ށ. ކޮމަންޑޫ ކައިރީގައި އޮންނަ ގުޅިފައިވާ ތިން ރަށުގައި ރިސޯޓެއް ހަދަން ހުޅުވާލައިފި އެވެ.
އެ ތިން ރަށަކީ ދިގުރަށް، މެދުރަށް އަދި މައިރަށް (ދިގުވެލިދޫ) އެވެ. އެ ތިން ރަށް، އެއީ އެއް ރަށެއްގެ ގޮތުގައި ބަލައި، އެތަނުގައި ރިސޯޓެއް ހަދަން ހުޅުވާލީ މިދިޔަ އޮކްޓޯބަރު މަހުގެ ތެރޭގައި ޓޫރިޒަމް މިނިސްޓްރީން ރިސޯޓް ހަދަން ހުޅުވާލި 18 ރަށުގެ ތެރޭގައި ހިމަނައިގެންނެވެ.
ޓޫރިޒަމް މިނިސްޓްރީން މިއަދު ނެރުނު އިއުލާނެއްގައި ބުނީ، ރާއްޖޭގެ ހުރިހާ އަތޮޅަކަށް ޓޫރިޒަމް ތައާރަފުކުރުމަށް ސަރުކާރުން ގެންގުޅޭ ސިޔާސަތުގެ ތެރެއިން ކަމަށެވެ.
ޓޫރިޒަމް މިނިސްޓްރީގެ އިއުލާނުގައި ބުނެފައިވާ ގޮތުން އެ ތިން ރަށުގައި ތަރައްގީކުރަން ބޭނުންވަނީ 300 އެނދުގެ ރިސޯޓެކެވެ. އެ ތިން ރަށް ހިއްކައިގެންވެސް ރިސޯޓު ހެދުމުގެ ފުރުސަތު ދީފައިވާ އިރު، އެ ރަށްތަކުގެ އެންމެ ދަށް އެކިއުޒިޝަން ކޮސްޓަކީ 1.2 މިލިއަން އެމެރިކާ ޑޮލަރު (18.5 މިލިއަން ދިވެހި ރުފިޔާ) އެވެ.
