ފްރެންޗް ލީގުގައި އާދީއްތަ ދުވަހުގެރޭ އޮލިމްޕިކް މާސޭ އަތުން އެންމެ ފަހުގެ ޗެމްޕިއަން ޕީއެސްޖީ މުހިންމު މޮޅެއް ހޯދައިފިއެވެ.
ރަށުން ބޭރުގައި ކުޅުނު މެޗުން ޕީއެސްޖީ މޮޅުވީ 2-0 ގެ ނަތީޖާއަކުންނެވެ.
މި މެޗާ މާސޭއިން ކުރިމަތިލިއިރު، އެ ޓީމުގެ އުސޫލުތަކާ ޚިލާފުވި ކަމަށް ބުނެ މާސޭއިން ވަނީ އެ ޓީމުގެ ކޯޗު އަންދްރެސް ވިލަސް-ބޮއަސް ސަސްޕެންޑް ކޮށްފައެވެ. އެހެންކަމުން މި މެޗުގައި މާސޭއަށް އިރުޝާދުދީފައިވަނީ އެކެޑަމީ ކޯޗު ނަސެރު ލާގޭއެވެ.
މި މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ޕީއެސްޖީން ދެ ލަނޑުވެސް ކާމިޔާބުކޮށްފައިވަނީ ފުރަތަމަ ހާފުގައެވެ. އެގޮތުން މެޗު ފަށައިގެން ނުވަވަނަ މިނެޓުގައި ޕީއެސްޖީން ލީޑު ނެގިއިރު، މި ލަނޑު އެ ޓީމަށް ކާމިޔާބުކޮށްދިނީ ޒުވާން ތަރި ކީލިއަން އެމްބާޕޭއެވެ. އަދި މެޗުގެ 24 ވަނަ މިނެޓުގައި މައުރޯ އިކާޑީ ވަނީ ޕީއެސްޖީއަށް ލީޑު ފުޅާކޮށްދީފައެވެ.
މި މެޗުގައި މާސޭއިންވެސް ގިނަ ހަމަލާތަކެއް އުފެއްދި ނަމަވެސް، އެ ޓީމުން މެޗު ނިންމާލަން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗުގެ އިތުރު ވަގުތުގައި މާސޭގެ ފޯވާޑް ޑިމިޓްރީ ޕަޔެޓަށް ސީދާ ރަތް ކާޑެއް ދެއްކުމާ ގުޅިގެންނެވެ. އޭނާއަށް ރަތް ކާޑެއް ދެއްކީ ޕީއެސްޖީގެ މާކޯ ވެރާޓީއަށް ކުރި ނުރައްކާތެރި ފައުލަކާ ގުޅިގެންނެވެ.
މި މޮޅާއެކު ތާވަލުގެ އެއްވަނައިގައި އޮތް ލިލްއާ ދެމެދު އޮތް ފަރަގު ޕީއެސްޖީން ވަނީ ތިން ޕޮއިންޓަށް ކުޑަކޮށްފައެވެ. އެގޮތުން ކުޅުނު 24 މެޗުން ލިބުނު 51 ޕޮއިންޓާއެކު ތާވަލުގެ ތިންވަނައިގައި ޕީއެސްޖީ އޮތްއިރު، އެއްވަނައިގައި އޮތް ލިލްއަށް 24 މެޗުން ލިބިފައިވަނީ 54 ޕޮއިންޓެވެ. އަދި ދެވަނައިގައި އޮތް ލިޔޯނަށް 24 މެޗުން ލިބިފައިވަނީ 52 ޕޮއިންޓެވެ.
