ކޮރޯނާ ވައިރަސް ޑިޒީޒް – 2019 ދުނިޔޭގެ އެކި ކަންކޮޅުތަކުން އެތައް ހާސް ބަޔަކަށް ޖެހިއްޖެއެވެ. އަދި އެތައް ހާސްބަޔަކު މަރުވެއްޖެއެވެ. ވެކްސިނެއް އަދި ބޭހެއް ނެތަސް މި ބަލިން އެތައް ބަޔަކު ސަލާމަތްވެ، އެތައް ހާސް ބަޔަކު ރަނގަޅުވެއްޖެއެވެ. މާތްﷲގެ ރަޙުމަތްފުޅާއެކު ރަނގަޅު ވަނީ “ފަރުވާ” ހުރުމުންނެވެ. ފަރުވާއިން ކޮށްދޭ ކަމަކީ ބަލިން ރައްކާތެރި ކޮށްދިނުމާއި ބަލިން ސަލާމަތްކޮށް ދިނުމެވެ.
ކޯވިޑް-19 އިން ރައްކާތެރިވެ، ސަލާމަތްތެރި ވެވޭނެ ގޮތްތަކެއް ދުނިޔޭގެ ޞިއްޙަތު ޖަމްޢިއްޔާ، ޑަބްލިޔު.އެޗް.އޯ އިން ވިދާޅުވެއެވެ. ސައިބޯނި ލައިގެން ގިނަގިނައިން އަތްދޮވުމާއި ގައިދުރުކަން ދެމެހެއްޓުމުގެ ވާހަކަ އެކަންޏެއް ނޫނެވެ. އޭގެ އިތުރުން ކުރަންޖެހޭ ކަންތައްތައް ތަކަކާއި ނުކުރަންވީ ކަންތައްތަކެއް ވެސް މެއެވެ.
ފުރަތަމަ ކަމަކީ ކެޔުމުގައި ޞިއްޙަތަށް ފައިދާހުރި ކެޔުން އިޚްތިޔާރު ކުރުމެވެ. ކެއުމުގައި ތާޒާ ތަރުކާރީ އާއި މޭވާ ގިނައިން ބޭނުންކުރުމެވެ. ތަރުކާރީ އާއި މޭވާއިން ދިފާޢީ ނިޒާމު ވަރުގަދަކޮށްދެއެވެ. ހަށިގަނޑުގެ ގުނަވަންތަކަށް ހަރަކާތްތެރިކަން ގެނުވައެވެ.
ދެވަނަ ކަމަކީ ހަކުރު ގިނަ ބުއިންތަކުން ދުރުވުމެވެ. މިއަދުގެ ޒުވާނުން މިވަނީ ހަކައިގެ ބުއިންތަކަށް (އެނާޖީ ޑްރިންކްސް ތަކަށް) ދެވި ހިފާފައެވެ. އެ ބުއިންތަކުގައި ގިނަ އަދަދަކަށް ހަކުރު އެކުލެވިގެން ވެއެވެ. އެއީ ކޯވިޑުން ސަލާމަތްވުމަށް ޓަކައި ދުރުވަންޖެހޭ ކަމެކެވެ. ހަމައެހެންމެ ބަނގުރަލާއި އަމަލުވާ ބުއިންތަކުން ވެސް ދުރުހެލިވާން ޖެހެއެވެ. މިތަކެތި ބޭނުންކުރާ މީހުންނަށް ބަލިޖެހުން ފަސޭހަވެފައި ބަލިން ރަނގަޅުނުވެ ގިނަ ދުވަސްތަކެއް ހޭދަވެއެވެ. ނޫނީ ބަލީގައި ބޮޑުވަރުވެއެވެ.
ތިންވަނަ ކަމަކީ ސިގިރެޓް ބުއިން ހުއްޓާލުމެވެ. ސިގިރެޓް އެކަންޏެއް ނޫނެވެ. ދުންފަތުގެ އިސްތިއުމާލު ކުރުމުން އެއްކޮށް ދުރުހެލުވާން ޖެހެއެވެ. ދުންފަތުގެ އިސްއުމާލު ކުރުމަކީ ނޭވާލާ ނިޒާމުގެ ބަލިތަކަށް މީހާ ހުށަހެޅި، އަދި ކޯވިޑް -19 ގައި ބަލީގެ ބޮޑުވަރުވާ ކަމެކެވެ.
