އިރާގުގައި ތިބި އެމެރިކާ ސިފައިން އިރާގުން ފޭބުމާ ގުޅިގެން އީރާނުގެ އިންގިލާބީ ލަޝްކަރުން މިއަދު ބަޔާނެއް ނެރެފިއެވެ.
އީރާނުގެ އިންގިލާބީ ލަޝްކަރު – އައިއާރްޖީސީން ނެރުނު ބަޔާނުގައި، އެމެރިކާ ސިފައިން އިރާގުން ފޭބުމަކީ ތާރީޚީ ކާމިޔާބީއެއްގެ ގޮތުގައި ބުނެފައި ވެއެވެ. ހަމަ އެއާއެކު، މިއީ އެމެރިކާ ސިފައިން މުޅި ސަރަހައްދުން “ފައްސާލުމުގެ” ފެށުން ކަމަށްވެސް ބުނެފައި ވެއެވެ.
އިންގިލާބީ ލަޝްކަރުގެ ބަޔާނުގައި، އެތައް އަހަރެއް ވަންދެން އިރާގު ހިފައިގެން ތިބި އެމެރިކާ ސިފައިން އިރާގުން ބޭރުކޮށްލުމަށް ހަނގުރާމަކޮށް މަރުވެދިޔަ އެންމެންގެ ހަންދާން އައުކޮށްފައި ވެއެވެ. އޭގެ ތެރެއިންވެސް އީރާނުގެ އިންގިލާބީ ލަޝްކަރުގެ ޖެނެރަލް ގާސިމް ސުލައިމާނީގެ ނަން ފާހަގަ ކޮށްފައި ވެއެވެ.
ގާސިމް ސުލައިމާނީއަކީ، އިރާގުގައި އެމެރިކާ ސިފައިންނާ ދެކޮޅަށް އަސްކަރީ އޮޕަރޭޝަންތައް ހިންގައި އެމެރިކާ ސިފައިން އިރާގުން ބޭރުކޮށްލުމަށް ކުރި މަސައްކަތުގެ އިސް މޭސްތިރިއެކެވެ.
އައިއާރްޖީސީން ބުނެފައިވަނީ، އެމެރިކާ ސިފައިން އިރާގުން ފޭބުމަކީ އެމެރިކާ ސިފައިންގެ އިސްތިއުމާރާ ދެކޮޅަށް މަސައްކަތްކުރި އެންމެނަށް ލިބުނު ކާމިޔާބީއެއް ކަމަށެވެ. ހަމައެއާއެކު، މިއީ، އިރާގުގެ ރައްޔިތުން އެމީހުންގެ މިނިވަންކަން ދިފާއުކުރުމުގައި ކެތްތެރިވުމުގެ ނަތީޖާ ކަމަށްވެސް ބުނެފައި ވެއެވެ.
އެމެރިކާ ސިފައިންނާ ދެކޮޅަށް ހަނގުރާމަކުރި މުޖާހިދުންނާއި އަދި އިރާގުގެ ރައްޔިތުންނަށްވެސް އީރާނުގެ އިންގިލާބީ ލަޝްކަރުން ތަހުނިޔާ ކިޔާފައި ވެއެވެ.
އިރާގުން އެމެރިކާ ސިފައިން ފޮނުވާލެވުމަކީ ހުޅަނގު އޭޝިޔާގެ ހުރިހާ ސަރަހައްދަކުންނާއި އިސްލާމީ ދުނިޔޭގެ ޖިއޮގްރަފީއިން އެމެރިކާ ބޭރުކޮށްލުމުގެ ފެށުން ކަމަށް ބުނެފައި ވެއެވެ.
މި ދަނޑިވަޅުގައި، އިރާގުގެ ސަލާމަތަށް ނުރައްކާކޮށް ހަމަޖެހުން ނަގާލަން ބަޔަކު މަސައްކަތް ކޮށްފާނެ ކަމަށް ވިސްނައި، ސަމާލުވެ ތިބުމަށް އީރާނުގެ އިންގިލާބީ ލަޝްކަރުން އިރާގު ސަރުކާރަށާއި، އިރާގުގެ ރައްޔިތުންނަށާއި އަދި އެމެރިކާ ސިފައިންނާ ދެކޮޅަށް މަސައްކަތްކުރި ފައުޖުތަކަށް އިލްތިމާސް ކޮށްފައި ވެއެވެ.
އިރާގުގައި ތިބި އެމެރިކާގެ ކޮމްބެޓް ފައުޖުތަކާއި، ލޮޖިސްޓިކް ސަޕޯޓް ޓީމުތައް އިރާގުން އެއްކޮށް ބާލާފައިވަނީ މި ނިމުނު ސެޕްޓެމްބަރު މަހުއެވެ. އިރާގުން ސިފައިން ބޭލުން އެމެރިކާއިން ފްރޭމްކޮށްފައިވަނީ “އައިސިސްއާ ދެކޮޅަށް” ހިންގި އަސްކަރީ އޮޕަރޭޝަން ނިމުމުން ކަމަށެވެ.
އެމެރިކާ ސިފައިންނާއި އަދި އެމެރިކާއާ ބައިވެރިވާ ގައުމުތަކުގެ ސިފައިންގެ ބެލުމުގެ ދަށުގައި ހުރި ހުރިހާ އަސްކަރީ ބޭސްތަކެއް އިރާގު ސިފައިންނާ ވަނީ ހަވާލުކޮށްފައެވެ.
2003 ވަނަ އަހަރު އިރާގަށް އެރި އެމެރިކާ ސިފައިން އެތައް އަހަރަކަށްފަހު އިރާގުން އެއްކޮށް ފޭބިދުވަސް އިރާގު ސަރުކާރުން ކަނޑައެޅި ރަސްމީ ބަންދު ދުވަހެއްގެ ގޮތުގައެވެ. އިރާގުގެ ވެރިންވެސް އެކަމާ އުފާކުރިއެވެ. އެމީހުން ސިފަކުރީ އެއީ “މިނިވަން” ދުވަހުގެ ގޮތުގައެވެ.
އިންގިލާބީ ލަޝްކަރުން އެމެރިކާ ސަރުކާރަށް ގޮވާލާފައިވަނީ، ސަރަހައްދުގައި ތިބި އެމެރިކާ ސިފައިން އަނބުރާ ގެންދިއުމަށާއި، ސަރަހައްދުގެ ސަލާމަތީ ކަންކަން ބެލެހެއްޓުން ސަރަހައްދުގެ ގައުމުތަކަށް ދޫކޮށްލުމަށެވެ.
އީރާނުން ކުރިންވެސް ބުނަމުން ގޮސްފައިވަނީ، އެމެރިކާއިން ސަރަހައްދުގައި ފުލުހެއްގެ ދައުރު އަދާކުރަން ނުޖެހޭނޭ ކަމަށާއި، ސަރަހައްދާއި، ސަރަހައްދުގެ ގައުމުތަކުގެ ސަލާމަތާއި ރައްކާތެރިކަން ގައުމުތަކަށް އަމިއްލައަށް ބެލެހެއްޓޭނޭ ކަމަށެވެ.
