މަތީ ތަޢުލީމާ ބެހޭ ވަޒީރު، އިބްރާހީމް ޙަސަން ބ.އަތޮޅު މަދަރުސާއަށް ޒިޔާރަތް ކުރައްވައިފިއެވެ. އެ މަނިކުފާނު މި ދަތުރުފުޅު ފައްޓަވާފައިވަނީ 9 އޯގަސްޓް ވީ ހޯމަ ދުވަހުއެވެ.
އެގޮތުން، ހޯމަ ދުވަހު އެ މަނިކުފާނު ވަނީ ބ.އަތޮޅު މަދަރުސާގެ ސާނަވީ ގްރޭޑްތަކުގެ ދަރިވަރުންނާއި، މިދިޔަ އަހަރު ގްރޭޑް 10 ނިންމި ދަރިވަރުންނާ ބައްދަލު ކުރައްވާފައެވެ. މި ބައްދަލުވުމުގައި މަތީ ތަޢުލީމު ޙާޞިލް ކުރެވޭނެ މަގުތައް ފަހިވެފައިވާކަމަށް ވިދާޅުވެ، މަތީ ތަޢުލީމު ޙާޞިލް ކުރުމަށް ހުޅުވާލާ ފުރުޞަތުތަކާ ބެހޭގޮތުން މަޢުލޫމާތު ހިއްސާ ކުރެއްވިއެވެ. އަދި އެފަދަ ފުރުޞަތުތަކުގެ ބޭނުން ހިފުމަށް ދަރިވަރުންނަށް ބާރު އެޅުއްވިއެވެ.
މީގެ އިތުރުން، އެ މަނިކުފާނު ވަނީ ބ.އަތޮޅު މަދަރުސާގެ ބެލެނިވެރިންނާވެސް ބައްދަލުކުރައްވާފައެވެ. މި ބައްދަލުވުމުގައި މަތީ ތަޢުލީމު ޙާޞިލް ކުރުމަށް ސަރުކާރުން ދެއްވާ ލޯނާއި، ހިލޭ ފުރަތަމަ ޑިގްރީ ހެދުމާއި، ފުރުޞަތު ހުޅުވާލާ ސްކޮލާޝިޕްތަކާއި ބެހޭގޮތުން މަޢުލޫމާތު ހިއްސާ ކުރެއްވިއެވެ. އަދި މަތީ ތަޢުލީމާ ބެހޭގޮތުން ބެލެނިވެރިން ކުރި ސުވާލުތަކަށް ޖަވާބުދެއްވިއެވެ.
ހަމައެއާއެކު، ބ.އަތޮޅު މަދަރުސާގައި ދިރާސީ އާ އަހަރުގެ ކިޔެވުން ފެށުމާ ގުޅިގެން ބޭއްވުނު ޚާއްޞަ އެސެމްބްލީ ޝަރަފުވެރި ކޮށްދެއްވީ ވެސް ޑރ. އިބްރާހީމް ޙަސަންއެވެ. މި އެސެމްބްލީގައި އެ މަނިކުފާނު ދެއްކެވި ވާހަކަ ވާހަކަފުޅުގައި، މަތީ ތަޢުލީމު ޙާޞިލްކުރުމަށް ދަރިވަރުންނަށް ހިތްވަރު ދެއްވިއެވެ. އެސެމްބްލީއަށްފަހު، އެ މަނިކުފާނު ބ.އަތޮޅު މަދަރުސާގެ މުދައްރިސުންނާ ބައްދަލުކޮށް، ޚާއްޞަ ސެޝަންއެއްވެސް ނަގައިދެއްވިއެވެ.
މަތީ ތަޢުލީމާއި ބެހޭ ވަޒީރު، ޑރ. އިބްރާހީމް ޙަސަން ބ.އަތޮޅު މަދަރުސާއަށް ކުރެއްވި ޒިޔާރަތުގައި ބ.ދަރަވަންދޫ ކައުންސިލާ ބައްދަލުކޮށް، އެރަށުގައި މަތީ ތަޢުލީމު ފޯރުކޮށްދިނުމަށް ކޯސްތައް ހިންގޭނެ ގޮތްތަކާއި ބޭހޭގޮތުން މަޝްވަރާ ކުރެއްވިއެވެ.
ފޮޓޯ : ބ.އަތޮޅު މަދަރުސާ
