ބ.އަތޮޅު މަދަރުސާގެ ގްރޭޑް 10 އަދި 12 ގެ ދަރިވަރުންގެ ދަސްވެނިވުން ފާހަގަކޮށް ސަނަދު ހަވާލުކޮށްފިއެވެ.
ރޭ ބ.އަތޮޅު މަދަރުސާގައި ބޭއްވުނު މި ޚާއްޞަ ރަސްމިއްޔާތު ޝަރަފުވެރި ކޮށްދެއްވީ ބ.އަތޮޅު މަދަރުސާގައި ތަޢުލީމު އުނގަންނައިދެއްވާ، އެ މަދަރުސާއަށް ގިނަގުނަ ޚިދުމަތްތަކެއް ކޮށްދެއްވާފައިވާ، މިހާރުގެ ބ.ދަރަވަންދޫ ކައުންސިލުގެ ރައީސް އަލްފާޟިލް ޢަލީ ސަމީޙުއެވެ. މީގެ އިތުރުން، މި ރަސްމިއްޔާތުގައި ދަރަވަންދޫ ކައުންސިލުގެ މެމްބަރުންނާއި، ބ.އަތޮޅު މަދަރުސާގެ މުވައްޒަފުންނާއި، ދަސްވެނިވާ ދަރިވަރުންނާއި، އެ ދަރިވަރުންގެ ބެލެނިވެރިން ބައިވެރިވެފައިވެއެވެ.
މި ރަސްމިއްޔާތުގައި ގްރޭޑް 10 އަދި 12 އަށް ކިޔަވާދެއްވި މުދައްރިސުންނާއި، ލީޑިންގ ޓީޗަރުގެ އަގުވަޒަންކޮށް އެ ފަރާތްތަކަށް ހަނދާނީ ލިޔުން ހަވާލުކުރެވުނެވެ. ރަސްމިއްޔާތުގެ އެންމެ ޚާއްޞަ އެއް ނަންބަރަކަށްވީ، ދަސްވެނިންނަށް ސަނަދު ހަވާލުކުރުމެވެ. ސަނަދު ހަވާލުކުރުމަށްފަހު، ޝަރަފުވެރި މެހެމާނާއި ބ.އަތޮޅު މަދަރުސާގެ ޕްރިންސިޕަލް ދަސްވެނިންނާއެކު ފޮޓޯ ނެގުން ކުރިއަށް ދިޔައެވެ. އެއަށްފަހު ޝަރަފުވެރި މެހެމާނު ޖަލީސުންނާއި މުޚާޠަބުކޮށް ވާހަކަދެއްކެވިއެވެ.
ޝަރަފުވެރި މެހެމާނު، ބ.ދަރަވަންދޫ ކައުންސިލްގެ ރައީސް އަލްފާޟިލް ޢަލީ ސަމީޙް ގެ ވާހަކަކޮޅުގައި ތަކުރާރުކޮށް ދަރިވަރުންނަށް ނަސޭޙަތްތެރިވީ، މުދައްރިސުންނާއި ބެލެނިވެރިން، އަދި މުޅި ދަރަވަންދޫ ފަޚުރުވެރިވާ ބަޔަކަށް ވުމަށެވެ. އަދި މަދަރުސާއިން ދަސްވި ކަންތައްތައް ކުރިމަގުގައިވެސް ދަރިވަރުންގެ ކިބައިން ފެންނަންވާނެ ކަމަށާއި، ކާމިޔާބީއަށް ވާޞިލުވުމަށް އެންމެ ދުވަހެއްވެސް ބޭކާރުކޮށްނުލާ މަސައްކަތް ކުރަންވާނެ ކަމަށް ބުނެ ދަރިވަރުންނަށް ހިތްވަރު ދެއްވިއެވެ. އެމަނިކުފާނުގެ ވާހަކަކޮޅު ނިންމާލެއްވީ ދަރިވަރުންނަށް ފަހި ދުވަސްތަކަކަށް އެދެމުންނެވެ.
ޝަރަފުވެރި މެހެމާނުގެ ވާހަކަކޮޅަށްފަހު، މާޒީގެ ހަނދާންތައް އެކުލެވިގެންވާ ޚާއްޞަ ވީޑިއޯއެއް ހުށަހެޅުނެވެ. އެ ވީޑިއޯގައި، ދަރިވަރުން އެންމެ ތުއްތު އިރުންސުރެ މިއަދާއި ހަމައަށް އައި އިރު ހިނގާފައިވާ ފާހަގަކޮށްލެވޭ ކަންކަމުގެ ވީޑިއޯއާއި ފޮޓޯތައް ދައްކާލަދިނެވެ. ހަމައެއާއެކު، އެ ދަރިވަރުންނަށް ކިޔަވާދެއްވި މުދައްރިސުންނާއި، މިހާރުގެ ޕްރިންސިޕަލްގެ ޚާއްޞަ މެސެޖުތަކެއްވެސް ގެނެސްދިނެވެ.
