ހއ.މުރައިދޫ މޮނިޓަރިން ހާލަތަށް ގެނެސްފައިވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އެރަށަށް އަންގައިފިއެވެ.
އެޗްޕީއޭއިން މުރައިދޫ މޮނިޓަރިން ހާލަތަށް ލުމާއި ގުޅިގެން އިތުރު މައުލޫމާތު ހޯދާލުމަށް ”ތިލަދުން”އިން މުރައިދޫ ސިއްޙީ މަރުކަޒު ހިންގެވުމާއި ހަވާލުވެ ހުންނެވި ޙުސައިން ނިޔާޒަށް ގުޅުމުން ވިދާޅުވީ ”މިވަގުތު މީޑިއާއަށް އެއްވެސް މައުލޫމާތެއް ހިއްސާކުރެވެން ނެތް” ކަމަށެވެ.
އެޗްޕީއޭއިން މުރައިދޫ މޮނިޓަރިންނަށް ލާފައިވާކަން އަންގައި، މުރައިދޫ ކައުންސިލްއަށް ފޮނުވި ލިޔުމުގައި ބުނެފައިވަނީ ކޯވިޑު 19 އާ ގުޅިގެން، ޞިއްޙީ ގޮތުން އިތުރަށް ބަލަންޖެހޭ ކަންކަން ބެލުމަށްކަމަށް އެރަށް މޮނިޓަރިންނަށް ލާފައިވާ ކަމަށެވެ.
އަދި އެ ރަށުގައި މިވަގުތު ތިބި އެއްވެސް މީހަކު އެ އޭޖެންސީން ވަކިގޮތެއް އަންގަންދެން ރަށުން ފޭބުމާއި، އެ އޭޖެންސީގެ ހުއްދަނެތި އެއްވެސް މީހަކު އެ ރަށަށް އެރުން މަނާކޮށްފައިވާކަމަށް އެ ލިޔުމުގައި ބުނެފަ ވެއެވެ.
މިލިއުމިގައި އިތުރަށް ބުނެފައިވަނީ މިހާރު ދުނިޔޭގައި ހަލުވިކަމާއެކު ފެތުރެމުންދާ ކޯވިޑު-19 އިން ރައްކާތެރިކުރުމަށް “ޢާންމު ޞިއްޙަތު ރައްކާތެރިކުރުމުގެ ޤާނޫނުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތަށް ލިބިފައިވާ ޤާނޫނީ އިޚްތިޔާރުތަކުގެ ތެރެއިން، އިތުރަށް ބަލަންޖެހޭ ކަންކަން ބަލާ އެހެން އެންގުމެއް އަންގަންދެން އެ ރަށަކީ، އެ އެންގުން އެންގި ލިޔުން ނެރެފައިވާ ވަގުތުން ފެށިގެން މޮނިޓަރ ކުރެވެމުންދާ ރަށެއްކަމަށް ކަނޑައަޅާކަމަށެވެ.
އަދި އެރަށް މޮނިޓަރިންނަށް ލުމާއިގުޅިގެން އެ އޭޖެންސީން އަންގާ ގޮތެއްގެމަތިން، ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަންގާ އެންގުންތަކާއި އަދި ހިންގާ ހަރަކާތްތަކަށް އެއްބާރުލުން ދެއްވާ އަދި މިކަމުގައި މުރައިދޫ ކައުންސިލްގެ އިދާރާގެ ފަރާތުން ކުރަންޖެހޭ ކަންކަން ވިލަރެސް ކުރާނެ ފަރާތެއް ކަނޑައަޅުއްވައި އަންގަވައި ދެއްވުމަށް ވެސް އެޗްޕީއޭއިން ވަނީ އެދިފަ އެވެ.
އެޗްޕީއޭއިން މިރޭ ހއ. ދިއްދޫ ވެސް މޮނިޓަރިން ހާލަތަށް ގެނައެވެ. ނަމަވެސް، އެރަށް މޮނިޓަރިންނަށް ލެވިފައިވަނީ އޮޅުމަކުން ކަމަށް އެޗްޕީއޭ އިން އަންގާފައިވާކަމަށް ދިއްދޫ ކައުންސިލުން ވަނީ ވިދާޅުވެފައެވެ.
