ހދ. ހަނިމަދޫ އެއާޕޯޓު ތަރައްގީވުމުން ތިލަދުންމަތީގައި ރިސޯޓު ހެދޭނެ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރޭ އެމްޑީޕީން އޮންލައިންކޮށް ބޭއްވި ހއ.ބާރަށު ޖަލްސާގައި ވާހަކަދައްކަވަމުން ނަޝީދު ވިދާޅުވީ މި ދައުރުގައި ހަނިމާދޫ އެއާޕޯޓު ތަރައްގީވެގެން އަންނާނެ ކަމަށާއި އެ އެއާޕޯޓު ތަރައްގީވުމުން ތިލަދުންމަތީގައި ދެން ރިސޯޓުތައް ހެދޭނެ ކަމަށެވެ.
“ރިސޯޓުތައް ތިލަދުންމަތީގައި ނުހެދެނީ ސަރުކާރުން ރަށް ބިޑަށް ނުލާތީއެއް ނޫން، އެކަން ވިޔަފާރީގެ ގޮތުން ކުރެވެން އޮންނަތަން ހިސާބު ޖަހާ ނުފެންނާތީ. އެތަން ފެންނާނީ ތިލަދުންމަތީގައި އެއާޕޯޓު އިންޓަނޭޝަނަލް ވުމުން” ނަޝީދު ވިދާޅުވިއެވެ.
ހަނިމާދޫ އެއާޕޯޓު ތަރައްގީވުމުން ތިލަދުންމަތީގައި ރިސޯޓުތައް ހަދަން ރަށް ބިޑަށްލާން ނުޖެހޭނެ ކަމަށާއި އެގޮތުން ރަށް އޮތް ތަނަކުން ނަގައިގެން އެ ހަދާ ބަޔަކު ހަދައިގެން ރިސޯޓުތައް ހުޅުވަމުން ގެންދާނެ ކަމަށްވެސް ނަޝީދު ވިދާޅުވިއެވެ.
“އަޅުގަނޑުމެންގެ އަމާޒަކީ ތިލަދުންމަތީގައި ވަޒީފާގެ ފުރުސަތު ގާއިމުކުރުން، އަޅުގަނޑުމެންގެ ބޭނުމަކީ ރާއްޖޭގެ ރައްޔިތުންނަށް ހެޔޮވެރިކަމެއްކޮށް ދިނުން” ނަޝީދު ވިދާޅުވިއެވެ.
ހަނިމާދޫ އެއާޕޯޓު ތަރައްގީ ކުރުމުގެ މަސައްކަތް މިއަހަރު ފެށުމަށް ހަމަޖެހިފައިވާއިރު، މި މަޝްރޫއުއަކީ އިންޑިއާގެ އެގްޒިމް ބޭންކުގެ ލޯނު ފައިސާ އިން ކުރިއަށް ގެންދިޔުމަށް ހަމަޖެހިފައިވާ މަޝްރޫއުއެކެވެ.
މި މަޝްރޫއުގެ ދަށުން ހަނިމާދޫގައި 2460 މީޓަރުގެ އާ ރަންވޭއަކާއި، 111،000 އަކަފޫޓުގެ ޒަމާނީ ޓާމިނަލެއް ގާއިމުކުރުމަށް ވަނީ ހަމަޖެހިފައެވެ. އަދި 624،000 އަކަފޫޓުގެ އޭޕްރަން އަކާއި ބައިނަލްއަގުވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައް ވެސް ގާއިމުކުރުމަށް ވަނީ ނިންމާފައެވެ.
އިކޮނޮމިކް މިނިސްޓްރީން ބުނީ މި މަޝްރޫއު ނިމުމުން އެއާބަސް ާ320 އާއި ބޮއިންގް 737 މަރުކާގެ ބޯޓު ފަހަރަށް ހަނިމާދޫ އެއާޕޯޓުން ހިދުމަތް ދެވިގެންދާނެ ކަމަށެވެ. އަދި މެދުއިރުމައްޗާއި، ދެކުނު އޭޝިއާ އާއި، ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސީދާ ފްލައިޓުތައް ހަނިމާދޫ އެއާޕޯޓަށް އޮޕަރޭޓް ކުރުމުގެ ގާބިލުކަން ވެސް ލިބިގެންދާނެ ކަމަށް މިނިސްޓްރީން ބުނެއެވެ.
