އީރާނުގެ ގައުމީ ސަލާމަތާބެހޭ އެންމެ އިސް ވެރިޔާ މޭޖަރ ޖެނެރަލް މުހްސިން ރިޒާއީ، އެމެރިކާގެ ރައީސް ޑޮނަލްޑް ޓްރަމްޕަށް ވަރަށް ބޮޑަށް މަލާމާތް ކުރައްވައިފިއެވެ.
އެކްސްގައި ޕޯސްޓް ކުރެއްވި މެސެޖެއްގައި އީރާނުގެ ސުޕްރީމް ނޭޝަނަލް ކައުންސިލްގެ ޗެއަރމަން މުހްސިން ރިޒާއީ ވިދާޅުވީ، ޑޮނަލްޑް ޓްރަމްޕަކީ އެމެރިކާގެ ތާރީހުގައިވެސް އެމެރިކާ މިހާތަނަށް ދުށް އެންމެ ނާގާބިލް ރައީސް ކަމަށެވެ.
މުހްސިން ރިޒާއީ ވިދާޅުވީ، އެމެރިކާގެ ރައީސް ޓްރަމްޕްގެ ވާހަކަތައް ހުންނަނީ އޭނާގެ އަމިއްލަ ޚިޔާލީފޮލާއަށް ވުރެންވެސް މަތީގައި ކަމަށެވެ.
އެއް ނާކާމިޔާބަކަށްފަހު އަނެއް ނާކާމިޔާބީއާ ކުރިމަތިވަމުން ދާއިރުވެސް އެމެރިކާގެ ރައީސް ގެންދަނީ ހުއްޓާނުލާ މޮޅު ވާހަކަ ދައްކަމުން ކަމަށްވެސް ވިދާޅުވިއެވެ.
ޓްރަމްޕްގެ އަމިއްލަ ޚިޔާލުގައި ކޮންމެ ދުވަހަކީވެސް އޭނާއަށް ކާމިޔާބު ދުވަހެއް ކަމަށާއި، އެކަމަކު ހަގީގަތް ބައްޓަން ކުރަނީ އީރާނާއި، އީރާނުގެ ރައްޔިތުންނާއި، އީރާނުގެ ސިފައިންނާއި، އީރާނުގެ މިސައިލްތައް ކަމަށް މުހްސިން ރިޒާއީ ވިދާޅުވިއެވެ.
ޑޮނަލްޑް ޓްރަމްޕަކީ އެމެރިކާ މިހާތަނަށް ދުށް އެންމެ ނާގާބިލް ރައީސް ކަމަށް މުހްސިން ރިޒާއީ ވިދާޅުވީ، ނޮވެމްބަރު ބާއްވާ މިޑްޓާމް އިންތިޚާބަށް އަމާޒުކޮށް ޓްރަމްޕަށް ދެއްވި ބަހުގެ ވަރުގަދަ ހަމަލާއެއްގެ ގޮތުގައި ކަމަށް، މުހައްލިލުން ސިފަކުރެއެވެ.
އިންތިޚާބުގައި ޓްރަމްޕަށާއި އޭނާގެ ދޯހަޅި ސިޔާސަތުތަކަށް ތާއީދުކޮށް ވޯޓު ނުދިނުމަށް އީރާނުގެ އިންގިލާބީ ލަޝްކަރުންވަނީ އެމެރިކާގެ ރައްޔިތުންނަށް އިލްތިމާސްވެސް ކޮށްފައެވެ.
އެމެރިކާގެ ރައީސް ޓްރަމްޕް ކުރިން ބުނެފައިވަނީ، އޭނާގެ ޕާޓީއަށް އިންތިޚާބު ކާމިޔާބު ވިޔަނުދޭން އީރާނުން މަސައްކަތް ކުރާނޭ ކަމަށް ޔަގީންވާ ކަމަށެވެ. އެމެރިކާއާއެކު އެއްބަސްވުމެއް ހެދުމަށް ދެކޮޅު ހަދައި ކަންތައްތައް އީރާނުން ލަސްކުރަމުން ގެންދަނީވެސް އިންތިޚާބަށް ހުރަސްއެޅުމަށް ކަމަށް ޓްރަމްޕް ބުނެފައި ވެއެވެ.
ޓްރަމްޕްގެ އަމުރަށް އެމެރިކާ އަސްކަރިއްޔާއިން މިހާރު ތައްޔާރުވަމުން ދަނީ، ހަނގުރާމައިގެ އިތުރު ލަޝްކަރުތައް އީރާނު ކައިރިއަށް ޖަމާކުރުމަށެވެ.
އެގޮތުން، އެމެރިކާގެ ހަނގުރާމަމަތީ މަތިންދާ ބޯޓު އުފުލާ ބިޔަ މަނަވަރު ޔޫއެސްއެސް ތިޔޮޑޯރ ރޫޒްވެލްޓް ހިމެނޭ ސްޓްރައިކް ގްރޫޕް މެދުއިރުމައްޗަށް ދިއުމަށްޓަކައި ފުރާފައިވާއިރު، ލޭންޑިން ފޯސްގެ ބައެއްގެ ގޮތުގައި 2،000 އަށް ވުރެ ގިނަ ސިފައިންނާއެކު މެކިން އައިލެންޑް މެރިން އެކްސްޕެޑިޝަނަރީ ފައުޖެއްވެސް މެދުއިރުމައްޗަށް ދިއުމަށް ފުރާފައި ވެއެވެ.
ޓްރަމްޕް ތަކުރާރުކޮށް ބުނަމުން ގެންދަނީ، މިޑްޓާމް އިންތިޚާބަށްފަހު އީރާނަށް ހަމަލާދޭން ފަށާނޭ ކަމަށެވެ. އަދި އީރާނު “ނައްތާލަން” އދގެ އާންމު މަޖިލީހުގެ ތަގްރީރުގައި އޭނާ ދެއްކި ވާހަކަ ދިފާއުކޮށް ޓްރަމްޕް އިއްޔެ ބުނެފައިވަނީ ދުނިޔޭގައި ސުލްހަ ގާއިމްކުރެވޭނީ “އީރާނު ނައްތާލައިގެން” ކަމަށެވެ.
