ކޮވިޑް-19 އާއި ގުޅިގެން ރާއްޖޭގައި އަޅާފައިވާ ފިޔަވަޅުތައް ވަރުގަދަކުރުމަށް ކުރީގެ ރައީސް މައުމޫން އަބްދުލްގައްޔޫމް އަނެއްކާވެސް ގޮވާލައްވައިފިއެވެ.
ރައީސް އޮފީހާއި އެޗްޕީއޭ ޓެގު ކުރައްވައި ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވީ، ރާއްޖޭގައި މިފަހަކަށް އައިސް ކޮވިޑުގެ ކޭސްތައް އިތުރުވަމުންދަނީ ކަންބޮޑުވާ މިންވަރަކަށް ކަމަށެވެ. އެހެންވެ ކޮވިޑު ކޮންޓްރޯލް ކުރުމަށްޓަކައި ފިޔަވަޅުތައް ވަރުގަދަ ކުރުމަށް ގޮވާލައްވާފައެވެ.
އެމަނިކުފާނު މީގެކުރިން ވެސް ވަނީ ކޮވިޑް ފިޔަވަޅުތައް ވަރުގަދަ ކުރުމަށް ކަމާ ގުޅޭ އިދާރާތަކަށް ގޮވާލައްވާފައެވެ.
ކޮވިޑު ފިޔަވަޅުތައް ވަރުގަދަ ކުރަން ރައީސް މައުމޫން ގޮވާލެއްވި އިރު، އިއްޔެއަކީ ރާއްޖެއިން ރެކޯޑު އަދަދަކަށް މީހުން ޕޮޒިޓިވްވި ދުވަހެކެވެ. އެގޮތުން ރާއްޖޭގެ އެކި ސަރަހައްދުތަކުން އިއްޔެ 319 މީހަކު ޕޮޒިޓިވްވިއެވެ.
ކޮވިޑް ކޭސްތައް އަތޮޅު ތެރޭގައިވެސް ވަނީ ވަރަށް ބޮޑަށް އިތުރުވެފައެވެ. އަދި އެކަމާ ގުޅިގެން މިވަގުތު ރާއްޖޭގެ 20 ރަށެއް އޮތީ މޮނީޓަރިންގެ ހާލަތަށް ގެނެސްފައެވެ.
ރާއްޖޭގައި ކޮވިޑް ބަލިި ޖެހި 24،116 މީހުން ރަނގަޅުވެފައިވާއިރު 71 މީހަކު ވަނީ މިބަލީގައި މަރުވެފައެވެ.
