އއ.ބޮޑުފުޅުދޫ ސްޕޯރޓްސް ކުލަބެއް ކަމުގައިވާ ރެވޮލިއުޝަނަރީ ބޮޑުފުޅުދޫ ޖެނަރޭޝަން ސްޕޯރޓްސް ކުލަބުން ވިހި އެކާވީހުގެ ހަރަކާތްތައް ރަސްމީކޮށް 23 ފެބުރުއަރީ 2021 ވަނަ ދުވަހުގެ ހަވީރު 4:00 ގައި އެރަށުގެ ހޭންޑްބޯލް ކޯޓުގައި ފަށައިފިއެވެ.
ރަސްމިއްޔާތު ޝަރަފުވެރި ކޮށްދެއްވައި ހަރަކާތްތައް ފައްޓަވައި ދެއްވީ އާރު ބީޖީ ސްޕޯރޓްސް ކުލަބުގެ ފުޓްސަލް ޓީމްގެ ކުޅުންތެރިޔާ އަދި ކެޕްޓަން މޯލްޑިވްސްގެ އެމްބެސެޑަރ މުހައްމަދު ޝިރުހާންގެ އިތުރުން އއ.ބޮޑުފުޅަދޫ ކައުންސިލްގެ ރައީސް ސުޖާއު އާދަމް އާއި ނައިބް ރައީސް މުހައްމަދު ނާޝިދުގެ އިތުރުން ބޮޑުފުޅަދޫ ސްކޫލްގެ ޕްރިންސިޕަލް މޫސާ ނިމާލެވެ.
އިއްޔެ ފެށިގެން ދިޔައީ ރަށުގެ ކުޅިވަރު ކުޅޭ ހުރިހާ އަންހެން ކަނބަލުންނަށް އަމާޒުކޮށްގެން ކުރިއަށް ގެންދާ ހޭންޑްބޯލް ޓްރެއިނިންގް ކޭމްޕެކެވެ. މިމަހުގެ 26 ވަނަ ދުވަހާއި ހަމައަށް ރަށުގެ ކޮންމެ އަންހެން ކަނބަލަކަށް ވެސް ބައިވެރިވުމުގެ ފުރަސަތު ހުޅުވާލެވިފައިވާ، މި ކޭމްޕް ކުރިޔަށް ދާނީ ތަޖްރިބާ ހުރި ކޯޗެއްގެ އިރުޝާދުގެ ދަށުން ކަމަށް އެކުލަބުން ބުނެއެވެ.
މިހަރަކާތް ފެށުމުގެ ރަސްމިއްޔާތުގައި އެކުލަބުގެ ރައީސް އިބްރާހިމް ނަސީމް ވަނީ ވާހަކަ ދައްކަވައިފައެވެ.
ރައީސް ވާހަކަ ދައްކަވަމުން ވިދާޅުވީ އާރު ބީޖީ ސްޕޯރޓްސް ކުލަބުން، 1 މަސްދުވަހުގެ މުއްދަތަކަށް މިފެށޭ ހޭންޑްބޯލް ޓްރެއިނިންގް ކޭންޕަކީ ރަށުގެ އަންހެން ކަނބަލުންނަށް ލިބިގެންދާނެ ވަރަށް ރަނގަޅު ފުރަސަތެއް ކަމަށާ، މި ކުލަބުން ބައިވެރިންނަށް މަރުހަބާ ދަންނަވާކަމަށާއި، އާރު ބީޖީ ސްޕޯރޓްސް ކުލަބަކީ ހަމަ ތިބެފަ ކަންކަން ކުރާ ކުލަބެއް ނޫންކަމަށާއި ކޮންމެ ކަމަކީ ރޭވިގެން ވަރަށް ކުލަގަދަކޮށް ހަރަކާތްތަށް ފަށައި ކުލަބެއް ކަމަށެވެ.
އިތުރަށް ވާހަކަ ކުރިޔަށް ގެންދަވަމުން ކުލަބުގެ ރައީސް ވިދާޅުވީ ކުރިއަށް އޮތް ދުވަސްތަކުގައި ތަފާތު އެކި ދާއިރާތަކުން ރަށަށް ހިދުމަތް ކުރުމަށް ތައްޔާރުވަމުންދާކަމަށާއި އާރު ބީޖީ ސްޕޯރޓްސް ކުލަބުން އަރިއަތޮޅުގައި ތަފާތު ދައްކާނެ ކަމަށާއި ކުލަބުތައް ހިތް 7ދެމެލުމަށްޓަކައި ސަރުކާރުން އެހީތެރިކަން ފޯރުކޮށްދޭން ޖެހޭކަމަށް ޤަބޫލްކުރާކަމަށާއި، އޭރުން ރަށުގެ ކައުންސިލް އަށާއި ސަރުކާރަށްވެސް ފަސޭހަވެގެންދާނެކަމަށާއި ރަށުގައި ކުރަންހުރި އިޖްތިމާއީ، އުމްރާނީ، އަދި ތަރަށްޤީ އާއި ގުޅުން ހުރި ކުދިކުދި ކަންކަން ހިލޭ ސާބަހަށް މިހެން މަސައްކަތްކުރާ ކުލަބު ޖަމިއްޔާތަކުން ކޮށްދޭނެކަމަށް ޤަބޫލިކުރާކަމަށެވެ.
އެހެންކަމުން ޕާޓީތަކާއި މާލޭގެ ކުލަބުތަކަށް ފައިސާ ދޫކުރާ އުސޫލުން ރާއްޖެތެރޭގައި ހަރަކާތްތެރިވާ ކުލަބު ޖަމިއްޔާތަކަށްވެސް ސަރުކާރުން އަޅާލަން ޖެހޭކަމަށް ޤަބޫލްކުރާކަމަށެވެ. އަދި މިކަންކަމާއި އަދުގެ ޒުވާނުންގެ މިނިސްޓަރ ވިސްނަވާނެ ކަމަށް އުންމީދު ކުރާކަމަށެވެ.