ވީޑިއޯ ހުށަހެޅުމަށްފަހު، މަދަރުސާގެ ފަރާތުން ވާހަކަ ދެއްކެވުން އޮތެވެ. ވާހަކަ ދެއްކެވީ ބ.އަތޮޅު މަދަރުސާގެ ޕްރިންސިޕަލް އަލްފާޟިލާ ނާޒްނީން ޢަބްދުﷲ ދީދީއެވެ. އެކަމަނާގެ ވާހަކަކޮޅުގައި، ކާމިޔާބީއަކީ ފަސޭހައިން ޙާޞިލްވާނެ އެއްޗެއް ނޫން ކަމާއި، ދަތިތަކާއި ގޮންޖެހުންތައް ދިމާވުމުން ހުއްޓާ ނުލާ ގަދައަޅާ މަސައްކަތް ކުރަންވާނެ ކަމަށް ބުނެ ނަސޭޙަތްތެރިވެ ހިތްވަރު ދެއްވިއެވެ.
ހަމައެއާއެކު، ވަގުތުގެ މުހިންމުކަމާއި، ތަޢުލީމުގެ މުހިންމުކަން އެކަމަނާ ފާހަގަ ކުރެއްވިއެވެ. އަދި މުދައްރިސުންނާއި ބެލެނިވެރިންނަށް އަބަދުވެސް އިޙުތިރާމުކުރަންވާނެ ކަމަށް ވިދާޅުވިއެވެ. ކޮންމެ ކުއްޖަކީ ކިޔެވުމަށް މޮޅު ކުއްޖަކަށް ނުވިޔަސް، އެކުއްޖަކަށް ލިބިފައިވާ ހުނަރަކުން ކުރިއަށް ދިޔުމަށް މަސައްކަތްކުރުމަށް ޕްރިންސިޕަލް ނާޒްނީން އިލްތިމާސް ކުރެއްވިއެވެ.
ޕްރިންސިޕަލްގެ ވާހަކަ އިތުރަށް ކުރިއަށް ގެންދަމުން، ބެލެނިވެރިންގެ ފަރާތުން އެދިލެއްވީ، ދަރިވަރުންގެ ތައުލީމީ ޙަޔާތް ނިމުމަކަށް އަޔަ ނުދީ، ތަފާތު ކޯސްތަކާއި ތަމްރީނު ޕްރޮގުރާމުތަކުގައި ކުދިން ބައިވެރިކުރުމަށެވެ. އަދި މަތީ ތަޢުލީމު ޙާޞިލުކުރުމުގެ ފުރުޞަތުތައްވެސް އެބަ އޮތްކަން ފާހަގަކުރެއްވިއެވެ. އެކަމަނާގެ ވާހަކަކޮޅު ނިންމާލެއްވީ ކިޔަވާއިދިނުމުގައި ބުރަކޮށް އުޅުއްވި މުދައްރިސުންގެ އަގު ވަޒަންކޮށް ޝުކުރު އަދާކުރައްވަމުންނެވެ.
އެއަށްފަހު ދަސްވެނިންގެ ތެރެއިން ދެ ދަރިވަރެއްގެ ވާހަކަ ދެއްކުން އޮތެވެ. އެގޮތުން ގްރޭޑް 10 ގެ ދަރިވަރު މުޙައްމަދު މައިޝާންގެ ވާހަކަކޮޅުގައި، މަދަރުސީ ދައުރުގެ ހަނދާންތައް އަބަދުވެސް އާވާނެ ކަމަށާއި، މުދައްރިސުންނާއި ކުދިންނާއި އޮތް ގާތް ގުޅުން އަބަދަށް ދެމި އޮންނާނެކަމަށް އުންމީދުކުރާކަމަށް އޭނާ ބުންޏެވެ. އަދި ބެލެނިވެރިންނާއި މުދައްރިސުންނާއި، މަދަރުސާގެ އެންމެހާ މުވައްޒަފުންނަށް ޝުކުރު އަދާކުރިއެވެ. އެއަށްފަހު ވާހަކަ ދެއްކި ގްރޭޑް 10 ގެ ދަރިވަރު، އިފާޝާ އުމަރު ފާއިޒުގެ ވާހަކަކޮޅުގައިވެސް މަދަރުސީ ޙަޔާތުގައި އެހީތެރިކަމާއި އެއްބާރުލުން ދެއްވި ހުރިހާ ފަރާތްތަކެއްގެ އަގުވަޒަންކޮށް ޝުކުރު އަދާކުރިއެވެ.
ދެ ދަރިވަރުންގެ ވާހަކަ ދެއްކުމަށްފަހު ހުރިހާ ދަސްވެނިންގެ ފަރާތުން ޚާއްޞަ ވަދާޢީ ލަވައެއް ހުށަހަޅައިދިނެވެ. ލަވަ ހައްދަވައިދެއްވީ ދިވެހި ރާއްޖޭގެ މަޝްހޫރު ޅެންވެރިޔާ، ދަރަވަންދޫ ނާޝިދުއެވެ. ރަސްމިއްޔާތު ނިންމާލީ ޖަލީސުންގެ ޝަރަފުގައި ބޭއްވުނު ބިލެއްމީރުކޮށްލުމަކުންނެވެ.
