އައިސީސީއަށް ޑޮލަރުން އެއްވެސް މުއާމަލާތެއް ނުކުރެވޭނޭގޮތް ހަދައި ކޯޓުގެ މަސައްކަތް ހުއްޓުވަންވެސް އެމެރިކާއިންވަނީ މަސައްކަތް ފަށާފައެވެ. މިއީ މުޅިންވެސް ނަތަންޔާހޫގެ ހައްގުގައި އެމެރިކާއިން ކުރަމުންދާ ކަންކަމެވެ.
އިންޓަރނޭޝަނަލް ކްރިމިނަލް ކޯޓަށް ފިލައިގެން އުޅޭ މީހަކު، ތުރުކީގެ ރައީސް އުރުދުޣާންގެ މައްޗަށް އެ ކޯޓަށް މައްސަލަ ހުށަހަޅަން އުޅޭތީ ދުނިޔޭގެ އެތައް ބަޔަކު އެކަމަށް މަލާމާތްކޮށް ޖޯކްޖަހަމުން އެބަ ގެންދެއެވެ.
އެމެރިކާއާއި އިސްރާއީލަކީވެސް އިންޓަރނޭޝަނަލް ކްރިމިނަލް ކޯޓު ގަބޫލުކުރާ ބައެއް ނޫނެވެ. އުރުދުޣާންގެ މައްޗަށް ސީދާ އިސްރާއީލުން އައިސީސީއަށް ނުވަތަ ތިންވަނަ ގައުމެއް މެދުވެރިކޮށް މައްސަލަ ހުށަހެޅުން އެކަށީގެންވާ ކަމަށް ރިޕޯޓްތައް ބުނެއެވެ. ތުރުކީއަކީވެސް އައިސީސީ އުފެއްދި މުއާހަދާގައި ބައިވެރިވާ ގައުމެއް ނޫނެވެ.
