ކީރިތި ޤުރުއާނުގައި ފުރަތަމަ ބާވަައިލެއްވުނު އާޔަތްތަކުގަައި ކިޔެވުމަށް އަންގަވާފައިވެއެވެ. މިކަމުން އެކަނިވެސް އިސްލާމުދީނުގައި ޢިލްމު އުނގެނުމަށާއި އުނގަންނައި ދިނުމަށް ދެވިފައިވާ އަހައްމިއްޔަތުކަން އެނގިގެންދެއެވެ.
އިސްލާމުދީނަކީ ހަމަހަމަކަމުގެ ދީނެވެ. މާތް ﷲ ވަޙީކުރައްވާފައިވާ ބަސްފުޅެއްގެ މާނާގައިވެއެވެ. “އޭ މީސްތަކުންނޭވެ! ހަމަކަށަވަރުން، ތިމަންރަސްކަލާނގެ ތިޔަބައިމީހުން ހެއްދެވީ ފިރިހެނަކާއި އަންހެނެއްގެ ކިބައިންނެވެ. އަދި ތިމަންރަސްކަލާނގެ ތިޔަބައިމީހުން ތަފާތު ގައުމުތަކަށާއި
ގަބީލާތަކަށް ލެއްވީ ތިޔަބައިމީހުން އެއްބަޔަކު އަނެއްބަޔަކަށް ތަޢާރަފުވުމަށްޓަކައެވެ. ހަމަކަށަވަރުން ﷲ ގެ ހަޟްރަތުގައި ތިޔަބައިމީހުންކުރެ އެންމެ މާތްކަންބޮޑީ ، ތިޔަބައިމީހުންކުރެ އެންމެ ތަޤުވާވެރި މީހާއެވެ.” (ޙުޖުރާތު ސޫރަތަގެ 13 ވަނަ އާޔަތް)
އިސްލާމުދީނުގަައި އުނގެނުމުގެ ހައްޤު އެއްވެސް ތަފާތުކުރުމެއްނެތި އެންމެހަައި މީސްތަކުންނަށް ލިބިގެންވެއެވެ. މުއްސަނދި މީހެއް ފަޤީރެއް މެދުގައި ތަފާތެއް ނެތެވެ. އަންހެން ފިރިހެން ތަފާތުކުރުމެއްވެސް ނެތެވެ. ކީރިތި ރަސޫލާ ހަދީޘްކުރައްވާފައިވާ ބަސްފުޅެއްގެ މާނާގައިވެއެވެ. “ޢިލްމު ހޯދުމަކީ ކޮންމެ މުސްލިމެއްގެ މައްޗަށް އޮތް ވާޖިބެކެވެ” (އިބުނު މާޖާ)
ހަމަހަމަ ކަމާއެކު ތައުލީމު ހޯދާ ލިބިގަތުމުގެ ހައްޤުވަނީ ބަައިނަލް އަޤުވާމީ މުޢާހަދާތަކުން އެންމެނަަށް ކަށަވަރުކޮަަށްދީފައެވެ. އެގޮތުން ތައުލީމު ހޯދާ ލިބިގަތުމުގެ ހައްގު ކޮންމެ މީހަކަށްވެސް ލިބިފައިވާކަމަށް އިންސާނީ ހައްގުތަކުގެ އާއްމު ޤަރާރު 1948 ގެ 26 ވަނަ މާއްދާގައި ބަޔާންކޮށްފައިވެއެވެ.
އެއްވެސް ތަފާތު ކުރުމަކައިނުލާ ތައުލީމު ހޯދާ ލިބިގަތުމުގެ ހައްްްްގު ދިވެެހިރާއްޖޭގެ ޤާނޫނު އަސާސީގެ 36 ވަނަ މާއްދާގެ ދަށުން ކަށަވަރުކޮށްދީފައިވެއެވެ. އަދި ދިވެހިރާއްޖޭގެ ޤާނޫނު އަސާސީ އަަަށް ބަލާއިރު، އަދުލު އިންސާފުގެ އެންމެ މަތީ މަސްދަރަކީ އިސްލާމީ ޝަރީޢަތެވެ. އެހެންކަމުން އިސްލާމުދީނުގައި ލިބިދީފައިވާ ތައުލީމު ހޯދުމުގެ ހައްގު ކޮންމެ ދިވެއްސަކަށް ލިބިގެންވެެެއެވެ. މީގެއިތުރުން ތަފާތުކުރުމެއްނެތި، ތައުލީމީ ނިޒާމުގެ ތެރެއިން އުނގެނުމާއި ތަމްރީނު ލިބުމުގެ ފުރުޞަތު އެހެންކުދިންނެކާ އެއްފަަދައިން ނުކުޅެދުންތެރިކަން ހުންނަ ކުދިންނަށް ހޯދައިދިނުން “ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީ ތެރިކަން ފޯރުކޮށްދިނުމުގެ ޤާނޫނުން” ލާޒިމުކޮށްފައިވެއެވެ.
އެއްވެސް ތަފާތު ކުރުމަކައިނުލާ ތައުލީމު ހޯދާ ލިބިގަތުމުގެ ހައްގު ދިވެހި ކޮންމެ ރައްޔިތަކަށްވެސް ލިބިދީފައިވާތީ، އެ ހައްގު އަމަލީގޮތުން ހޯދައިދޭންޖެހެއެވެ. އާއްމު ތައުލީމީ ނިޒާމުގެ ތެރެއިން ހުރިހާ ކުދިންނަށްވެސް ފުރުޞަތުތައް ފަހިވެެފައި އޮންނަން ޖެހެއެވެ. އެހެންގޮތަކަށް ބުނާނަމަ، އިންކުލޫސިވް އެޑިއުކޭޝަންގެ ތެރެއިން ތައުލީމު ފޯރުކޮށްދެވެން ޖެހެއެވެ.
