ދިއްދޫން ކޯވިޑް-19 އަށް ޕޮޒިޓިވްވި ތިން މީހަކު އިތުރު ފަރުވާއަށް ށ. އަތޮޅު ކޯވިޑް ފެސިލިޓީއަށް ބަދަލުކޮށްފިއެވެ.
ށ. އަތޮޅު ހޮސްޕިޓަލުގެ މެނޭޖަރ އަހުމަދު ޒުމްރަތު ގޮށްކޮޅަށް މައުލޫމާތު ދެއްވަމުން ވިދާޅުވީ މިއަދު ދިއްދޫ 4 ބޭފުޅުން ގެނެވުނު ކަމަށާއި، އޭގެތެރެއިން 3 ބޭފުޅުންނަކީ ޕޮޒިޓިވް މީހުން ކަމަށާއި ދެންހުރީ ބަލީމިހާގެ އެހީތެރިއެއްކަމަށެވެ.
“މި ވަގުތު ފެސިލިޓީގައި ތިބި އެއްވެސް ބަލިމީހަކު ސިވިޔާއެއް ނޫން. އިތުރު ފަރުވާ ބޭނުން ވެދާނެކަމަށް ބަލާފައި އެމީހުން މި މޫވްކުރީ.” މެނޭޖަރ އަހުމަދު ޒުމްރަތު ވިދާޅުވިއެވެ.
ށ. ފުނަދޫ ކޯވިޑް ފެސިލިޓީއަކީ ޒޯން 1ގެ ރަށްތަކަށް ޚާއްސަކޮށްފައިވާ ކޯވިޑް ފެސިލިޓީއެވެ. މި ފެސިލިޓީގައި އައިސީޔޫ 20 އެނދާއި އައިސޮލޭޝަން 37 އެނދު ހުރެއެވެ.
