ފުނަދޫ ޔުނިޓީ ސްޕޯޓްސް އެކަޑަމީގެ އަންހެން އަދި ފިރިހެންކުދިންގެ ފުޓްބޯޅަ އަދި ފުޓްސަލް ޕްރޮގްރާމެއް 113 ދަރިވަރުންނާއެކު ފުނަދޫ ފުޓްސަލް ދަނޑުގައި ރޭ ފަށައިފިއެވެ.
ގޮށްކޮޅަށް މައުލޫމާތު ހިއްސާ ކުރައްވަމުން ފުނަދޫ ޔުނިޓީ ސްޕޯޓްސް އެކަޑަމީގެ މުއައްސިސް ހުސައިން އަރީފް (ޔޫކޭ) ވިދާޅުވީ ރޭ ފުޓްބޯޅަ އަދި ފުޓްސަލް ޕްރޮގްރާމެއް ފެށިފައި ވާއިރު އަންހެން 31 ކުދިންނާއި ފިރިހެން 82 ކުދިން އެ އެކަޑަމީގައި ރަޖިސްޓަރީ ވެފައި ވާކަމަށާއި، ފިރިހެން ކުދިން 3 ބަޔަކަށް ބަހާލާފައި ވާއިރު އަންހެން ކުދިން ތިބޭނީ ވަކި އެއް ގުރޫޕެއްގެ ގޮތުގައި ކަމަށެވެ.
6 އަހަރާ 16 އަހަރާ ދެމެދުގެ ކުދިން ހިމެނޭ ޔުނިޓީ ސްޕޯޓްސް އެކަޑަމީގެ ކުލާސްތައް، ދަރިވަރުންނަށް ކުރިއަށް ދާނީ ހަފުތާގެ ތިންދުވަހު ކަމަށާއި ކުލާހުގައި ކިޔަވައި ދެއްވާނީ އެފްއޭއެމްގެ “ސީ” އަދި “ބީ” ލައިސަންސް ލިބިފައިވާ ތަޖުރިބާ ހުރި ކޯޗުންކަމަށް އެ އެކަޑަމީ މައުލޫމާތު ދެއެވެ.
ޔުނިޓީ ސްޕޯޓްސް އެކަޑަމީ ވުޖޫދަށް އައިސްފައި ވަނީ 24 ނޮވެމްބަރު 2020 ވަނަ ދުވަހުއެވެ. 2019 އަދި 2020 ގައި މިގުރޫޕުން ވަނީ ޔުނިޓީ ކަޕްގެ ނަމުގައި ވޮލީ މުބާރާތެއް ކުރިއަށް ގެންގޮސްފައެވެ. މީ ށ. ފުނަދޫގައި ހިންގާ ފުރަތަމަ އެކަޑަމީ އެވެ.
ފޮޓޯ : ޔުނިޓީ ސްޕޯޓްސް އެކަޑަމީ
