އއ. މަތިވެރިން ހދ. ހަނިމާދޫއަށް ދަތުރުކުރި ދެމީހަކު ކޯވިޑް-19އަށް ޕޮޒިޓިވްވެ، އެރަށް މޮނިޓަރިން ހާލަތަށް ގެނެސްފިއެވެ.
ހަނިމާދޫން ޕޮޒިޓިވްވީ އަންހެނަކާއި، ކުޑަކުއްޖެކެވެ. އެއީ ދެމައިންނެވެ. އެމީހުން އއ. މަތިވެރިން، ހަނިމާދޫއަށް ދަތުރުކުރީ މިމަހުގެ 20 ވަނަ ދުވަހުއެވެ.
ޕޮޒިޓިވް 10 ކޭސް ފެނުމުން މަތިވެރި މޮނިޓަރިންނަށްލީ މިމަހުގެ 21 ވަނަ ދުވަހުއެވެ.
ގޮށްކޮޅަށް މައުލޫމަތު ދެއްވަމުން ކައުންސިލުގެ ޒިންމާދާރުވެރިޔާ އިބްރާހިމް ޢަލީ ވިދާޅުވީ ކުޅުދުއްފުށީ ރީޖަނަލް ހޮސްޕިޓަލުން އަންގައިގެން މަތިވެރިން އެރަށަށް ދަތުރުކުރި ތިން މީހެއްގެ ސާމްޕަލް ނެގީ ރޭގައި ކަމަށެވެ. އޭގެތެރެއިން ދެ މީހަކު ޕޮޒިޓިވްވިކަން އެނގުނީ މިއަދު ހަވީރު ކަމަށެވެ.
“އެމީހުން މަތިވެރިން ފުރީ މިމަހުގެ 20 ވަނަ ދުވަހު ކަމަށް މަޢުލޫމާތު ލިބެނީ، ހަމަ އެދުވަހު މިރަށަށް ވެސް އައިސްފި، މަތިވެރިން ޕޮޒިޓިވް ކޭސްތަކެއް ފެނުމުން، އެރަށުން ހަނިމާދޫއަށް ދަތުރުކުރި ބަޔަކަށް ވާތީ ހޮސްޕިޓަލުން އެންގީ އެމީހުން ޓެސްޓް ކުރަން، ދެމަފިރިންނާއި ދަރިފުޅު ޓެސްޓް ކުރީ، ދެމައިން ޕޮޒިޓިވްވީ، ފިރިހެންމީހާގެ ސާމްޕަލް ނެގެޓިވް” އިބްރާޙީމް ވިދާޅުވިއެވެ.
އެމީހުންގެ ރަށުތެރެއިން އެހެން މީހުންނާއި ވެސް ބައްދަލުވެފައިވާ ކަމަށާއި، އެ މީހުން ދެނެގަތުމުގެ މަސައްކަތް މިހާރު ހަނިމާދޫ ސިއްޙީ މަރުކަޒުން ފައްޓަވާފައިވާ ކަމަށް ވެސް އިބްރާޙީމް ވިދާޅުވިއެވެ.
“އެމީހުންނާ ބައްދަލުވި މީހުންގެ ޢަދަދު އަދި ދަންނަވަން ނޭނގޭ، ހަވީރު1730 އިރުން ފެށިގެން އެޗްޕީއޭއިން މިރަށް ވަނީ މޮނިޓަރިން ހާލަތަށް ގެނެސްފަ” އިބްރާޙީމް ވިދާޅުވިއެވެ.
ކޯވިޑް-19 ފެތުރި މި ވަގުތު ވެސް 19 ރަށެއް މޮނިޓަރިން ހާލަތުގައި އެބައޮތެވެ.
