ހދ. ހަނިމާދޫ އިންޓަނޭޝަނަލް އެއަރޕޯޓް ހިންގުމުގައި އަމާޒަކީ ފައިދާ ހޯދުން ކަމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
މޯލްޑިވްސް ޑިމޮކްރަޓިކް ޕާޓީ (އެމްޑީޕީ)ން ކުރިއަށް ގެންދާ ރަށްވެހި ފަތިސްގެ ސިލްސިލާ ބައްދަލުވުންތަކުގެ ތެރެއިން ބައްދަލުވުމެއްގައި ވާހަކަދައްކަވަމުން ރައީސް ނަޝީދު ވިދާޅުވީ، ހަނިމާދޫ އިންޓަނޭޝަނަލް އެއަރޕޯޓަކީ ދެކުނު އޭޝިއާ ސަރަހައްދުގައި ފާހަގަކޮށްލެވޭ ފެންވަރުގެ އެއާޕޯޓަކަށް ވުމުގެ ފުރުސަތު އޮތް އެއަރޕޯޓެއް ކަމަށެވެ. އެއާޕޯޓް ހިންގުމުގައި ތިލަދުންމަތީ ރައްޔިތުން އަމާޒު ހިފަންވީ ފައިދާ ވާނެ ގޮތަށް އެއަރޕޯޓް ހިންގޭނީ ކާކަށް ކޮން ގޮތަކަށްތޯ ބަލައި އެގޮތަށް ހިންގުން ކަމަށެވެ.
ނަޝީދު ވިދާޅުވީ، ތިލަދުންމަތީގައި ރިސޯޓް ތަރައްގީކުރަން ރަށްތައް ވަރަށް ގިނައިން ދޫކުރެވިފައިވާ ކަމަށެވެ. އެކަމަކު މަދު ރަށެއް ނޫނީ ތަރައްގީކުރެވިފައި ނުވާއިރު، ރަށްތަކުގައި ރިސޯޓް ތަރައްގީނުވުމުގެ އެންމެ ބޮޑު ސަބަބަކީ ދަތުރުފަތުރުގެ ނިޒާމެއް ނެތުން ކަމަށް ވިދާޅުވި އެވެ.
ނަޝީދު ވިދާޅުވީ ރާއްޖޭގައި ރިސޯޓެއް ހެދުމަށް ދޫކުރާ ރަށެއް ނުހެދެނީ އޭގެން ލިބޭ މަންފާ އާއި ނަފާ ކުޑަވެގެން ނޫންކަމަށެވެ. އެއީ ވިޔަފާރީގެ ގޮތުން ކުރެވޭނެ ކަމެއް ކަމަށް އިންވެސްޓްކުރާ ފަރާތްތަކަށް ނުފެންނާތީ ކަމަށް ވެސް އެ މަނިކުފާނު ވިދާޅުވިއެވެ.
މީގެ އިތުރުން، ރައީސް ނަޝީދު ވިދާޅުވީ، މަސައްކަތް ކުރަންވީ އެއާޕޯޓް ތަރައްގީކޮށް ނިންމުމަށް ކަމަށާއި އެއަށްފަހު ޓެންޑަރަށް ރަށްތައް ހުޅުވާނުލިޔަސް ރަށްތައް ތަރައްގީކުރުމަށް ބޭނުންވާ މީހުން އެކަން ކުރުމަށް އެދި ހުށައަޅާ އެކަން ކުރާނެ ކަމަށެެވެ.
ތިލަދުންމަތީގެ ރަށްތަކަކީ ގުދުރަތީ ވަސީލަތްތައް ގިނަ ރީތި ރަށްތަކެއް ކަމަށާއި އެރަށްތަކުން ރިސޯޓް ވިޔަފާރި ނުހިންގޭނެކަމަށް ބުނާނެ އެއްވެސް މީހެއް ނުހުންނާނެ ކަމަށް ވެސް ވިދާޅުވިއެވެ.
