ރ. އުނގޫފާރުން ކޮވިޑް19 އަށް ޕޮޒިޓިވްވެފައިވާ ފަރާތެއް ފެނުމާއި ގުޅިގެން މިމަހުގެ ދެވަނަ ދުވަހުގެ ފަހުން އެރަށަށް ދިޔަ ފަރާތްތައް 10 ދުވަސް ވަންދެން ކަރަންޓީނުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަންގައިފިއެވެ.
އުނގޫފާރުން ކޮވިޑަށް އެންމެ ފުރަތަމަ ޕޮޒިޓިވްވެފައި ވަނީ ކަރަންޓީނުގައި ނެތް މީހެކެވެ. އޭނާ އަކީ ބަލީގެ އަލާމާތްތައް ހުރުމުން ކޮވިޑަށް ޓެސްޓު ކުރި މީީހެކެވެ. އޭނާ ޕޮޒިޓިވްވުމުން ކޮންޓެކްޓު ޓްރޭސިންގެ މަސައްކަތަށް އެރަށް މިވަގުތު އޮނީ މޮނީޓަރިން އަށް ލައިފައެވެ.
އެޗްޕީއޭ އިން މިއަދު ބުނީ ކޮވިޑް19 ގެ ޕޮޒިޓިވް ކޭސްތަކެއް އުނގޫފާރުން ފެނިފައިވާތީ، މި މަހުގެ ދެވަނަ ދުވަހުގެ ފަހުން އުނގޫފާރުގައި އުޅެފައިވާ އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާ ނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އެންގުން އެދޭ ކަމަށެވެ. އަދި އެ ތާރީހުގެ ފަހުން އުނގޫފާރަށް ގޮސްފައިވާ ފަރާތެއްވާ ނަމަ، އުނގޫފާރުން އަނބުރާ ރަށަށް އައި ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށް ވެސް ވަނީ އެދިފައެވެ.
އެޗްޕީއޭ އިން ބުނީ އެ ރަށެއްގެ ހެލްތު ސެންޓަރުން ނުވަތަ ހޮސްޕިޓަލުން އެ ފަރާތްތަކުގެ ސާމްޕަލް ނެގުމުގެ އިންތިޒާމު ހަމަޖައްސާނެ ކަމަށެވެ. އަދި މި މަހުގެ ދެވަނަ ދުވަހުގެ ފަހުން އުނގޫފާރުން މާލެއަށް އައިސްފައިވާ ފަރާތްތަކުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، އަދި ވިލިމާލޭ ފްލޫ ކްލިނިކަށް ގޮސް ސާމްޕަލް ނެގުމަށްވެސް އެޗްޕީއޭ އިން ވަނީ އެދިފައެވެ.
އަދި ނަތީޖާ ނެގެޓިވްވި ކަމުގައި ވިޔަސް އުނގޫފާރުން އަނބުރާ ރަށަށް އައި ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށާއި އެރަށަށް ކުރި ދަތުރުގެ މައުލޫމާތު 1676 އަށް ހިއްސާކުރުމަށް ވެސް އެޗްޕީއޭ އިން އެދިފައިވެއެވެ.
