އައްޑޫ ސިޓީ ހިތަދޫގައި މީހަކަށް ކަތިވަޅިއަކުން ހަމަލާދީ ޒަހަމްކޮށްލަައިފިއެވެ. މިއީ އައްޑޫ ސިޓީގައި މިރޭ ހިންގި ދެވަނަ މާރާމާރީ އެވެ.
މީގެ ކުރިން ފޭދޫގެ ދެ ގްރޫޕެއްގެ ދެމެދުގައިވެސް މާރާމާރީއެއް ހިންގައި ހަތް މީހަކަށް ވަނީ އެކި ވަރުގެ އަނިޔާތައް ލިބިފައެވެ.
މައުލޫމާތު ލިބިފައިވާގޮތުން މިރޭ ކަތިވަޅިން ހަމަލާ ދީފައި ވަނީ އުމުރުން ވިއްސަކަށް އަހަރުގެ ޒުވާނަކަށެވެ. އޭނާއަަށް ހަމަލާދީފައި ވަނީ ހިތަދޫ ބޮޑު މަގުގައި ހުންނަ ހުސައިން މޫސަ މިސްކިތް ކައިރީގައި ހުންނަ ގާޑިއާއަކަށް ގޮސް ހުއްޓާއެވެ.
މި ޒުވާނާއަށް ހަމަލާދީފައި ވަނީ މިރޭ 12:40 ހާއިރު ކަމަށް މަންޒަރު ދުށް މީހަކު ބުންޏެވެ. އަދި ޒުވާނާގެ ގައިގައި ކަތިވަޅިން 2-3 ފަހަރު ޖެހި ކަމަށްވެސް މައުލޫމާތު ލިބެއެވެ.
މި މާރާމާރީއާއި ގުޅިގެން އެ ޒުވާނާއަށް ލިބިފައިވާ ޒަހަމްތަކުގެ ތަފްސީލެއް އަދި ލިބިފައެއް ނުވެއެވެ. އަދި މިކަމާއި ގުޅިގެން ފުލުހުންގެ ބަހެއް ލިބިފައެއް ނުވެއެވެ.
