ހަނިމާދޫ އެއާޕޯޓުގެ ހާލަތު ހީނަރުވެފައިވާތީ އައިލެންޑް އޭވިއޭޝަނުގެ ކުރީގެ ޑިރެކްޓާ އޮފް އޮޕަރޭޝަންސް ކެޕްޓަން މުޙައްމަދު އަމީން ކަންބޮޑުވުން ފާޅުކުރައްވައިފިއެވެ.
މިއަދު ކުރެއްވި ޓުވީޓެއްގައި ކެޕްޓަން އަމީން ވިދާޅުވީ ހަނިމާދޫ އެއާޕޯޓުގެ ހާލަތު މިއިން ޒަމާނެއްގައި ގޮސްފައިނުވާ މިންވަރަށް ދަށަށް ގޮސްފައިވާ ކަަމަށެވެ. އެ ވައިގެ ބަނދަރުގެ ޚިދުމަތްތަކުގެ ފެންވަރު ވަރަށް ބޮޑަށް ހީނަރުވެ، ދަށްވެފައިވާކަން އަމީނުގެ ޓުވީޓުގައި ފާހަގަކުރެއްވިއެވެ.
އެގޮތުން ވައިގެ ބަނދަރުގައި ބޭނުންކުރާ އެކްސްރޭ މެޝިނު ހަލާކުވެފައި ހުންނަތާ އަހަރަކަށްވުރެ ގިނަ ދުވަސް ވެފައިވާ ކަމަށް އަމީނު ވިދާޅުވިއެވެ. އަދި ޓާމިނަލްގައި ހުރި އެއާ ކޮންޑިޝަނުތައްވެސް ހަލާކުވެފައިވާކަން އޭނާ ފާހަގަކުރެއްވިއެވެ. އަމީނު ވިދާޅުވީ އެތަން މިހާރު ހީވަނީ ހޫނު އަވަނެއްހެން ކަމުގައެވެ.
ހަނިމާދޫ ވައިގެ ބަނދަރު ރަނގަޅަށް ނުބެލެހެއްޓި އެތަން ވީރާނާވެ އިންދިރާސްވަމުން އަންނަ ކަމުގެ ކަންބޮޑުވުން ފާޅުކުރެއްވުމާއެކު، އަމީނުވަނީ ސުވާލެއް ކުރައްވާފައެވެ. އޭނާ އައްސަވާފައިވަނީ ހަނިމާދޫ ވައިގެ ބަނދަރުގެ ހާލަތަކީ މިހާރު އެހެން އެއާޕޯޓުތަކުގެވެސް ޙާލަތުތޯއެވެ.
ހަނިމާދޫ އެއާޕޯޓަކީ އިންޑިޔާއިން ހަމަޖައްސާފައިވާ ލައިން އޮފް ކްރެޑިޓު (ލޯނު)ގެ ދަށުން ބައިނަލްއަޤުވާމީ ފެންވަރަށް ތަރައްޤީކުރާނެ ކަމަށް ސަރުކާރުން ބުނެފައިވާ އެއާޕޯޓެކެވެ. އެއާޕޯޓުގައި ފަސިންޖަރުންގެ ދާގީނާ ކަނޑައި ހުޅުވައިގެން ބަލާތާ އަހަރަކަށްވުރެ ގިނަ ދުވަސްވެފައިވާއިރު، އެއާޕޯޓު ތަރައްޤީކުރުމުގެ އަމަލީ މަސައްކަތް މިހާތަނަށް ފެށިފައިނުވެއެވެ.