ހަތަރުވަނަ ކަމަކީ ކަސްރަތުކުރުމެވެ. ޑަބްލިޔު.އެޗް.އޯ ގޮވާލަނީ ބޮޑު މީހަކު ނަމަ ކޮންމެ ދުވަހަކު މަދުވެގެން 30 މިނިޓް ކަސްރަތު ކުރުމަށެވެ. ކުޑަކުއްޖަކު ނަމަ 45 މިނިޓްހާއިރު ކަސްރަތުކޮށް ހެލިފެލިވެ އުޅުމަށެވެ. ފުރަބަންދުގައި ނުވަތަ އެކަހެރިކޮށް ހުންނަން ޖެހުނަސް ކަސްރަތާ ދުރުނުވުމަށެވެ. ސިނޑިން އަރާފޭބުމާއި، ޔޯގާ ހެދުމަށާއި ނުވަތަ އޮންލައިންކޮށް ނަމަވެސް ހަށިހެޔޮކަން ދެމެހެއްޓުމުގެ ޕްރޮގްރާމްތައް ކުރިއަށް ގެންދިއުމަށެވެ.
އެއްގޮތަކަށް ގިނައިރު ތަންތާ އޮށޯވެ އޮތުން ރަނގަޅެއް ނޫނެވެ. އަދި ގިނައިރު އިށީނދެ ނީނުމަށް ވެސް ގޮވާލަމުން ދެއެވެ. ތަނެއްގައި އިށީނދެ އިންނަތާ ނޫނީ އޮށޯވެ އޮންނަތާ 30 މިނިޓް ވެއްޖެނަމަ މަދުވެގެން 3 މިނިޓެއްހާއިރު އެ އޮތްތާކުން ނޫނީ އެ އިން ތާކުން ތެދުވެ މޯޅިއަކަށް ދެމިލައި ސްޓްރެޗް ކޮށްލުމަކީ ވަރަށް ފައިދާހުރި ކަމެކެވެ.
ފަސްވަނަ ކަމަކީ ނަފްސާނީ ދުޅަހެޔޮކަން ދެމެހެއްޓުމެވެ.
ކޯވިޑާ ގުޅިގެން މި ދުވަސްކޮޅު ވަރަށް ގިނަ ބައެއްގެ ނަފްސާނީ ދުޅަހެޔޮކަމަށް ދަނީ އަސަރުކުރަމުންނެވެ. ބަލިޖެހޭ މީހުންގެ އިތުރުން ގެތަކުގައި ތިބެން ޖެހުމަކީ ވެސް ކުޑަ ވޭނެއް ނޫނެވެ. މިކަމަށް އޮތް ހައްލަކީ ދުރުގައި ތިބެގެން ޒަމާނީ ވަސީލަތްތައް މެދުވެރިކޮށް މީހުންނާ ގިނަގިނައިން ބައްދަލުވެ އުޅުމެވެ. ދުރުގައި ތިއްބަސް އާއިލީ ގުޅުންތަކާއި ރަހުމަތްތެރިކަން ދެމެހެއްޓުމެވެ.
މި ދެންނެވުނީ ކޮންމެ މީހެއްގެ ވެސް އަތް ފޯރާފަށުގައި ހުރި ކޯވިޑުގެ ފަރުވާތަކެކެވެ. ބަލިޖެހުމުން ދުރުކޮށްދޭ އަދި ބަލިން ރައްކާތެރިވެ ސަލާމަތް ވުމަށް ވެސް މުހިންމު ފަރުވާތަކެކެވެ. ބައްޔެއްގެ ވާހަކަ ދައްކާއިރު ގަބޫލުކުރަންޖެހޭ ހަގީގަތަކީ ކޮންމެ ބައްޔެއް ވެސް ފޮނުއްވަނީ އަދި އެ ބައްޔަކުން ޝިފާ ދެއްވަނީ ވެސް ﷲ ތަޢާލާ ކަމެވެ. އެހެންކަމުން އެ ކަލާނގެއަށް ދުޢާ ދަންނަވަން ޖެހެއެވެ. މުސްލިމުންގެ އެންމެ ވަރުގަދަ ހަތިޔާރަކީ ވެސް ދުޢާ އެވެ.
އަޅަމެންނާއި އަޅަމެންގެ ޢާއިލާތަކާއި އަޅަމެންގެ ރަށާއި ޤައުމު މި ނުރައްކާތެރި ބަލި މަޑުކަމުން ސަލާމަތްކޮށް ރައްކާތެރިކޮށް ދެއްވާންދޭވެއެވެ. އާމީން.
ނޯޓް: މިއީ ފޭސްބުކްގައި 11 ޖުލައި 2020 ވަނަދުވަހު ޢަބްދުﷲ ސަޢީދު ލިޔުވަފައިވާ ލިޔުމުގެ ނަކަލެކެވެ.
